रेमिट्यान्समा वृद्धि भएपछि विदेशी मुद्रा सञ्चिति १४ खर्ब ८० अर्ब पुग्यो

A+ A A-

चालु आर्थिक वर्षको ११ महिनाको महिनाको तथ्यांकले देशको आर्थिक तथा वित्तीय स्थिति अवस्था सकारात्मक देखाएको छ । राष्ट्र बैंकले ११ महिनाको अवस्थाबारे तथ्यांक सोमबार सार्वजनिक गरेको छ ।

राष्ट्र बैंकको तथ्यांकअनुसार यो अवधिमा रेमिट्यान्स आप्रवाहमा उल्लेख्य वृद्धि भएको छ भने विदेशी मुद्रा सञ्चिति पनि उल्लेख्य रूपमा बढेको छ । यस्तै, शोधनान्तर स्थिति बचतमा छ भने व्यापारघाटा पनि घटेको छ ।

राष्ट्र बैंकका अनुसार अहिले विदेशी मुद्रा सञ्चिति १४ खर्ब ८० अर्ब रूपैयाँ पुगेको छ । यो अमेरिकी डलरमा ११ अर्ब २९ करोड पुगेको छ । हालको विदेशी मुद्रा सञ्चितिले ९ महिना १८ दिनको वस्तु तथा सेवाको आयात खरिद गर्न सकिन्छ ।

विदेशी मुद्रा सञ्चिति बढ्नुमा रेमिट्यान्सको मुख्य भूमिका रहेको छ । चालु आर्थिक वर्षको ११ महिनामा ११ खर्ब १२ अर्ब रूपैयाँ रेमिट्यान्स भित्रिएको राष्ट्र बैंकले जनाएको छ । गत आर्थिक वर्षको तुलनामा २२.७ प्रतिशतले रेमिट्यान्स बढेको हो । यसरी रेमिट्यान्समा भएको वृद्धिले शोधनान्तर स्थिति धनात्मक बनेको हो । ११ महिनामा शोधनान्तर स्थिति २२८ अर्ब ९८ करोडले बचतमा छ । मुलुकबाट बाहिरिने र भित्रिने रकमको भुक्तानी सन्तुलन नै शोधनान्तर स्थिति हो ।

विदेशी मुद्रा सञ्चिति बढ्नु् र शोधनान्तर स्थिति बचतमा रहनुमा रेमिट्यान्स मात्र नभई आयातमा गरिएको प्रतिबन्धित व्यवस्थाले पनि काम गरेको छ । किनकि यो ११ महिनामा गत आर्थिक वर्षको तुलनामा आयात पनि १६ प्रतिशतले घटेको छ ।

यस्तै, निर्यात २२.७ प्रतिशतले घटेको छ । समग्रमा व्यापारघाटा १५.२ प्रतिशतले घटेको छ । चालु आर्थिक वर्षमा नेगेटिभ देखिएको सूचकांक निर्यात हो । यस्तै, राजस्व परिचालनको सूचकांक पनि नकारात्मक छ । चालु आर्थिक वर्षको ११ महिनामा ८३६ अर्ब ८५ करोड राजस्व परिचालन भएको छ भने सरकारी खर्च १,१७६ अर्ब ७ करोड रहेको छ । राजस्व परिचालनभन्दा संघीय सरकारको खर्च धेरै हुँदा चालु खाता ऋणात्मक बनेको छ ।

यो अवधिमा उपभोक्ता मूल्य सूचकांकमा आधारिक मुद्रास्फीति ६.८३ प्रतिशत छ । बैंक तथा वित्तीय संस्थामा निक्षेप ८.८ प्रतिशतले बढेको छ ।

प्रकाशित मिति: सोमबार, असार २५, २०८० १५:१२