सुम्निमामा चित्रकला र हस्तकला प्रदर्शनी

A+ A A-

विराटनगर–११ पिचरास्थित सुम्निमा बोर्डिङ स्कुलले चित्रकला र हस्तकला प्रदर्शनी आयोजना गरेको छ । विद्यार्थीहरूभित्र रहेको प्रतिभा उजागर गर्ने उद्देश्यले चित्रकला र हस्तकला प्रदर्शनी गरिएको विद्यालयले जनाएको छ ।

प्रदर्शनीमा १४ वटा स्टल समावेश गरिएको विद्यालयकी प्रिन्सिपल शीतला सुब्बाले जानकारी दिइन् । कक्षा ४ देखि ६ सम्म अध्ययनरत विद्यार्थीहरूले बनाएको घर, फूलसहित सजावटका सामग्रीहरू प्रदर्शनीमा राखिएको थियो । बालबालिकाको प्रतिभा प्रस्फुटनमा यस्ता प्रदर्शनीले महत्वपूर्ण भूमिका निर्वाह गर्ने प्याब्सन मोरङकी वरिष्ठ उपाध्यक्षसमेत रहेकी प्रिन्सिपल सुब्बाको दाबी छ ।

‘काम लाग्दैन भनेर फ्याँकेका वस्तुहरूबाट समेत यति राम्रा सजावटका सामग्री बनाउन सकिन्छ भन्ने कमैलाई थाहा छ’ सुब्बाले थपिन्, ‘यो प्रदर्शनीले फ्यालेका वस्तुमा पनि महत्व छ भनेर पुष्टि गरेको छ ।’

विद्यार्थीहरूले कोकको बोतल, कागज, प्लाष्टिक, तरकारीलगायतका प्रयोग गरेर आकर्षक हस्तकलाका सामग्री बनाएका छन् । विद्यार्थीले बनाएका चित्र र हस्तकलाका सामग्रीहरू अभिभावकहरूले समेत अभिरुचीपूर्वक अवलोकन गरेका थिए । आफ्ना छोराछोरीले बनाएको चित्र र हस्तकला देखेर अभिभावकसमेत दंग देखिन्थे । विद्यालयले हरेक वर्ष चित्र र हस्तकला प्रदर्शनी गर्दै आएको भ्वाइस प्रिन्सिपल जयन्ती प्रधानले बताइन् ।

महिलाद्वारा सञ्चालित सो विद्यालयमा सुरक्षा गार्डदेखि सम्पूर्ण शिक्षकसमेत महिला नै कार्यरत छन् । विद्यालयले जिल्लास्तरीय विभिन्न सांस्कृतिक नृत्यलगायत अतिरिक्त क्रियाकलापमा समेत पुरस्कार जित्दै आएको छ ।