फेसबुकतिर गाली खान थालेपछि टिकटकमा 'ठगी जाल' फाल्दै सुजन आचार्य

A+ A A-

सिंगापुरमा काम दिने भन्दै ४० युवाबाट ४ करोडभन्दा बढी रकम ठगेका सुजन आचार्य र उनकी प्रेमिका बिनु शाक्य अझै फरार छन् । उनीहरू पक्राउ नपरेसम्म पीडितले न्याय नपाउनुका साथै अरु पनि ठगिने सम्भावना छ । किनकि, फरार सुजनले व्हाट्सएप र टिकटकमार्फत ‘एस ग्लोबल प्रालि’ नामको कम्पनीबारे झुटो प्रचार गरिरहेका छन् ।

टीभी, युट्युब र सोसल मिडियाबाट यस्तै प्रचार गरेर उनले ४० युवालाई ठगेका थिए । सिंगापुरको लेखा एवं कर्पोरेट नियमन प्राधिकरणमा ‘एस ग्लोबल प्रालि’ दर्ता भएको दाबी गर्दै आफ्नो टिकटक अकाउण्टमा उनले तस्वीरसहितकाे भिडियाे पोस्ट गरेका छन् ।

११ दिनअघि टिकटकमै उनले एस ग्रुप ग्लोबलले ‘गुड स्ट्यान्डिङ’ सर्टिफिकेट’ पाएको भन्दै तस्वीर राखेका छन् । यता दर्जनौँ युवाको बिल्लीबाठ पारेर सुजन दिनहुँ टिकटकमा अभिनय गरेर भिडियो बनाइरहेका छन् । आकर्षक जागिरको लोभ देखाएर दर्जनौँ युवालाई ठगेका उनले एस ग्रुप ग्लोबल नामको फेसबुक पेजमार्फत पनि मान्छे लोभ्याउने प्रयास गरिरहेका छन् ।

उनले आफ्नो टिकटक भिडियाेमुनि अरुले कमेन्ट गर्न नमिल्ने गरी प्राइभेसी सेटिङ मिलाएका छन् । सुजनले एस ग्रुप ग्लोबल नामक कम्पनीकै नाममा ११ जिल्लाका ४० युवाबाट जनही ५ लाखदेखि साढे १९ लाख रुपैयाँसम्म असुलेका थिए ।

सिंगापुरको भी ग्रुपमा आफ्नो शेयर रहेको र एस ग्रुप ग्लाेबल प्रालिले विभिन्न रेस्टुरेन्टहरू चलाउन लागेको भन्दै मासिक ५ लाख रुपैयाँसम्मको जागिर दिने भनेर उनले नेपाली युवाहरूसँग पैसा लिएका थिए । रकम बुझाएको वर्ष दिनसम्म झुलाएपछि मात्रै पीडितले आफूहरू ठगिएको सुइँको पाए । त्यसपछि उनीहरूले वैदेशिक रोजगार विभागमा उजुरी गरेका छन् । प्रमाण पुगेका २२ जनाकाे उजुरी लिएर विभागले ठगी आरोपी आचार्य र शाक्यलाई खोजिदिन प्रहरीलाई पत्र पनि पठाइसकेको छ ।

आफ्नो ठगी धन्दाबारेको समाचार मिडियामा सर्वत्र भएपछि उदयपुर त्रियुगा नगरपालिका- १०, बाेक्सेका सुजनले फेसबुकमा पोस्टहरू शेयर गर्न छोडिसकेका छन् । अहिले उनले व्हाट्सएप र टिकटकमार्फत मान्छे लोभ्याउने प्रयास गरिरहेका छन् ।

ठगीमा प्रत्यक्ष संलग्न रहेकी बेली डान्सर बिनुले पनि आफ्नो टिकटक अकाउन्ट ‘प्राइभेट’ गरेकी छन् । यसो गर्दा साथी नभएकाहरूले उनका भिडियोहरू हेर्न तथा कमेन्ट गर्न मिल्दैन । सिन्धुपाल्चोककी बिनुलाई टिकटकमा १२ लाखले फलो गरेका छन् । इन्स्टाग्राममा उनका फलोअर १ लाख १४ हजार छन् । पछिल्लो समय इन्स्टाग्राम र फेसबुकमा उनी निष्क्रिय छिन् । वैदेशिक रोजगारीका लागि भन्दै बिनुले युवाहरूबाट लाखाैँ रकम असुलेकाे बैंक स्टेटमेन्टमा देखिन्छ ।

कहाँ छन् बिनु र सुजन ?

सुजन उदयपुरकाे त्रियुगा नगरपालिका, बोक्सेका हुन् भने बिनु सिन्धुपाल्चोक बलेफी गाउँपालिका लामसाँघुकी हुन् । उनीहरू सिंगापुरमै लुकेर बसेको अनुमान छ । केही महिनाअघिसम्म उनीहरू नेपाल र सिंगापुर आउजाउ गरिरहेका थिए । तर, ठगी धन्दाको पर्दाफास भएयता फरार छन् । उनीहरूको लोकेसन थाइल्यान्ड, हङकङदेखि दिल्लीमा समेत देखिएको प्रहरीले जनाएको छ ।

के भइरहेकाे छ मुद्दा ?

