विद्यालय व्यवस्थापन समितिमा कोरम नपुगेपछि रोकियो अध्यक्ष सूर्य राईको राजीनामा

विद्यालय व्यवस्थापन समितिमा कोरम नपुगेपछि रोकियो अध्यक्ष सूर्य राईको राजीनामा

A+ A A-

बालयौन दुराचार आरोपमा पक्राउ परेका मदन राई संस्थापक रहेको शुभद्रा मदन (शुभम) फाउन्डेसनद्वारा सञ्चालित जनजागृति माध्यमिक विद्यालय व्यवस्थापन समितिकाे आज बाेलाइएकाे बैठक काेरम पुग्न नसकेपछि बस्न सकेन । बैठकमा अध्यक्ष सूर्य राईले राजीनामा दिने तयारी गरेका थिए । बैठक फेरि कहिले बस्ने खुलाइएकाे छैन ।

खाेटाङकाे दिक्तेल, रुपाकोट, मझुवागढी नगरपालिकाले छानबिन समिति गठन गरी काम सुरु गरेपछि बुधबार विद्यालय व्यवस्थापन समितिसमक्ष राजीनामा दिने बताएका थिए । राई अध्यक्ष रहेको सामुदायिक विद्यालय दिरुम वडा नम्बर २ मा छ । व्यावहारिक सिकाइको नारासहित सञ्चालित यो विद्यालय आवासीय सुविधासहितकाे छ । 'सबै व्यस्त हुनुभए छ, कोरम नपुगेकाले बैठक बस्न सकेन', अध्यक्ष राईले भने । आफूले नैतिकता देखाएर राजीनामा दिन लागेको उनको भनाइ छ ।

हिजो भीआईपी, पत्रकारलगायतले भ्रमण गरी तारिफ गरेको स्कुललाई अहिले सबैले दुत्कारेकोमा भने आफूलाई दुःख लागेको उनले बताए । 'मदन राईको मुद्दा एउटा भयो । तर अहिले विद्यालयलाई नै गैरकानुनीजस्तो गरी प्रचार भइरहेको छ, हिजो त्यतिका मान्छे, जो कानुन जानेबुझैकै थिए, उनीहरू आउँदा त तारिफै गरेर गएका थिए, अहिले एकाएका कसरी अवैधानिक भयो आश्चर्यमा छु', उनले भने ।

राई दिक्तेल रुपाकोट मझुवागढी नगरपालिकाको शिक्षा समिति सदस्य पनि हुन् । उनको ठाउँमा विद्यालय व्यवस्थापन समितिको अध्यक्षको जिम्मेवारी हाललाई समितिकै ज्येष्ठ सदस्यले सम्हाल्ने बताइएको छ ।

अध्यक्ष राई सपरिवार उक्त विद्यालयमा बस्दै आएका छन् । उनका दुई छोरा सोही विद्यालयमा पढ्छन् । आफूले बिनापारिश्रमिक सेवा दिइरहेको बताउने राईलाई विद्यालयका सबै छात्रछात्राले ‘अंकल’ भन्छन् ।

सरकारी विद्यालय भए पनि जनजागृति मावि मदन राई संस्थापक रहेको शुभद्रा मदन फाउन्डेसनले नि:सर्त चलाउँदै आएको छ । सम्पूर्ण खर्च पनि शुभमले नै गरिरहेको छ । सोही विद्यालयमा पढेकी एक बालिकाले दिएको जाहेरीपछि समातिएका ७५ वर्षे राईलाई बालयौन दुराचार अभियोगमा प्रहरीले छानबिन गरिरहेको छ । कृषि वैज्ञानिकका रूपमा कहलिएका राई अहिले दिक्तेलस्थित जिल्ला प्रहरी कार्यालयको हिरासतमा छन् ।

प्रकाशित मिति: बुधबार, जेठ १०, २०८० १७:४४