खाँणका वकिलको तर्क- कांग्रेस सभापति बन्न सक्छ भनेर जानीबुझी 'इमेज ड्‌यामेज' गर्न खोजियो

खाँणका वकिलको तर्क- कांग्रेस सभापति बन्न सक्छ भनेर जानीबुझी 'इमेज ड्‌यामेज' गर्न खोजियो

A+ A A-

नक्कली भुटानी शरणार्थी प्रकरणमा जिल्ला अदालत काठमाडौंमा थुनछेक बहस चलिरहेको छ । गत मंगलबार सरकारी वकिलको बहस सकिएपछि बुधबारदेखि प्रतिवादीका अधिवक्ताहरूको बहस सुरु भएको थियो । न्यायाधीश प्रेमप्रसाद न्यौपानेको इजलासमा सुनुवाइ भइरहेको यो मुद्दामा मंगलबार प्रतिवादी बालकृष्ण खाँणका अधिवक्ताहरूले बहस गरेका थिए । मंगलबार उनीहरूको बहस नसकिएपछि बुधबार पनि खाँणको तर्फबाट अधिवक्ताहरूले बहस गरेका छन् ।

बुधबार खाँणको तर्फबाट बहस गर्दै पूर्वमहान्यायाधिवक्ता रमण श्रेष्ठले बयान नै नलिएको विषयमा अभियोग लगाइएको तर्क गरे । 'जुनमा बयान लिइएको त्यसमै अभियोग लाग्नुपर्छ । बयान नै नभएको विषयमा अभियोग कसरी लाग्छ ?' श्रेष्ठले भने । उनले यो मुद्दामा एकीकृत कसुर लाग्नै नसक्ने तर्क गरे ।

श्रेष्ठले खाँणको हकमा 'फेयर अनुसन्धान' नभएको जिकिर गरे । '१ करोड २४ लाख ५० हजार कसले दिएको ? केशव दुलाले बयानमा खाँणलाई दिएको हो भनेको छैन,' उनले भने । बयान नगराइएको मुद्दा अदालतमा आउन नसक्ने भन्दै श्रेष्ठले खाँणलाई साधारण तारेखमा छाड्नुपर्ने तर्क गरे ।

खाँणकै तर्फबाट बहस गर्दै वरिष्ठ अधिवक्ता सुरेन्द्र महतोले समाचारमा छापिएकै आधारमा बयान लिइएको तर्क गरे । 'कागज चपाएको भनिएकोमा प्रहरीले विज्ञप्तिमा खण्डन गरिसकेको छ,' महतोले भने ।

पक्राउ परेकै दिन खानतलासी मुचुल्का नउठाइएकोमा महतोले प्रश्न उठाए । 'खानतलासी मुचुल्का अर्को दिन हुन्छ ? पक्राउ परेको दिन कित खानतलासी गरिएन ?' उनले भने । सरकारी दस्तावेजमा अमेरिका लैजाने भन्ने शब्द नै नरहेको उनको जिकिर छ । 'तीन सचिव ३ मन्त्रीको बैठकबाट कुरा अघि बढेको छ,' उनले भने ।

अर्का वरिष्ठ अधिवक्ता गोपालकृष्ण घिमिरेले प्रमाणमा लिइएको कागजमा फरक-फरक मसी रहेको जिकिर गरे । 'यो मुद्दा अनौठो बनेको छ । ल्याप्चे र हस्ताक्षर छैन,' उनले भने, 'हचुवाको भरमा ल्याइएको अभियोगपत्र छ । मन्त्रालय लगेर पैसा बुझाएको भनिएको छ । प्रमाण खै ? सीसीटीभी फुटेज होला, १ करोड बोक्ने झोला ठूलै होला जाँदा बोकेको आउँदा नभएको भन्ने होला नि ?'

खाँणको इमेज ड्यामेज गर्न जानीबुझी जबर्जस्ती अभियोग लगाइएको उनले जिकिर गरे । '(खाँण) पार्टी सभापति बन्न सक्छ भनेर इमेज ड्यामेज गर्न जानीबुझी जबर्जस्ती अभियोग लगाइएको छ,' उनले भने, 'अभियोग लगाएर मात्रै हुन्छ, प्रमाण ल्याउनु पर्दैन ?'

खाँणकै तर्फबाट बहर गरेका ललितबहादुर बस्नेतले पनि हचुवाका भरमा अभियोजन तयार पारिएको जिकिर गरे । 'कार्यदल कहिले गठन भयो भन्नेसम्म सरकारी वकिललाई थाहा छैन ?' उनले भने ।

बहसका क्रममा बस्नेतले प्रयोग गरेका शब्दलाई लिएर न्यायाधीश न्यौपानेले उनलाई सचेत गराएका थिए । 'यो मुद्दामा कति अत्याचार, कति दादागिरी छ भने…!'

बस्नेतले यसो भन्दै गर्दा न्यायाधीश न्यौपानेले उनलाई रोक्दै भने, 'दादागिरी, अत्याचार भन्ने ? दूषित भन्ने होला, भन्नुपर्छ । नमिल्ने शब्द भन्ने ? यस्ता शब्द नबोल्नुस् ।'

न्यायाधीशले सचेत गराएपछि भने बस्नेतले त्यसलाई सुधारेका थिए । 'होइन होइन दूषित श्रीमान् । सरी सरी ।'

खाँणकै तर्फबाट बहस गर्दै पूर्वमहान्यायाधिवक्ता खम्बबहादुर खातीले आफूहरूले अपराधीलाई बचाउन खोज्यो भनेर आलोचना हुने गरेको भन्दै असन्तुष्टि जनाए । 'अपराधीलाई बचाउन उहाँहरूको हात रह्यो भनेर ठूलो फोटो छाप्नुहुन्छ । तीन पूर्वमहान्यायाधिवक्ताको फोटो रहेछ । त्यहाँ कमेन्ट हेर्नै नसकिने रहेछ,' खातीले गुनासो गरे, 'श्रीमान्‌बाट आदेश प्रकाशित नभैसक्दा आदेश छापिन सक्छ ।'

गुनासो गरिसकेपछि खाँणको बचाउमा उत्रिएका खातीले जाहेरवालाले पैसा कसलाई दिएको हो अभियोगपत्रमा नखुलाइएको जिकिर गरे । 'जाहेरवालाले पैसा कसलाई दिए अभियोगपत्रमा खुलाइएको छैन, खाली छ,' खातीले भने ।

खातीले पीडित भनिएकाहरूले गरेको कार्य पनि आपराधिक कर्म रहेको तर्क पनि गरे । 'म नक्कली भुटानी शरणार्थी बनेर अमेरिका जान्छु भन्छ भने त्यो आफैँमा अपराध हो,' खातीले भने, 'त्यसमा अनुसन्धान हुनु पर्दैन श्रीमान् ?'

खातीले खाँणविरुद्ध मुद्दा लाग्नुको रहस्य बुझ्न नसकेको बताए । 'मुद्दा लाग्नुको रहस्य केहो ? बुझ्न सकेको छैन श्रीमान्,' उनले भने, 'अदालतमा मुद्दा विचाराधीन छ । संसदमा सांसदहरू कराको करायै छन् । यसो गर्नुपर्‍यो, उसो गर्नुपर्‍यो भनेका छन् ।'

यससम्बन्धी अरु पनिः