२२ वर्षे युवकले प्रेमिका प्रयोग गरेर ५ करोड ठगेको भन्दै ३९ युवाको पत्रकार सम्मेलन

२२ वर्षे युवकले प्रेमिका प्रयोग गरेर ५ करोड ठगेको भन्दै ३९ युवाको पत्रकार सम्मेलन

A+ A A-

आफूलाई पत्रकार तथा उद्यमी बताउने २२ वर्षे सुजन आचार्यले सिंगापुरमा काम लगाइदिने भन्दै नेपाली युवाबाट करोडौँ रुपैयाँ ठगी गरेको पाइएको छ ।

काठमाडौंको गैरीधारामा आज पत्रकार सम्मेलन गरी ३९ जना पीडितले आचार्यले उनकी प्रेमिका भनिने बेली डान्सर बिनु शाक्यको बैंक खातामार्फत जनही ५ देखि १९ लाख रुपैयाँसम्म लिएर ठगी गरेको बताएका छन् ।

मासिक अढाइ लाखदेखि ४ लाख रुपैयाँ रुपैयाँसम्म तलब पाउने जागिरको लोभ देखाएपछि नेपालमा भएको जागिर छोडेर, घरजग्गा बैंकमा राखेर आचार्यलाई पैसा बुझाएको अछामका पारस अधिकारीले बताए । आफूले बिनु शाक्यको खातामा विभिन्न समयमा १२ लाख रुपैयाँ पठाएको उनको भनाइ छ । उदयपुरको त्रियुगा नगरपालिका वडा नम्बर १०, बोक्से स्थायी घर भएका आचार्य र भक्तपुरकी शाक्य हाल सिंगापुरमै लुकेर बसिरहेको अनुमान छ । आचार्य र शाक्यलाई प्रहरीले खोजिरहेको छ ।

‘पैसा बुझाएको एक हप्ताभित्र लैजान्छु भनेको थियो तर एक वर्ष भइसक्दा पनि लैजानु त परै जाओस्, थप पैसा माग्ने र झुलाउने मात्रै गरिरहेको छ,' उनले भने । ठगीमा परेर आफू सिंगापुरदेखि फिलिपिन्समा समेत बन्दी हुनुपरेको उनले सुनाए । आचार्यविरुद्ध अन्य पीडितले पनि प्रहरीमा जाहेरी दिएका अधिकारीले बताए ।

पैसा फिर्ता माग्दा अचार्यले उल्टै धाकधम्की दिने गरेको बाँकेका अनिल भण्डारीले बताए । । उनले भने, ‘नेपालको पुलिसले मेरो केही बिगार्न सक्दैन भन्छ, नेता, मन्त्रीलाई म मिलाइहाल्छु भन्छ ।’

एक दुईपल्ट आउजाउ गरेर ट्राभल हिस्ट्री बनाएपछि सिंगापुर बसेर काम गर्न मिल्ने कार्ड बनाइदिने आश्वासनमा केही युवा सिंगापुरसमेत गएका थिए । ‘अनेक झुटा आश्वासन दिएर, फेक डकुमेन्ट बनाएर हामीलाई ठगेको रहेछ,' अछामका अनिल अधिकारीले भने । उनी दुईपल्ट सिंगापुर गएर फर्केका थिए ।

आचार्यको विश्वासमा परेर आफूले थप पाँच जना नातेदारलाई समेत पैसा हाल्न लाएको उनले बताए । उनले भने, ‘भारतमा एउटा होटलमा महिनाको ३० हजार भारु मजाले कमाउने जागिर मात्रै गुमाइनँ, मेरो थाप्लोमा अहिले कुल ४४ लाख रुपैयाँ ऋणको भारी छ ।' आफूले सुजन आचार्य र बिनु शाक्यलाई पैसा बुझाएको उनले बताए ।

ठगी प्रक्ररणमा सुजनका सानिमाका छोरा भनिएका २० वर्षे सृजन निरौला पक्राउ परिसकेका छन् । पीडितहरूले जतिसक्दो छिटो आचार्यलाई खोजेर पक्राउ गर्न पत्रकार सम्मेलनमार्फत प्रहरीको ध्यानाकर्षण पनि गराएका छन् ।

आचार्य सिंगापुर नजाउन्जेलका लागि भन्दै होटलमा राखेका पाँच जना पीडित युवाहरू बन्दीजस्तै बनेका छन् । ‘कोटेश्वरको होटलमा पाँच जना साथीहरू पैसा बुझाउन नसकेर बन्दी बन्नुभएको छ, त्यहाँ बस्दै गर्नू, उड्नेबेलासम्मको सबै खर्च म बेहोर्छु भनेका आचार्य सम्पर्कमा नआएपछि होटल साहुजीले तिनै साथीहरूलाई पैसा नबुझाई नजान भन्नुभएको छ,' अधिकारीले भने ।

सिंगापुरमा आफ्नो भी ग्रुपमा लगानी भएको, विभिन्न नेपाली रेस्टुरेन्ट किनेको र त्यसैमा जागिर लगाइदिने भन्दै आचार्यले पैसा असुलेको पीडितहरूको भनाइ छ ।

आचार्य यसअघि पनि विभिन्न आपराधिक गतिविधिमा मुछिएका पात्र हुन् । कुनै बेला आफूलाई नेपालकै कान्छो पत्रकार भनेर प्रचार गर्ने उनी मकवानपुरको हीरा लुट प्रकरण, एक मोडललाई भिडियो देखाएर ब्ल्याकमेलिङ प्रकरणलगायतमा समातिएर छुटेका पात्र हुन् ।

प्रकाशित मिति: सोमबार, जेठ २२, २०८० १४:२०