श्रेष्ठ र पोखरेलले प्यानल सहित प्रतिष्पर्धा गर्ने

A+ A A-

कानुन व्यवसायीहरुको छाता संगठन नेपाल बार एशोसिएसनको नयाँ नेतृत्व चयनका लागि निर्वाचनको प्रक्रिया सुरु भएको छ । आज निर्वाचनको कार्यतालिका अनुसार उम्मेदवारहरुले मनोनयन दर्ता गरिएको छन् ।

सत्तारुढ नेपाल कम्युनिष्ट पार्टी (नेकपा) निकट कानुन व्यवसायी र प्रमुख प्रतिपक्ष दल नेपाली कांग्रेस निकट कानुन व्यवसायीहरुले प्यानलनै बनाएर उम्मेदवारी दिएका हुन । सत्तारुढ नेकपा निकट कानुन व्यवसायीको संगठन नेपाल लयर्स एशोसिएसन (एनएलए)को तर्फबाट वरिष्ठ अधिवक्ता चण्डेश्वर श्रेष्ठले नेपाल बार एशोसिएशनको अध्यक्ष पदमा उम्मेदवारी दर्ता गराएका छन् ।

त्यस्तै कांग्रेस निकट कानुन व्यवसायीको संगठन डेमोक्र्याटिक लयर्स एशोशिएसन (डिलए)को तर्फबाट अधिवक्ता सुनिलकुमार पोखरेलले अध्यक्ष पदमा उम्मेदवार मनोनयन गराएका छन् । आ–आफ्नो प्यानलसहित उम्मेदवार दर्तापछि अध्यक्ष पदका उम्मेदवारहरुले न्यायपालिका भित्रको भ्रष्टाचारलगायतका विकृति र विसंगतिको अन्त्य गर्ने प्रतिवद्धता व्यक्त गरे ।

एनएलएको तर्फबाट अध्यक्षको उम्मेदवारी दिएका वरिष्ठ अधिवक्ता श्रेष्ठले नेपाल बार एशोसिएशनलाई सबल बनाउन आफूले प्यानलसहित उम्मेदवारी दिएको स्पष्ट पारे । त्यस्तै डिएलएका तर्फका अध्यक्षको उम्मेदवार बन्नु भएका पोखरेलले स्वतन्त्र न्यायालयको गरिमालाई बचाउन आफूले प्यानलसहित उम्मेदवारी दिएको बताए ।

नेपाल बार एशोसिएशनको नयाँ नेतृत्वका लागि आगामी चैत्र १६ गते शनिबार काठमाडौंमा निर्वाचन हुँदैछ ।