आचार्यकै ठगीमा सघाएका उनका भाइ (सानिमाका छोरा) सिर्जन निराैलाविरुद्ध अनुसन्धान सकेर विभागले सरकारी वकिलमार्फत वैदेशिक रोजगार न्यायाधिकरणमा अभियाेग दर्ता गरिसकेकाे छ । सुजनका भाइ सिर्जनसहित चार जना वैदेशिक ठगी मुद्दामा पक्राउ परेका थिए । उनीहरूले १ करोडभन्दा बढी रकम ठगेको अभियोग छ । तर, सुजन र बिनु पक्राउ पर्न बाँकी रहेकाे भन्दै विभागले न्यायाधिकरणमा मुद्दा पठाएको छैन ।

आरोपी सुजन आचार्य र बिनु शाक्यलाई पक्राउ गर्न विभागले प्रहरीलाई पत्राचार गरिसके पनि उनीहरू समातिएका छैनन् । 'पक्राउपछि मुद्दासहित न्यायाधिकरणमा पठाउने भनेर हामी प्रहरीलाई कुरिरहेका छौँ । समात्न नसकेमा प्रहरीले लिखित पठाउँछ, त्यसपछि हामी बाँकी प्रक्रियामा जानेछौँ,' विभागका एक अधिकारीले शिलापत्रसित भने ।

नेपाल प्रहरीका प्रवक्ता डीआईजी कुबेर कडायतले विभागको अनुरोधपछि आचार्य र शाक्यको खोजी भइरहेको बताए । उनका अनुसार, दुवै जना नेपालमा रहेको कुनै 'क्लु' फेला परेकाे छैन । कहिले सिंगापुर, कहिले बैंककहुँदै दिल्लीसम्मको लोकेसन देखिएको छ । त्यसैले पक्राउ गर्न ढिला भएकाे उनले बताए ।

विभागले अनुसन्धान गरिरहेकाले न्यायाधिकरणकाे आदेशपछि इन्टरपोलमार्फत उनीहरूको खोजी हुने उनकाे भनाइ छ । ‘अहिले पनि उनीहरूको खोजी इन्टरपोलमार्फत अनौपचारिक रूपमा त भइरहेको छ तर न्यायिक निकायबाट अनुमति प्राप्त भएपछि औपचारिक रूपमै रेड कर्नर नोटिस जारी गरेर खाेज्नेछाैँ’, उनले भने ।

आरोपीहरू विदेशमा भएकाले न्यायिक निकायको आदेशपछि मात्रै इन्टरपोलमार्फत खोजी गर्न सकिने प्रहरीको भनाइ छ । तर, आदेशका लागि वैदेशिक रोजगार विभागले न्यायाधिकरणमा मुद्दा पुर्‍याएकै छैन ।

विभागले अनुसन्धान सकेर न्यायाधिकरणमा पठाएपछि मात्र मुद्दा अघि बढ्छ । वैदेशिक रोजगार कसुरसम्बन्धी मुद्दाको सुरु कारबाही र किनारा गर्ने न्यायिक निकाय नै वैदेशिक राेजगार न्यायाधिकरण हो ।

वैदेशिक ठगीकाे मामिलामा पीडितकाे उजुरी विभागले नै लिन्छ । यसमा अनुसन्धान गरी सरकारी वकिलको राय लिएपछि विभागले न्यायाधिकरणमा अभियोगपत्र पेस गर्छ । त्यसपछि पीडितको तर्फबाट सरकारी वकिलले बहस पैरवीलगायत प्रतिरक्षा गर्छन् ।

विभाग र प्रहरीकाे गाेलचक्करमा पीडित

विभागले प्रहरी अनि प्रहरीले विभाग देखाएर ठगी आरोपीलाई पक्रन ढिलाइ भइरहेकोप्रति पीडितहरू सशंकित छन् । एक पीडितले शिलापत्रसित भने, 'पक्राउ पुर्जी जारी भएपछि उपप्रधानमन्त्री भइसकेका टोपबहादुर रायमाझी त लुकेर बस्न नसकेर आत्मसमर्पण गरे, ४०/५० जनाबाट करोडौँ ठगेर भागेकाे सुजन आचार्य टिकटकमा दिनैपिच्छे देखिन्छ । अझै अरुलाई ठग्न खोजिरहेको छ तर पुलिस र विभागले एकअर्कालाई देखाएर ढिला गरेकाले हामीलाई शंका छ- कतै उसले कारबाही गर्नेहरूलाई नै रिझाइ त सकेन ?'

सुजनबाट ४६ लाख रुपैयाँ ठगिएका अछामका अनिल अधिकारीले आफूहरू न्यायको प्रतीक्षामा रहेको बताए । 'सम्बन्धित निकायले हाम्रो बेवास्ता गरेमा यसको फाइदा सुजनले उठाउँछ । फेरि हामीजस्तै अरु दर्जनौँ ठगिन्छन् । त्यसैले आवश्यक परे हामी माइतीघरमा धर्ना दिन पनि तयार छौँ । पीडित सबै एकैठाउँ छौँ,' उनले भने ।

बिनु र सुजनको जालमा परेका कतिपयले आर्थिक तनावसँगै मानसिक समस्यामा पुग्न लागेको बताएका छन् । खाएको र बसेकाे खर्च तिर्न नसकेपछि केही युवा कोटेश्वरको एक होटलमा तीन महिनाभन्दा लामो समयदेखि बन्धकजस्तै भएका छन् ।

सम्बन्धित समाचार

प्रकाशित मिति: मंगलबार, असार ५, २०८० १७:२९