१६ वर्षअघि मध्यबानेश्वरमा यसरी मारिएका थिए डाक्टर चित्रकार, प्रहरी ‘क्लु’ कै खोजीमा

१६ वर्षअघि मध्यबानेश्वरमा यसरी मारिएका थिए डाक्टर चित्रकार, प्रहरी ‘क्लु’ कै खोजीमा

A+ A A-

११ भदौ २०६३ को साँझ ८ बजेर १५ मिनेट गएको थियो । सधैँझैँ काठमाडौं महानरपालिका- ३४ मध्यबानेश्वर पञ्चकुमारीमार्गका ५५ वर्षीय डा. कपिल चित्रकार महाबौद्धस्थित आरोग्य क्लिनिकबाट घर फर्किए ।

बा२प ३५३० नम्बरको मोटरसाइकलमा घर फर्किएका चित्रकारको साथमा श्रीमती सरिता चित्रकार पनि थिइन् । घर पुग्दा उनको गेट बन्द थियो ।

चित्रकारको घरमा काम गर्न राखेकी पम्फा थापालाई उनीहरूले गेट खोल्न लगाए । चित्रकारकी श्रीमती सरिता गेट खुल्नासाथ भित्र छिरिन् । त्यही बेला कपिलको मोबाइलमा फोन आयो ।

चित्रकार मोबाइलमा कुरा गर्दै थिए । त्यही समयमा कपिलको घरको गेटबाट कालो कपडा लगाएका मंगोलियन अनुहारका अज्ञात व्यक्ति कम्पाउण्डभित्र छिरे ।

कम्पाउण्डभित्र छिरेका ती अज्ञात व्यक्ति कपिलसँग विवाद गर्न थाले । विवादकै बीच कपिललाई अज्ञात व्यक्तिले अन्धाधुन्ध खुकुरी प्रहार गर्न थाले ।

कपिलले गुहार मागे, ‘मलाई नहान्नुहोस् बचाउनुहोस् ।’ त्यो बेला कपिलकी श्रीमती घरभित्र छिरिसकेकी थिइन् । श्रीमान् कपिल अर्धचेत र रक्ताम्य भएर ढलेपछि उनी भित्रबाट कपिल भएको ठाउँमा पुगिन् । तर, उनी अचेत अवस्थामा थिए ।

कपिललाई उनले तत्कालै ट्याक्सीमा राखेर ललितपुरस्थित बीएण्डबी अस्पताल पुर्‍याइन् । तर, डाक्टरले उनलाई मृत घोषित गरिदिए । कपिल आफ्नो घर कहिल्यै नफर्किने गरी अस्ताए ।

कपिललाई त्यसरी अन्धाधुन्ध खुकुरी प्रहार गरी गर्ने व्यक्ति भने भागे । १६ वर्षअघि कपिलकै घरको कम्पाउन्डभित्र छिरेर खुकुरी प्रहार गर्ने व्यक्ति को थिए ? अझै पत्ता लागेको छैन ।

१६ वर्ष पुग्दा पनि चित्रकार परिवार न्यायको खोजीमा छ । प्रहरीले कपिलको हत्या भएको केही समयसम्म स्केच बनाएर खोजी गरेको थियो । तर, पत्ता भने लगाउन सकेको छैन । त्यसयता प्रहरीले कपिलको हत्या अनुसन्धान फाइल थन्क्याएर राखेको छ । कपिलको हत्या अनुसन्धान फाइल प्रहरीको केन्द्रीय अनुसन्धान ब्युरो (सीआईबी) र प्रहरीको अपराध अनुसन्धान कार्यालय बानेश्वरमा थन्किएको छ ।

योबीचमा दुवै प्रहरी कार्यालयले केहीलाई सोधपुछका लागि बोलाएको पनि छ । तर, हत्याको कुनै क्लु भने फेला पार्न सकेको छैन । अनुुसन्धानमा खटिएका एक प्रहरीका अनुसार डा. कपिलको हत्या अनुसन्धान अब जटिल बन्दै गएको छ । ‘हामी भन्नलाई त अनुसन्धान अझै जारी नै छ भन्छौँ । तर, पत्ता लाग्न कठिन छ,’ ती अधिकारीले भने ।

उसो त पछिल्लो समय जघन्य अपराधको अनुसन्धान गर्न स्थापना गरिएका ब्युरोहरू नै भुत्ते बन्दै गएका छन् । पछिल्लो समय सीआईबी नै प्रहरीको सामान्य युनिटजस्तै बन्दै गएको छ ।

उपत्यका अपराध अनुसन्धान कार्यालयका प्रवक्ता एसपी कृष्ण कोइरालाले भने लामो समयसम्म सुल्झाउन नसकेका अपराधहरूका पछि विभिन्न कारण हुने हुँदा प्रहरीलाई अनुसन्धान गर्न केही समस्या हुने स्वीकार गर्छन् ।

उनी भन्छन्,‘ प्रहरी सधैँ पत्ता नलागेका घटनाहरूका बारेमा केही नयाँ तथ्य र प्रमाणहरू फेला पर्छ कि भनेर लागि नै रहेको हुन्छ । विभिन्न व्यक्तिलाई सोधपुछ गरिनै राखेका हुन्छौँ । तर, पुराना घटनाहरूमा त्यो बेलाको घटनास्थलको अवस्था र पर्याप्त प्रमाणको अभावमा लामो समयपछि फेरि नयाँ ढंगबाट अनुसन्धान गर्नुपर्ने हुँदा समस्या आउने गर्छ ।’

ज्यान मुद्दामा प्रहरीले २० वर्षसम्म अनुसन्धान नियमित रूपमा गर्न पाउने कानुनी व्यवस्था छ । २० वर्ष पूरा भएपछि भने प्रहरीले अनुसन्धान प्रतिवेदन सरकारी वकिलको कार्यालय पेस गर्नुपर्ने हुन्छ ।

यो पनि...

शृंखला- ४ दिवाकर चन्द हत्या प्रकरण: महत्त्वपूर्ण 'क्लु' पाउँदा पनि हत्यारासम्म पुग्न सकेन प्रहरी
शृंखला-३ सई कार्की हत्या प्रकरण: श्रीमती रञ्जुकै भूमिका शंकास्पद, किन दिइन् फरक-फरक बयान ? (बयानसहित)
शृंखला-२: सई कार्कीको आफ्नै घरभित्र हत्या भएको १६ वर्ष बित्यो, प्रहरीले अझै सकेन अनुसन्धान
शृंखला-१: अपराध अनुसन्धानमा प्रहरीको साख धूमिल पारेकाे निर्मला हत्या प्रकरण

प्रकाशित मिति: बुधबार, माघ १८, २०७९ ०६:३९