सातै प्रदेशमा नेपाल लाइफको अभिकर्ता पुनर्ताजगी तथा सम्मान कार्यक्रम, ६ हजारभन्दा बढी प्रशिक्षित

सातै प्रदेशमा नेपाल लाइफको अभिकर्ता पुनर्ताजगी तथा सम्मान कार्यक्रम, ६ हजारभन्दा बढी प्रशिक्षित

A+ A A-

नेपाल लाइफ इन्स्योरेन्स कम्पनीले सातवटै प्रदेशमा अभिकर्ता प्रशिक्षण तथा सम्मान कार्यक्रम सम्पन्न गरेको छ । कार्यक्रममा भारतको मुम्बईबाट जीवन बीमाका अन्तर्राष्ट्रिय ख्यातिप्राप्त प्रशिक्षक तथा सफल जीवन बीमा अभिकर्ता राजेश सतोष्कार र विजयकुमार झाले तालिम प्रदान गरेका थिए ।

सो कम्पनीले कोशी प्रदेशको विर्तामोड र इटहरी, मधेश प्रदेशको वीरगञ्ज र मिर्चैया, बागमती प्रदेशको नारायणघाट, भक्तपुर र काठमाडौं, गण्डकी प्रदेशको पोखरा, लुम्बिनी प्रदेशको बुटवल र नेपालगञ्ज, कर्णाली प्रदेशको सुर्खेत र सुदूरपश्चिम प्रदेशको टीकापुर र अत्तरिया गरी १३ स्थानमा उक्त कार्यक्रम सम्पन्न गरेको हो ।

कार्यक्रममा ६ हजारभन्दा बढी अभिकर्तालाई तालिम प्रदान गर्नुका साथै हरेक शाखा, उप–शाखाबाट उत्कृष्ट व्यवसाय गर्ने करिब १ हजार अभिकर्ताहरुलाई सम्मान गरिएको छ ।

कम्पनीका अनुसार, २०८० साल वैशाख ७ गते बिर्तामोडको सेन्ट्रल पोइन्ट होटल एन्ड पार्टी प्यालेसमा आयोजित कार्यक्रममा ४ सय जना, वैशाख ९ गते इटहरीको दुर्गा पार्टी प्यालेसमा ४ सय ५० जना, वैशाख १४ गते मिर्चैयाको रामजानकी होटल एन्ड पार्टी प्यालेसमा ५ सय ७० जना, वैशाख १६ गते वीरगञ्जको होटल शाह दरबारमा ४ सय ५० जना, वैशाख १८ गते नारायणघाटको सीएमटी रिसोर्टमा ४ सय ६० जना, वैशाख २२ गते भक्तपुरको नमस्ते ब्याङ्क्वेटमा ५ सय जना, जेठ ५ गते काठमाडौंको अनमोल ब्याङ्क्वेटमा ७ सय जना अभिकर्ताहरूले तालिम प्राप्त गरेका छन् ।

त्यसैगरी, जेठ ९ गते सुर्खेतको सिद्धार्थ सन्नी रिसोर्टमा ३ सय ५० जना, जेठ ११ गते नेपालगञ्जको सुनाखरी रेस्टुरेन्टमा ३४० जना, जेठ १३ गते टीकापुरको होटल सिद्धार्थमा ३ सय ६० जना, जेठ १५ गते अत्तरियाको होटल नमस्तेमा ५ सय ५० जना, जेठ २० गते बुटवलको सिद्धार्थ होटलमा ५ सय ५० जना र जेठ २२ गते पोखराको सिटी स्क्वायरमा ४ सय जना गरी कुल ६ हजार ८० जना अभिकर्ताहरूले तालिम प्राप्त गरेको कम्पनीले जनाएको छ ।

त्यस्तै, यही जेठ २२ गते पोखरामा आयोजित कार्यक्रममा यस कम्पनीका सञ्चालक समितिका सदस्य कमलेशकुमार अग्रवाल र विमलप्रसाद ढकालको उपस्थिति थियो । सो अवसरमा अग्रवालले गण्डकी प्रदेशका विभिन्न आर्थिक सूचचांकहरुमा अग्र पंक्तिमा रहेको हुनाले यस क्षेत्रमा बीमा व्यवसायको विस्तार गर्न प्रचुर सम्भावना रहेको बताए ।

अग्रवालले कम्पनीले पोखराको न्युरोडस्थित आफ्नै सुविधासम्पन्न भवनबाट गण्डकी प्रदेशको प्रादेशिक कार्यालय र पोखरा शाखा कार्यालय सञ्चालनमा ल्याइएको जानकारी पनि गराए । यसबाट कम्पनीको विश्वसनीयता बढी बीमा बजारको विकासमा टेवा पुग्ने विश्वास व्यक्त गरे ।

त्यसैगरी कम्पनीका प्रमुख कार्यकारी अधिकृत प्रवीण रमण पराजुलीले अभिकर्ताहरुको क्षमताको विकास गर्ने हेतुले आयोजना गरिने यस्ता कार्यक्रमले बीमा क्षेत्रमा भएका नवीनतम प्रयोगसँग साक्षात्कार गराउन, क्षमता अभिवृद्धि गर्न तथा व्यवसाय विस्तारका लागि उपयोगी सीपहरुलाई थप निखार्न महत्त्वपूर्ण भूमिका खेल्ने बताए ।

पराजुलीले कम्पनीले अभिकर्ताहरुको प्रोत्साहनका निम्ति विभिन्न योजनाहरु सार्वजनिक गर्दै आएको र यस वर्ष पनि आकर्षक योजनाहरु सार्वजनिक भइसकेको हुनाले योजनामा सामेल हुन सम्पूर्ण अभिकर्ताहरुलाई आग्रह पनि गरे । कम्पनीलाई थप सशक्त बनाउन नवीनतम प्रविधिको अधिकतम प्रयोग गर्दै ग्राहकहरुको सेवाको गुणस्तरीयतालाई थप प्रभावकारी बनाउन कम्पनीले समय सुहाँउदो योजना ल्याउने बताए ।

प्रकाशित मिति: बुधबार, जेठ २४, २०८० २०:१४