मानवअधिकारमैत्री कानून बन्छः सभामुख भण्डारी

A+ A A-

प्रदेश १ का सभामुख प्रदीप भण्डारीले प्रदेशसभाबाट बन्ने कानून मानवअधिकारमैत्री बन्ने बताएका छन ।

अनौपचारिक क्षेत्र सेवा केन्द्र इन्सेक विराटनगरले आज विराटनगरमा आयोजना गरेको ‘नेपाल मानवअधिकार बर्ष पुस्तक २०१९’ को सार्वजनिकीकरण गर्दै उनले प्रदेशसभाले कानून निर्माण गर्दा मानवअधिकारको मर्मलाई समाबेश गर्ने र त्यसको कार्यन्वयन गर्न प्रतिबद्ध रहेको बताएका हुन् । उनले मानवअधिकार लोकतन्त्रको आधार भएको भन्दै लोकतन्त्रमा मात्र मानवअधिकारको संरक्षण र प्रत्याभुती हुने बताए ।

उनले इन्सेकले मानवअधिकार संरक्षणको क्षेत्रमा महत्वपुर्ण भुमिकानिर्वाह गरेको बताउदै बर्ष पुस्तक सङग्रहणीय रहेको बताए । त्यस्तै प्रदेशसभा सदस्य सावित्रा रेग्मीले अन्य अधिकार संगै खाद्य अधिकारलाइपनि ध्यान दिन जरुरी रहेको धारणा राखिन् । उनले खान पाउने अधिकार अहरणीय, अभिभाज्य रहेकोले खाद्य सम्प्रभुता कानूनमा उल्लेख भएको भन्दै ब्यक्तिले खानै नपाए अन्यअधिकारको कुनै अर्थ नहुने जिकिर गरिन् ।

यसैगरी अधिकारकर्मी रेणु अधिकारीले मानवअधिकार उल्लंघन महिलाका लागि घरभित्र र सबैकालागि नीजि व्यापारिक क्षेत्र चुनौती रहेको बताइन । मोरङका प्रमुख जिल्ला अधिकारी रमेश केसीले इन्सेकले गर्ने खबरदारी र बर्ष पुस्तक प्रकाशनले मानवअधिकारको अबस्था विश्लेषण गर्दै नीति निर्माण र शासन सुधारमा सहयोग पुग्ने बताए ।

मोरङ प्रहरी प्रमुख एसपी मनोज केसीले मानवअधिकार उल्लंघनको कुरा आउँदा प्रहरी जोडिने गरेको भन्दै अनुसन्धानका क्रममा होस वा अन्य अवस्थामा प्रहरीले कानूनभन्दामाथि नगएको बताए । उनले प्रहरी भित्रपनि तालिम र अभिमूखीकरण कार्यक्रमहरु सञ्चालन गर्दै गएका कारण पहिले भन्दा धेरै सुधार भएको बताए ।

इन्सेक प्रदेश कार्यालय विराटनगरका संयोजक सोमराज थापाले इन्सेकले बर्षमा चार पटक सम्म सरोकारवाला राखेर छलफल गर्ने गरेको जानकारी दिए ।
सो अवसरमा प्रदेश १ मा उत्कृष्ट कार्य गरेको भन्दै पाचथर जिल्ला प्रतिनिधि मंगल बेघालाई ७ हजार नगद सहित सम्मान गरिएको थियो ।

प्रकाशित मिति: बुधबार, फागुन ८, २०७५ ०३:५०