दिवाकर चन्द हत्या प्रकरण: महत्त्वपूर्ण 'क्लु' पाउँदा पनि हत्यारासम्म पुग्न सकेन प्रहरी

दिवाकर चन्द हत्या प्रकरण: महत्त्वपूर्ण 'क्लु' पाउँदा पनि हत्यारासम्म पुग्न सकेन प्रहरी

A+ A A-

१७ असोज २०६९ मा पूर्वराजा त्रिभुवन शाहका पनातिनी ज्वाइँ दिवाकर चन्दको शव फेला पर्‍यो । चन्दको शव आधा सडेको अवस्थामा ललितपुरको धोवीघाटस्थित एक घरको फ्ल्याटमा फेला परेको थियो । फ्ल्याटको बाहिरी ढोका भने बन्द थियो । कोठाभित्र शव सड्ने अवस्थामा पुगेको र बाहिरबाट कोठा बन्द हुनुले चन्दको हत्या गरिएको हुन सक्ने आशंका प्रहरीको छ ।

चन्दको शव भेटिएको ‘क्राइम सिन’ले पनि चन्दको हत्या भएको पुष्टि गर्ने प्रशस्त आधार रहेको अनुसन्धानमा खटिएका एक प्रहरी अधिकारीको दाबी छ । उनी भन्छन्, ‘चन्दको हत्या शव फेला पर्नु एक हप्ताअघि भएको जस्तो देखिन्थ्यो । घाँटीमा तारले कसेर हत्या गरेको देखिन्छ । चन्दको कोठाको दराजमा राखिएका सामान खोतलिएका थिए । केही कागजपत्र लिएको जस्तो पनि देखिन्थ्यो । बाहिरबाट कोठा बन्द गरिएको थियो । चन्दले बोक्ने मोबाइल फोन थिएन ।’

ती प्रहरी अधिकारी चन्दको योजनाबद्ध तरिकाले हत्या गरिएको दाबी गर्छन् । ‘चन्दसँग काठमाडौं प्रशस्त सम्पत्ति थियो । केही सम्पत्तिबारे विवाद पनि देखिन्छ । त्यही कारण उनको योजनाबद्ध तरिकाले हत्या गरिएको हो । चन्द र उनकी श्रीमती रजनी चन्दबीच पनि सम्बन्धविच्छेद भएको थियो । शंका गर्ने ठाउँ धेरै छन्,’ ती प्रहरी अधिकारीले भने ।

प्रहरीले चन्द हत्या प्रकरणमा मुख्यत: श्रीमतीसँगको सम्बन्धविच्छेद, आर्थिक कारण र परस्त्रीसँगको सम्बन्धबारे अनुसन्धान थालेको छ । प्रहरीको अनुसन्धानले चन्दको कोठामा दर्जनौँ महिलाको आवत-जावत हुने गरेको तथ्यसमेत फेला पारेको थियो ।

यी तीनवटै कारणबारे विश्लेषण गरेको प्रहरीले आर्थिक कारण प्रमुख हुन सक्ने दाबी गरेको छ । यद्यपि, राजपरिवारका नादेतार चन्दको हत्या भएको १० वर्ष पूरा भइसक्दा पनि हत्यारा पत्ता लगाउन अझै प्रहरी चुकेको छ । चन्द हत्याको अनुसन्धानमा जिल्ला प्रहरी परिसर लालितपुर, उपत्यका अपराध अनुसन्धान कार्यालय र प्रहरीको केन्द्रीय अनुसन्धान ब्युरो (सीआईबी) को टोलीले अहिले पनि अनुसन्धान गरिरहेका छन् ।

यो पनि शृंखला-३ : सई कार्की हत्या प्रकरण: श्रीमती रञ्जुकै भूमिका शंकास्पद, किन दिइन् फरक-फरक बयान ? (बयानसहित)

पछिल्लो समय ललितपुर प्रहरी र सीआईबीले १ नम्बरमा राखेर चन्द हत्याबारे अनुसन्धान थालेको सीआईबी स्रोतको भनाइ छ । हत्या अपराधको घटना तत्काल नसुल्झिए प्रहरीले २० वर्षसम्म नियमित अनुसन्धानमै राख्ने गर्छ ।

