तीन दलको बैठकपछि सत्ता साझेदार दलहरू छलफलमा

A+ A A-

सिंहदरबारमा तीन दलका शीर्ष नेताहरूको बैठकबाट नेकपा एमालेका अध्यक्ष केपी शर्मा ओली बाहिरिएका छन् । बुधबार दिउँसो सिंहदरबारमा भएको बैठकबाट ओली बाहिरिएपछि सत्ता साझेदार दल कांग्रेस र माओवादी केन्द्रका शीर्ष नेताहरू छलफलमा जुटेका छन् ।

बुधबार दिउँसो सिंहदरबारमा सुरुमा प्रधानमन्त्री पुष्पकमल दाहाल 'प्रचण्ड', नेपाली कांग्रेसका सभापति शेरबहादुर देउवा र एमाले अध्यक्ष केपी शर्मा ओलीबीच छलफल भएको थियो । त्यसपछि उक्त बैठकमा उपप्रधानमन्त्री तथा गृहमन्त्री नारायणकाजी श्रेष्ठ थपिएका थिए ।

उक्त बैठकबाट एमाले अध्यक्ष ओली बाहिरिएपछि उपप्रधानमन्त्री तथा रक्षामन्त्री पूर्णबहादुर खड्का सहभागी भएका छन् ।

नेपाली नागरिकलाई नक्कली भुटानी शरणार्थी प्रकरणमा एकपछि अर्को गर्दै प्रभावशाली नेताहरू मुछिन थालेपछि सिंहदरबारमा नेताहरू तारान्तार छलफलमा जुटेका हुन् । जसका कारण यो भेटवार्तालाई अर्थपूर्ण रूपमा हेरिएको छ ।

यद्यपि, प्रधानमन्त्रीको सचिवालयले भने संसदलाई कसरी प्रभावकारी बनाउने भन्नेबारेमा छलफल केन्द्रित भएको दाबी गर्छ । 'प्रधानमन्त्री पुष्पकमल दाहाल 'प्रचण्ड', नेपाली कांग्रेसका सभापति शेरबहादुर देउवा र नेकपा एमालेका अध्यक्ष केपी शर्मा ओलीबीच प्रधानमन्त्री कार्यालय सिंहदरबारमा छलफल भएको छ । छलफलमा संसदलाई कसरी प्रभावकारी बनाउने भन्नेबारे छलफल भयो,' प्रधानमन्त्रीको सचिवालयले भनेको छ ।

कांग्रेस नेता रमेश लेखकले पनि आगामी बजेट, नीति तथा कार्यक्रमलगायतका विषयमा केन्द्रित भएको छलफल भएको बताएका छन् । तर, नक्कली भुटानी शरणार्थी प्रकरणमा कुनै छलफल नभएको उनको भनाइ छ ।

उता शरणार्थी प्रकरणमा आजै प्रहरीले पूर्वगृहमन्त्रीसमेत रहेका नेपाली कांग्रेसका प्रभावशाली नेता बालकृष्ण खाँणलाई उनकै निवासबाट पक्राउ गरेको छ । त्यस्तै एमाले सचिव (हाल निलम्बित) टोपबहादुर रायमाझीविरुद्ध पक्राउ पुर्जी जारी भएको छ । हाल उनी भने फरार छन् ।

यो प्रकरणमा प्रहरीले अनुसन्धान अगाडि बढाइरहँदा नेताहरूको भेटवार्ता भएको हो । स्रोतका अनुसार बैठकमा समसामयिक राजनीतिक घटनाक्रमका बारेमा छलफल भइरहेको छ ।

प्रकाशित मिति: बुधबार, वैशाख २७, २०८० १६:२७