विश्वकप छनोट क्रिकेटका लागि प्रारम्भिक टिमको घोषणा, सन्दीपसहित को-को परे ?

A+ A A-

आईसीसी क्रिकेट विश्वकप छनोटका लागि नेपाली प्रारम्भिक टिमको घोषणा भएको छ । नेपाल क्रिकेट संघ (क्यान) ले २२ सदस्यीय नेपाली क्रिकेट टिमको घोषणा गरेको हो ।

छनोट भएका २२ सदस्यीय नेपाली क्रिकेट टिममा कप्तान रोहित कुमार पौडेलसँग कुशल भुर्तेल, आसिफ शेख, ज्ञानेन्द्र मल्ल, कुशल मल्ल, आफि शेख, दीपेन्द्रसिंह ऐरी, गुल्सन झा, सन्दीप लामिछाने र सोमपाल कामी छन् । त्यस्तै, करण केसी, भीम सार्की, प्रतिश जिसी, ललितनारायण राजवंशी, अर्जुन साउद, सन्दीप जोरा, देव खनाल, किशोर महतो, सूर्य तामाङ, कमलसिंह ऐरी, मौसम ढकाल र अविनाश बोहरा टिममा परेका छन् ।

जिम्बाब्बेमा आउँदो असार ३ देखि २४ गतेसम्म विश्वकप छनोट आयोजना हुँदैछ । आईसीसीले विश्वकप छनोटको खेल तालिका भने सार्वजनिक गरिसकेको छैन । तर, विश्वकप छनोट खेल्ने १० टिमको टुंगो भने लागिसकेको छ । विश्वकप छनोटमा आयोजक राष्ट्र जिम्बाब्बेसँगै नेपाल, दुई विश्वविजेता वेष्ट इन्डिज र श्रीलंका छन् । त्यस्तै, आयरल्यान्ड, नेदरल्यान्ड्स, यूएई, स्कटल्यान्ड, ओमान र अमेरिका छन् ।

नेपाल समूह ‘ए’ मा रहेको छ । नेपालसँगै आयोजक राष्ट्र जिम्बाब्वे यो समूहमा छ । त्यस्तै, वेष्ट इन्डिज, अमेरिका र नेदरल्यान्ड्स छन् । समूह ‘बी’ मा श्रीलंका, आयरल्यान्ड, ओमान, स्कटल्यान्ड र यूएई रहेका छन् ।

समूह ‘ए’ र ‘बी’ का शीर्ष तीनमा पर्ने टिम सुपर सिक्समा पुग्नेछन् । सुपर सिक्सका शीर्ष दुई टिमले अगामी असोज १८ देखि मंसिर ३ गतेसम्म भारतमा विश्वकप क्रिकेटमा भाग लिन पाउने छन् ।

यसरी सम्भव भएको थियो नेपालको विश्वकप छनोट यात्रा

नेपालले आईसीसी क्रिकेट विश्वकप लिग टुका अन्तिम तीन सिरिजमा अविश्वसनीय नतिजा निकाल्दै विश्वकप छनोटमा स्थान बनाएको हो । विश्वकप यात्रामा नेपाली क्रिकेटले उत्कृष्ट प्रदर्शन गर्‍यो । अन्तिम १२ खेलमध्ये ११ खेलमा जित निकाल्नु नेपाली टिमको लागि अहिलेसम्मकै सबैभन्दा ठूलो सफलता हो ।

कीर्तिपुरमा भएको लिग टुको त्रिदेशीय सिरिजमा नामिबिया र स्कटल्यान्डविरुद्ध चारै खेलमा जित निकालेको नेपालले दुबईमा यूएईसँग एक खेलमा हार र एक खेलमा जित निकाल्दा पपुवा न्युगिनीलाई दुवै खेलमा जित निकाल्यो । यसपछि कीर्तिपुरमै भएको लिग टुको अन्तिम सिरिजमा यूएई र पपुवा न्युगिनीलाई हराउँदै नेपालले एकदिवसीय मान्यता कायम राख्दै विश्वकप छनोटमा पुगेको थियो ।

लिग टुबाट स्कटल्यान्ड च्याम्पियन हुँदा ओमान दोस्रो र नेपाल तेस्रो हुँदै विश्वकप छनोटमा पुगेका हुन् । यता, प्लेअफबाट यूएई च्याम्पियन र अमेरिका उपविजेता हुँदै विश्वकप छनोटमा पुग्न सफल भयो । श्रीलंका, वेष्ट इन्डिज, जिम्बाब्बे, नेदरल्यान्ड्स र आयरल्यान्ड सुपर लिगको शीर्ष आठमा पर्न नसकेपछि विश्वकप छनोटमा झरेको हो ।

त्यसो त नेपाली टिम पछिल्लो समय उत्कृष्ट लयमा छ । पछिल्लो आठ ओडीआई खेलमा नेपाल अपराजित रहेको छ । पछिल्लो करिब दुई महिनामा नेपाली क्रिकेटले तीन ठूला उपलब्धिहरू पाएको छ । एकदिवसीय अन्तर्राष्ट्रिय मान्यतालाई कायमै राख्नु, विश्वकप छनोट र एसीसी प्रिमियर कप च्याम्पियन हुँदै एसिया कपमा पुग्नु यो नेपाली क्रिकेटका लागि स्वर्णिम अवसर पनि हो ।

प्रकाशित मिति: सोमबार, जेठ ८, २०८० १८:४७