नेपाली वैज्ञानिक प्रतिभा पाण्डेलाई श्रीलंकामा प्रतिष्ठित दुई अन्तर्राष्ट्रिय अवार्ड

नेपाली वैज्ञानिक प्रतिभा पाण्डेलाई श्रीलंकामा प्रतिष्ठित दुई अन्तर्राष्ट्रिय अवार्ड

A+ A A-

नेपाली वैज्ञानिक डा. प्रतिभा पाण्डेले हालै मात्र श्रीलंकामा दुई प्रतिष्ठित अन्तर्राष्ट्रिय अवार्ड जितिन् । हर्बेदा बोटानिकल्सकी सीईओ पाण्डेले श्रीलंकामा सन् २०२२ को 'सार्क गोल्ड अवार्ड' र 'सार्क राष्ट्रकै उत्कृष्ट महिला उद्यमी उपाधि' जितेकी हुन् । यसअघि सन् २०१९ मा उनले ओडब्लूएसडी अवार्ड जितेकी थिइन् ।

'अन्तर्राष्ट्रिय फाेरममा नेपालकाे प्रतिनिधित्व गर्दै सम्मान तथा प्राेत्साहन मिल्दा खुसी छु, साथै अझै प्रभावकारी काम गर्न हाैसला पनि मिलेकाे छ', उनले भनिन् ।

श्रीलंकामा नेपालबाट यस्ताे अवार्ड हात पार्ने उनी प्रथम उद्यमी हुन् । श्रीलंकाको महिला उद्योग र वाणिज्य चेम्बर (डब्लूसीआईसी) ले हरेक वर्ष आवेदन माग्ने, तीमध्ये मनोनयनमा परेकाहरूसँग लामो अन्तर्वार्ता, उनीहरूको कम्पनीको लेखापरीक्षण र प्रभाव अध्ययन गरेपछि विजेता घोषणा गर्ने गर्छ ।

'आवेदकहरू चरणबद्ध अन्तर्वार्ता, त्यसपछि कम्पनीको अडिट रिपोर्ट विश्लेषणलगायतका प्रक्रियाबाट विजेता छनोट गरिन्छ,' उनले भनिन्, 'उद्यमशीलतामा अघि रहेका देशका माझ नेपाली उद्यमी महिलाले पुरस्कार पाउनुका केही कारणमा सीमेत स्रोत र उद्यमशीलताका लागि प्रतिकूल वातावरण हुँदा पनि विज्ञान प्रविधिको समुचित प्रयोग, मौलिक ज्ञान र नेपाली जडिबुटीलाई मूल्य शृङ्खलामा वृद्धि तथा अन्तर्राष्ट्रिय स्तरको उत्पादन गर्न सफल हुनु हो ।'

प्रतिष्ठित अन्तर्राष्ट्रिय अवार्ड भित्र्याउने आठ महिला वैज्ञानिक

विजेता छनोट गर्दा युनिलिभर, विश्व बैंक र बैंकिङ क्षेत्रका दिग्गज व्यक्ति र विज्ञहरूले सयौँ क्षमतावान् उद्यमीहरूको परीक्षा लिएका थिए । तिनैमध्ये पाण्डे गत ११ जनवरीमा श्रीलंकाको राजधानी कोलम्बोमा दुई अन्तर्राष्ट्रिय अवार्डबाट सम्मानित भएकी थिइन् ।

त्यहाँका राष्ट्रपति रनिल विक्रमासिंघे र श्रीलंकाका लागि नेपाली राजदूत बासुदेव मिश्रले पाण्डेलाई पुरस्कार हस्तान्तरण गरेका थिए । युवा वैज्ञानिक उद्यमी पाण्डेकाे हर्बेदा बोटानिकल्स छाला र त्वचा तथा स्वास्थ लाभ सम्बन्धित उत्पादन गर्ने कम्पनी हो । कम्पनीले परम्परागत र स्वदेशी औषधीय ज्ञान र छाला हेरचाहमा नवीनतम वैज्ञानिक आविष्कारहरू प्रयोग गरी उच्च प्रभावकारी उत्पादनहरूको बजारीकरण गर्दछ ।

सन् २०१९ मा जितेकी थिइन् ओडब्लूएसडी अवार्ड

सन् २०१९ मा नेपालबाट नास्टकी वैज्ञानिक डा. टिस्टा प्रसाईं जोशी र डा. पाण्डेले ५० हजार डलरकाे ओडब्लूएसडी अवार्ड जितेकी थिए । काठमाडौंको सेन्ट जेभियर्स स्कुलहुँदै अमेरिकाको नर्थ वेस्टर्न युनिभर्सिटीबाट सन् २०१३ मा ‘नानोटेक्नोलोजी केमेस्ट्री’ मा उनले विद्यावारिधि गरेकी छन् ।

उम्दा वैज्ञानिक पाण्डेले सन् २०१९ मै नास्टबाट 'नबिल नास्ट साइन्स एण्ड टेक्नाेलाेजी अवार्ड' पाएकी थिइन् । उनले खेर गइरहेका अमिला फलहरूबाट दबाई बनाउने प्रविधि विकास गरेकी छन् ।

प्रकाशित मिति: मंगलबार, चैत २८, २०७९ १४:३९