‘न्यायाधीशको टाइम कार्ड’ फेल भएको प्रतिवादीलाई नै दिक्क लाग्ने बहस

A+ A A-

नक्कली भुटानी शरणार्थी प्रकरणमा थुनछेक बहसको शुक्रबार छैटौँ दिन हो । जिल्ला अदालत काठमाडौंमा न्यायाधीश प्रेमप्रसाद न्यौपानेको इजलासमा भैरहेकाे बहसमा शुक्रबारको परिदृश्य फरक देखियााे ।

न्यायाधीशले समयसीमा ख्याल राख्न डेढ घण्टाअघि सूचित गरे । टोपबहादुर रायमाझीको तर्फबाट बहस भए पनि रायामाझी आफैँले बहस पुग्यो पर्दैन भनेर बेन्चतर्फ हातले संकेत गरेर देखाए । तैपनि बहस रोकिएन । अर्का प्रतिवादी बालकृष्ण खाँण पनि दिक्क मान्दै भनिरहेका थिए, ‘बहस लामो भयो ।’ त्यसैमा हो मा हो मिसाउँदै रायमाझीले भने, ‘हो भन्या ....’

साढे तीन बज्दा वरिष्ठ अधिवक्ताहरू रमेश बडाल, सुशील पन्त र पर्शुराम कोइरालाले बसह सकेका थिए । चौँथो क्रममा धर्मराज रेग्मीले बहस गर्न लाग्दा न्यायाधीश न्यौपानले भने, ‘समय व्यवस्थापन गर्नुहोला । ५ बजेभित्र सकौं । शुक्रबार भए पनि प्रक्रिया पूरा गर्नुछ ।’

५ बजेसम्म सात जना अधिवक्ताले बहस गरेका थिए । यसबीचमा आकृती रायमाझी, करुणबहादुर मल्लिक र सुदिग्य रेग्मीले बहस गरेका थिए । सामान्य रुपमा ५ बज्दा इजलास बन्द हुन्थो । तर शुक्रबार अधिवक्ताहरू बहस गर्न लाइनमा थिए ।

त्यसपछि न्यायाधीश न्यौपालेले सोधे, ‘अब कति जना हुनुहुन्छ?’

‘तीन जना श्रीमान्, म त आज थोरै कुरा राख्छु, सन्दिप रायमाझीकोमा पनि छु,’ वरिष्ठ अधिवक्ता ज्ञानेश्वर पराजुलीले भने ।
न्यायाधीशले न्यौपानेले फेरि भने, ‘समयभन्दा बलवान् कोही पनि छैन, समय म्यानेज गर्नुस् ।’

त्यतिबेला प्रतिवादी बालकृष्ण खाँणले सामान्य शैलीमा रायमाझीसँग भनेका भने, ‘बहस लामो भयो ।’

त्यसपछि इजलासमा बहस गर्न पुगिन् अधिवक्ता शोभा पराजुली । उनी रायमाझीको तर्फबाट बहस गर्दै थिइन् । यो बेलासम्म रायमाझीले दिक्क मानिसकेका थिए । उनले बेन्चतर्फ दुई हात क्रस गेर हल्लाउँदै संकेत गरे, ‘भयो पर्दैन ...’ यतिबेला रायमाझीलाइ पट्यार लागेको थियो ।

अधिवक्ता रेग्मीलाई पछाडि बोलाएर रायमाझीले भने, ‘भयो बहस टुंग्याउनुस्, धेरै भयो भने पनि राम्रो हुँदैन ......... ’

पराजुलीको बहस सकिएपछि अर्का अधिवक्ता पुष्पराज पौडेल बहस गर्न पुगे । बहसमा दफा ६७ को कुरा धेरै उठेको थियो ।

नयाँ विषय नआएपछि दिक्क लागेर न्यायाधीश न्यौपानले भने, ‘६७ मात्रै होइन, ६८, ६९ सबै आइसक्यो ......।’

५ बजेर २० मिनेटसम्म बहस गरेपछि बाँकी रहे ज्ञानेश्वर पराजुली । अर्को दिन सन्दिप रायमाझीको तर्फबाट बहस गर्ने र आफ्ना कुरा त्यही राख्ने भनेका पराजुलीलाई न्यायाधीशले नै बहस गर्न बोलाए । पराजुलीले भने, ‘सकियो श्रीमान्, म आज बहस गर्दिनँ । अर्कोमा पनि छु, पर्सि नै गर्छु ।’

न्यायाधीश न्यौपानले भने, ‘होइन आउनुस् न । तपाईं जस्तो अनुभवी मान्छेले बहस गर्नुपर्छ । तपाईंजस्ता अनुभवीको बहसले मलाई आदेश लेख्न सजिलो हुन्छ । तर नयाँ कुरा भन्नुस् । त्यही ठगीका कुरा, त्यही दफाका कुरा त कहाँकहाँ के छ मलाई कन्ठ भइसक्यो । अब त इरिटेसन नै हुन्छ ।’

सैद्धन्तिक कुरा गर्छु भनेका पराजुलीले सिद्धान्तका कुरा बढी रायमाझीका कुरा कम गर्न थाले । यतिबेलासम्म प्रतिवादी खाँणले रायमाझीँग दिक्क मान्दै दोहोर्‍याए, ‘लामो भयो बहस ..’

सँगै रहेका अर्का प्रतिवादी इन्द्रजित राईले भने, ‘फेरि पढाउन थालियो ।’

प्रकाशित मिति: शुक्रबार, जेठ २६, २०८० २२:२०