सञ्चार क्षेत्रको इतिहासमा पहिलोपटक नागरिक दैनिकले आईपीओ जारी गर्दै

A+ A A-

नागरिक दैनिक र रिपब्लिका अंग्रेजी दैनिक प्रकाशन गर्ने नेपाल रिपब्लिक मिडियाले साधारण शेयर (आईपीओ) जारी गर्ने भएको छ । नेपाल रिपब्लिक मिडियाले नेपालको सञ्चार क्षेत्रको इतिहासमा पहिलोपटक आईपीओ जारी गर्न लागेकाे हाे ।

११ वैशाख २०८० मा नेपाल धितोपत्र बोर्डले कम्पनीलाई आईपीओ जारी गर्न स्वीकृति दिएको हो । उक्त दिन मिडियाकाे १५औँ वार्षिकाेत्सव पनि थियाे ।

कम्पनीले जारी पुँजीको ४४.९९ प्रतिशत शेयर जारी गर्न लागेको हो । बोर्डबाट पाएको स्वीकृतिअनुसार कम्पनीले प्रतिकित्ता १ सय रुपैयाँ अंकित दरले ४३ करोड ५३ लाख रुपैयाँबराबरको ४३ लाख ५३ हजार कित्ता आईपीओ निष्कासन गर्नेछ ।

सञ्चारमाध्यमको आवाज पनि जनताको आवाज भएको हरेक सञ्चारमाध्यममा जनताको संलग्नता हुनुपर्छ भन्ने मान्यताले आईपीओ जारी गर्न लागिएको नेपाल रिपब्लिक मिडिया लिमिटेडकी निर्देशक शोभा ज्ञवालीको भनाइ छ । ज्ञवालीले आफूहरूले ३० वर्षअघि नै सञ्चारमाध्यममा जनताको सहभागिता हुनुपर्छ भन्ने धारणा राखेको भए पनि बल्ल अहिले सफल भएको बताइन् ।

शिलापत्रसँग कुराकानी गर्दै ज्ञवालीले भनिन, ‘अरु विभिन्न खाले कम्पनीहरूले जनतालाई सहभागी गराउन थाले जनताका लागि लेखिएको समाचारमा जनताको सहभागिता हुनुपर्छ भनेर हामीले आईपीओ जारी गर्ने निर्णयमा पुुगेका हौँ । अबको केही महिनापछि आईपीओको बिक्री खुला गर्छौं ।’ कम्पनीले २ कात्तिकमा आईपीओ जारी गर्न बोर्डमा आवेदन दिएको थियो । कम्पनीको आईपीओ निष्कासन तथा बिक्री प्रबन्धकमा मेगा क्यापिटल मार्केट्स लिमिटेड नियुक्त भएको छ ।

कम्पनीले सन् २०२१/२२ मा २० करोड ३० लाख रुपैयाँको कारोबार गरेको थियो । रेटिङ एजेन्सी इन्फोमेरिक्स क्रेडिट रेटिङ नेपालका अनुसार सन् २०२०/२१ मा कम्पनीको कारोबार घटेर १७ करोड २० लाख रुपैयाँमा झरेको थियो । सन् २०२०/२१ को तुलनामा कम्पनीको व्यापार बढेको बताइएको छ ।

कम्पनीका अनुसार सन् २०१९/२० मा कम्पनीले २९ करोड ३० लाख रुपैयाँको व्यापार गरेको थियो । आम्दानीको मुख्य स्रोत विज्ञापनमै ठूलो गिरावट आएसँगै कम्पनीको वित्तीय अवस्था धरमराएको रेटिङमा उल्लेख गरिएको छ । कम्पनीले आईपीओ जारी गर्न आईआरएस बी प्लस रेटिङ पाएको छ । कम्पनीले केही महिनाभित्रै साधारण शेयर निष्कासनको तथा बिक्री खुलाउने तयारी गरेको छ ।

कम्पनीले नागरिक र रिपब्लिका दैनिकसँगै परिवार मासिक पत्रिका र नागरिक रेडियो पनि सञ्चालन गरिरहेको छ । साथै, नागरिक न्युज डटकम र रिपब्लिका डटकम अनलाइन संस्करण पनि सञ्चालनमा रहेका छन् । कोरोना महामारीमा लकडाउन सुरु भएसँगै कम्पनीले अंग्रेजी दैनिक रिपब्लिका र मनोरञ्जनात्मक संस्करण शुक्रबार साप्ताहिक बन्द गरेको छ ।

यद्यपि, रिपब्लिका अंग्रेजी दैनिकसँगै प्रकाशन हुने द न्युयोर्क टाइम्स भने नियमित प्रकाशनमा छ । अमेरिकाको द न्युयोर्क टाइम्स प्रकाशनको अवसर कम्पनीले पाएको छ ।

कान्तिपुर पब्लिकेशनबाट अलग भई विनोदराज ज्ञवालीले नेपाल रिपब्लिक मिडिया सुरु गरेका थिए । यो मिडिया कम्पनीमा ज्ञवाली प्रबन्ध निर्देशक छन् भने निर्देशकमा शोभा ज्ञवाली रहेकी छिन् ।

प्रकाशित मिति: बुधबार, वैशाख १३, २०८० १६:१८