तीन दिन 'तनाव'मा देखिएका न्यायाधीश न्यौपाने बुधबार भने ‘कुल’

A+ A A-

मंगलबारसम्म थुनछेक बहस सक्ने गरी सयम निर्धारण भए पनि नक्कली भुटानी शरणार्थी प्रकरणका प्रतिवादीकाे बहस बुधबार पनि सकिएन । न्यायाधीश प्रेमप्रसाद न्यौपानेको इजलासमा जारी बहसमा बिहीबार प्रतिवादी बालकृष्ण खाँण, शमशेर मिया र आङटावा शेर्पाका वकिलहरूले बहस सके ।

सुनुवाइ सक्ने दबाबमा रहेका न्यायाधीश न्यौपाने बुधबार ‘कुल’ देखिए । आइतबार, सोमबार र मंगलबार इजलासको अन्तिम समय तनावपूर्ण भएकाे थियाे । आइतबार न्यायाधीशले बहसका लागि बोलाउँदा प्रतिवादीका वकिलहरू बहसको लागि पुगेनन् । सोमबार 'आदेश दिनैपर्छ म त्यता लाग्छु' भनेर इजलासबाट उठेका न्यायाधीश न्यौपाने मंगलबार झन् तनावमा देखिएका थिए । उनी 'अदालत त निरीह जस्तो लाग्यो, मैले हात उठाउनुपर्ला जस्तो छ' भनेर इजलासबाट उठेका थिए ।

इजलासमा न्यायाधीशले बोलाइरहे, बहस गर्न कोही आएनन्

बुधबार भने उनी नरम देखिए । सरकारी वकिलको बहस बिहीबार पनि आउने निश्चित नभएपछि उनी हतारमा देखिएनन् ।

बुधबार खाँणका तर्फबाट बहस गर्न बाँकी रहेका वरिष्ठ अधिवक्ताहरू रमण श्रेष्ठ, सुरेन्द्र महतो, गोपालकृष्ण घिमिरे, खम्बबहादुर खाती र लतित बस्नेतले बहस गरे । त्यसपछि शमशेर मियाको तर्फबाट ऋषिराम घिमिरे, मन्दिरा अधिकारी र रविन्द्र भट्टराईले बहस गरे । अर्का प्रतिवादी आङटावा शेर्पाको तर्फबाट मणिराम उपाध्याय, शरद कोइराला र योगेन्द्र अधिकारीले बहस गरे । अधिकारीले खाँणको तर्फबाट पनि बहस गरे ।

अधिकारी कोइरालाले बहस गरेपछि ५ बजेर ४० मिनेट जाँदा इजलासमा गाेपालकृष्ण अधिकारी पुगे । सवा ५ बज्दा न्यायाधीश न्याैपानेको मुड कस्तो छ बुझ्न सकिन्थ्यो । मंगलबार उनले सोही समयमा बहस टुंग्याउनुस् भनेर रुलिङ गरेका थिए । तर बुधबार उनले समयसीमा बारे बोलेनन् ।

इजलासमा वकिल नआएपछि न्यायाधीशले भने- आदेश बनाउनै पर्छ म त्यता लाग्छु

बहस गर्छु भनेर इजलासमा प्रवेश गरेका अधिकारीलाई न्यायाधीश न्यौपानेले भने, ‘भोलि टुंग्याउला । आज भ्याइँदैन ।’

अधिकारीले १० मिनेटमा टुंग्याउछु भन्दै बहस थाले । सुरुमा शेर्पाको तर्फबाट प्रतिरक्षा बहस गरेका उनले पछि खाँणको तर्फबाट पनि बहस गरे । यसअघि खाँणको तर्फबाट बहस गर्ने समयमा उनी चितवन थिए । कांग्रेसनिकट वकिलहरूको संगठन डीएलएको महाअधिवेशनका लागि उनी चितवन पुगेका थिए । डीएलएका निवर्तमान अध्यक्ष अधिकारीले पटक पटक न्यायाधीश न्यौपानेसँग समयसीमा लाम्बिएकोमा माफी मागिरहे ।

पक्राउ परेका १८ जना प्रतिवादीमध्ये लक्ष्मी महर्जन, हरिभक्त महर्जन र टेकनाथ रिजालको बहस बाँकी छ । उनीहरूको तर्फबाट बहस बिहीबार हुनेछ । बुधबार ६ बजे बहस सकिएपछि उनीहरूका तर्फबाट कसले पहिला बहस गर्ने भन्नेबारे बुझ्न न्यायाधीश न्यौपाने समक्ष पुगे । न्यायधीशले ‘तपाईंहरू मिलेर आउनुस्’ भन्ने जवाफ दिए ।

...अनि न्यायाधीशले भने- अदालत त निरीह जस्तो लाग्यो, मैले हात उठाउनुपर्ला जस्तो छ

महर्जनका वकिहरूले दुई जना मात्र भएको, सहप्रतिवादी भएकाले थोरै समय लाग्ने बताए । रिजालका वकिलहरूले मिलाएर गरौंला भन्ने जवाफ दिए । त्यसपछि न्यायाधीश इजलास उठाएर बाहिरिए ।

खाँणका वकिलले राज्य नै लाग्यो भनेपछि न्यायाधीशको प्रश्न- राज्यविरुद्धको मुद्दामा राज्य लाग्दैन त ?

सरकारी वकिलहरू बुधबार नै जवाफी बहस गर्न तयार थिए । बिहीबार पनि हुने वा नहुने भन्ने दोधार सरकारी वकिलमा देखिन्थ्यो । सरकारी वकिलको तर्फबाट प्रतिरक्षा बहस सुन्न र टिपोट गर्न निर्मला मरासिनी उपस्थित थिइन् । ‘तपाईंहरूको बहस भोलि हुन्छ ? भन्ने प्रश्नमा उनले भनिन्, ‘प्रतिवादीहरूको सकिएर समय रहे हुन्छ नत्र हुँदैन ।’ सरकारी वकिललाई जवाफी बहसका लागि कम्तिमा तीन घण्टा लाग्ने उनले बताइन् ।

प्रकाशित मिति: बुधबार, जेठ ३१, २०८० १९:३३