सांसदहरूलाई केन्द्रीय सदस्य बनाउँदै रास्वपा, उपसभापति बन्लान् स्वर्णिम ?

A+ A A-

राष्ट्रिय स्वतन्त्र पार्टी (रास्वपा)ले सांसदहरूलाई केन्द्रीय सदस्यमा मनोनीत गर्ने तयारी गरेको छ । संसदलाई प्रभावकारी बनाउन भन्दै रास्वपाले सांसदहरूलाई केन्द्रीय सदस्यको जिम्मेवारी दिएको थिएन । निर्वाचन क्षेत्र र जिल्ला–जिल्लाबाट सांसदहरूलाई कार्यकर्ता र नागरिकहरूले बोलाउन थालेपछि केन्द्रीय सदस्यको पनि जिम्मेवारी दिने निचोडमा रास्वपा पुगेको हो ।

‘सदनलाई प्रभावकारी बनाउन सांसदलाई पार्टीको जिम्मेवारी नदिने भन्ने थियो । तर, संगठन विस्तारमा पनि जिल्लाजिल्लाबाट सांसदलाई बोलाउन थालियो,’ रास्वपाका प्रमुख सचेतक सन्तोष परियार भन्छन्, ‘पार्टी निर्माणमा सांसदको महत्त्वपूर्ण भूमिका हुने भएकाले केन्द्रीय सदस्यको जिम्मेवारी दिने निष्कर्षमा पार्टी पुगेको हो ।’

यसअघि केन्द्रीय सदस्यले पार्टी र सांसदले सदन प्रभावकारी बनाउने निर्णय रास्वपाले गरेको थियो । तर, सदस्यमा कहिले मनोनीत गर्ने भन्ने निर्णय गर्न बाँकी रहेको उनले बताए । ‘ढिला नगरी क्षमताअनुसार पार्टीले जिम्मेवारी दिने भनिएको छ । पार्टीले छिट्टै निर्णय लिन्छ,’ उनले भने ।

हाल रास्वपाको ३९ सदस्यीय केन्द्रीय समिति छ । केन्द्रीय समितिलाई समावेशी बनाउने गरी सदस्यहरू मनोनीत गरिने बताउँछन् पार्टी प्रवक्ता डा. मुकुल ढकाल । ‘सांसदहरूलाई पनि केन्द्रीय समितिमा ल्याउने निचोडमा पुगेका छौँ । समावेशिताका आधारमा टुंगो लगाउँछौँ,’ उनले भने ।

रास्वपाको केन्द्रीय समिति समावेशी नभएको गुनसो आउने गरेको छ । यसलाई सम्बोधन गर्ने गरी केन्द्रीय समिति विस्तार गर्ने प्रवक्ता डा. ढकाल बताउँछन् । ‘मंसिरअघि नै केन्द्रीय समिति समावेशी बनाउँछौँ । त्यही क्रममा सांसदहरूलाई पनि केन्द्रीय सदस्यको जिम्मेवारी दिने तयारी छ,’ उनले भने । अर्का सह–महामन्त्री कवीन्द्र बुर्लाकोटी पनि सांसदहरूलाई पार्टीको जिम्मेवारी दिने विषयमा खाका बनाउने काम भइरहेको बताउँछन् ।

‘छलफल चलिरहेको छ, खाका बनाउने काम भइरहेको छ,’ उनले भने । सांसदहरू केन्द्रीय सदस्य नभए पनि निर्णय गर्दा संयुक्त बैठक बसेर गर्ने गरेको बताउँछन् प्रवक्ता डा. ढकाल । ‘केन्द्रीय कमिटीले मात्र निर्णय गर्ने गरेको छैन । सांसदसहितको संयुक्त बैठक बसेर निर्णय गर्ने गरेका छौँ,’ उनले भने । संसदमा रास्वपाका २१ सांसद छन् । जसमा ६ जना मात्र केन्द्रीय समितिमा छन् ।

