इजलासमा वकिल नआएपछि न्यायाधीशले भने- आदेश बनाउनै पर्छ म त्यता लाग्छु

A+ A A-

नक्कली भुटानी शरणार्थी प्रकरणको सोमबारको इजलासको अन्त्य पनि तर्क, प्रमाण र बहसले होइन अन्योल, गन्जागोल र भद्रगोलले उठ्यो । आइतबार देखिएको दृश्य सोमबार पनि दोहोरियो ।

११ बजे सुरु बसेकाे इजलास आइतबारको भन्दा दस मिनेट अगावै सकियो । आइतबार ४ बजेर २० मिनेटपछि इजलासमा बहस हुन सकेको थिएन । सोमबार ४ बजेर १० मिनेटमा बहस हुन सकेन ।

इजलासमा न्यायाधीशले बोलाइरहे, बहस गर्न कोही आएनन्

सोमबार सुरुमा टेकनारायण पाण्डेको तर्फबाट वरिष्ठ अधिवक्ता तथा पूर्व महान्यायधिवक्ता रमण श्रेष्ठले बहस गरे । अर्का प्रतिवादी नरेन्द्र केसीको तर्फबाट केशरमणि अर्याल, लक्ष्मी थापा खड्काथोकी, देवेन्द्रबहादुर थापा, पुरुषोत्तम अर्याल, दामोदर अधिकारी, चिरञ्जीवि जोशी र देवबहादुर महतले बहस गरे ।

अर्का प्रतिवादी रामशरण केसीको तर्फबाट अरुण ज्ञवाली, वरिष्ठ अधिवक्ता बालकृष्ण न्यौपाने र केदार गुरागाईले बहस गरे ।

यतिबेलासम्म ४ बजेर १० मिनेट गएको थियो । त्यसपछि इजलासमा बहस गर्न कुनै पनि अधिवक्ता उपस्थित भएनन् । आइतबारको जस्तै दृश्य सोमबार देखियो । सोमबार जिल्ला न्यायाधीश प्रेमप्रसाद न्यौपाने रिसाएनन् । आइतबार उनी रिसाएका थिए ।

उनले प्रतिवादीहरूको नाम लिएर अधिवक्तलाई बहसमा आउन भने । तर कोही पनि आएनन् । सुरुमा लक्ष्मी महर्जनको तर्फबाट के हुनुहुन्छ भनेर सोधे । महर्जनका तर्फबाट इजलासमा उपस्थित रहेका अधिवक्ता उमेश अधिकारीले अरु अधिवक्ता उपस्थित नभएकाले बहस हुन नसक्ने बताए ।

त्यसपछि न्यायाधीश न्यौपानेले टेकनाथ रिजालको तर्फबाट को हुनुहुन्छ भनेर सोधे । इजलास कक्षमा होहल्ला थियो । उनको तर्फबाट पनि बहस हुन नसक्ने जानकारी गराइयो । रिजालको अधिवक्ता खोज्दा उनी भने आफ्नो सुरमा गफमा व्यस्त थिए ।

त्यसपछि न्यायाधीश न्यौपानेले शमसेर मियाको तर्फबाट बहस गर्ने अधिवक्तालाई बोलाए । आफ्नो नाम सनेपछि मियाले उठेर आफ्नो तर्फबाट बहस हुन नसक्ने बताए । ‘मेरो पालो आज आउँदैन भनेर आउनुभएका अधिवक्ता ज्यूहरू गइसक्नु भयाे । आज हुँदैन भोलि मात्र हुन्छ,’ उनले भने ।

मियाले जानकारी गराएपछि उनको तर्फबाट इजलासमा उपस्थित अधिवक्ता मन्दिरा अधिकारीले भनिन्, ‘रोलक्रम अनुसार भोलि भनेकाले त्यसैअनुसार तयारी गरेका छौं ।’

त्यसपछि अन्य प्रतिवादीले एक स्वरमा भने, ‘आज गर्दा के हुन्छ ? हामीलाई पनि सजिलो हुन्छ ...।’ सानु भण्डारी, केशव दुलाल, सन्देश शर्मा, टंक गुरुङ लगायतका प्रतिवादीले आजै बहस गर्न भनेका थिए ।

इजलासमा न्यायाधीशले समयसीमा सम्झाए । त्यसपछि महर्जनका अधिवक्ता अधिकारीले पोडियममा उभिएर भने, ‘हाम्रोतर्फबाट म मात्र होइन अरु पनि हुनुहुन्छ । आज पालो नआउने भनेपछि उहाँहरू बाहिर हुनुहुन्छ श्रीमान् ।’

आजको इजलास अघि बढ्न नसक्ने देखिएपछि न्यायाधीश न्यौपानेले आफू काम सक्ने ध्याउन्नमा रहेको बताए । ‘आदेश बनाउनै पर्छ म त्यता लाग्छु,’ उनले भने ।

त्यसपछि उनले समयसीमा बारे सूचित गराए । ‘मैले सल्लाह गरेर भोलिसम्मको समयसीमा राखेको हो । भोलिसम्म सक्नपर्छ । बहस गर्न भ्याइँदैन टिपोटबाट अघि बढ्नुपर्छ,’ इजलासको अन्तिममा न्यायाधीश न्यौपानेले भने, ‘टिपोट–सिपोट बनाउने काम गर्दै गर्नू ।’

प्रकाशित मिति: सोमबार, जेठ २९, २०८० २०:३३