सभापति रवि लामिछने, उपसभापति डोलप्रसाद अर्याल, सदस्यहरू सोविता गौतम, गणेश पराजुली, सुमना श्रेष्ठ, विन्दबासिनी कंसाकार संसद र केन्द्रीय समिति दुवैमा छन् । सांसद सन्तोष परियार, स्वर्णिम वाग्ले, मनिस झा, शिशिर खनाल, हरि ढकाल, विराजभक्त श्रेष्ठ, शिव नेपाली, डा. चन्दा कार्की, डा. तोसिमा कार्की, निशा डाँगी, विनिता कठायत, लक्ष्मी तिवारी, अशोककुमार चौधरी र असीम शाह केन्द्रीय समितिमा छैनन् । रास्वपाबाट समानुपातिक सांसद बनेकी इन्दिरा रानामगर उपसभामुख छिन् । उनी भने पार्टीको जिम्मेवारीमा रहने छैनन् । विधानअनुसार रास्वपाले १२१ सदस्यीय केन्द्रीय समिति बनाउन सक्नेछ ।

उपसभापति बन्लान् स्वर्णिम ?

कांग्रेस परित्याग गरी रास्वपा प्रवेश गरेर चुनाव जितेका स्वर्णिम वाग्लेलाई उपसभापति बनाउने चर्चा पनि छ । तर, रास्वपाले यसबारेमा कुनै निर्णय गरेको छैन । यद्यपि, दुई जना उपसभापति राख्न सकिने रास्वपाका नेताहरू बताउँछन् । हाल डोलप्रसाद अर्याल उपसभापति छन् । सांसद वाग्लेलाई पार्टीको महत्त्वपूर्ण जिम्मेवारी दिन रास्वपा तयार छ तर कसरी व्यवस्थापन गर्ने भन्ने निर्णय गरेको छैन ।

‘उपयुक्त समयमा उपयुक्त जिम्मेवारी दिने हो । सम्मानसहित उहाँलाई जिम्मेवारी दिने हो तर यही भन्ने निर्णय भएको छैन,’ प्रवक्ता ढकाल भन्छन् । अर्का सह–महामन्त्री बुर्लाकोटी पनि यसबारेमा पार्टीमा छलफल नभएको बताउँछन् । तर, एक केन्द्रीय सदस्य भने वाग्लेलाई उपसभापति बनाउने बाटो खुला रहेको बताउँछन् ।

‘अहिले एक जना उपसभापति हुनुहुन्छ । थप एक जनालाई उपसभापति बनाउन सकिने ठाउँ छ,’ ती सदस्यले भने । रास्वपाले वाग्लेलाई केन्द्रीय अर्थ विभागको जिम्मेवारी पनि दिएको छ ।

मंसिरमा महाधिवेशन हुन्छ ?

रास्वपाले विधानअनुसार आगामी मंसिरभित्र महाधिवेशन गर्ने तयारी छ । रास्वपाले ७४ जिल्लामा संगठन विस्तार गरिसकेको छ । गत ७ असारमा स्थापनाको पहिलो वर्ष मनाएको रास्वपा अब हुम्ला, डोल्पा र रुकुम पश्चिममा पुग्न बाँकी छ । हाल वडा, पालिका र क्षेत्रको भेला आयोजना गरिरहेको छ । अहिलेको भेलाले चयन गरेको नेतृत्व महाधिवेशनका लागि प्रतिनिधि हुन पाउने छैन ।

महाधिवेशन प्रतिनिधिका लागि मंसरमा अर्को समिति बन्ने प्रवक्ता ढकाल बताउँछन् । ‘अहिले संगठन विस्तार गरेको हो । महाधिवेशन प्रतिनिधिका लागि मंसिरमा अर्को समिति बन्छ । यो समिति पाँचवर्षे कार्यकालको हुन्छ,’ उनले भने । महाधिवेशन प्रतिनिधि छनोट भएपछि केन्द्रीय नेतृत्व छनाेट प्रक्रियामा जाने उनले बताए ।

सुस्त विभाग

पार्टीलाई क्रियाशील बनाउन रास्वपाले ३६ वटा केन्द्रीय विभाग बनाएको छ । तर, विभागले प्रभावकारी काम गरेका छैनन् । विभागहरूले कार्यविधिसमेत बनाएका छैनन् । अधिकांश विभागको नेतृत्वमा संसदहरू छन् । बजेट अधिवेशनका कारण विभागको काममा संसदले समय दिन नसकेका कारण विभागको काम अगाडि बढाउन नसकिएको बताउँछन् प्रवक्ता ढकाल । ‘कार्यविधि बनाउने काम भइरहेको छ । बजेट अधिवेशनका कारण ढिलाइ भएको हो, विभागले छिट्टै पूर्णता पाउँछ,’ उनले भने ।

सम्बन्धित समाचार