प्रहरीले भेटेको त्यो महत्त्वपूर्ण ‘क्लु’

पुर्ख्यौली घर बैतडी भएका दिवाकर चन्द काठमाडौंमै हुर्किए । शाही परिवारकी सदस्य रजनी शाहसँग बिहे गरेपछि उनी काठमाडौंको छाउनी बस्दै आएका थिए । पञ्चायतकालमा रानी ऐश्वर्याको अध्यक्षतामा गठित सामाजिक सेवा राष्ट्रिय समन्वय परिषद् (हाल समाज कल्याण परिषद्) को सदस्य-सचिव भएर काम गरेको अनुभव उनीसँग थियो ।

तर, परस्त्रीसँगको लसपसका कारण उनको श्रीमतीसँग सम्बन्धविच्छेद भयो ।त्यसपछि २०६९ सालतिर उनी धोवीघाटमा फ्ल्याट भाडामा लिएर बस्न थाले । प्रहरीको अनुसन्धानबाट उनको फ्ल्याटमा दर्जनौँ महिलाको आवजावत हुने गरेको समेत खुलेको थियो ।

हत्या भएको भनिएको दिनसमेत केही महिला उनको कोठामा पुगेको खुलेको थियो । चन्द हत्या प्रकरणमा ५० जनाभन्दा बढी महिलामाथि प्रहरीले अनुसन्धान र सोधपुछ गरेको छ । प्रहरीले चन्दको अनुसन्धानलाई तीव्रता दिएको बेला अचानक चन्दले बोक्दै आएको मोबाइल सक्रिय भयो । अनुसन्धानमा खटिएका प्रहरी हौसिए ।

जो प्रहरीका लागि चन्दको हत्यारासम्म पुग्ने महत्त्वपूर्ण क्लु हुन सक्थ्यो । मोबाइल धादिङमा सक्रिय थियो । प्रहरीको अपराध महाशाखाको टोली रातारात धादिङ पुग्यो । मोबाइल प्रयोग गर्ने व्याक्तिलाई प्रहरीले सोधपुछका लागि नियन्त्रणमा लिएर काठमाडौं ल्यायो । उनी सामान्य किसान थिए । उनले मोबाइल भाइबुहारी रुविना भण्डारीले आफूलाई दिएको र काठमाडौंका बारेमा आफूलाई केही थाहा नभएको बयान प्रहरीलाई दिए ।

प्रहरीले रुविना भण्डारीलाई सोधपुछका लागि नियन्त्रणमा लियो । उनी सातदोबाटोमा तरकारी पसल सञ्चालन गरेर बसेकी थिइन् । उनले मोबाइल आफूले जेठाजूलाई दिएको स्वीकार गरिन् । उनले प्रहरीलाई दिएको बयानमा भनेकी छिन्, ‘मेरो श्रीमान् ईश्वर भण्डारीले उक्त मोबाइल सातदोबाटोको नालीमा भेटेर ल्याउनुभएको हो । चन्द हत्याबारे हामीलाई केही थाहा छैन । मेरो श्रीमान् वैदेशिक रोजगारीका लागि दुबई जानुभएको छ ।’

प्रहरीले रुविना भण्डारीलाई भने नियन्त्रणमा राखेर निरन्तर सोधपुछ गर्‍यो । उनका श्रीमान् ईश्वरलाई सोधपुछका लागि नेपाल फर्काउन बारम्बार अनुरोध र दबाब दुवै दियो प्रहरीले । रुविनालाई प्रहरीले थुनामै राखेर दबाब दिँदासमेत ईश्वर दुबईबाट नेपाल फर्किन मानेनन् ।

उनी चन्दको हत्या भएको केही दिनपछि दुबई उडेका थिए । प्रहरीले रुविनालाई करिब एक महिना थुनामा राखेर अनुसन्धान गर्‍यो । तर, मोबाइल श्रीमान्‌ले भेटेर ल्याएको बाहेक अरु केही खुलेन । प्रहरी बाध्य भएर रुविनालाई छोड्न पुग्यो । उता रुविनाका श्रीमान् ईश्वर भण्डारी भने नेपाल फर्किएनन् ।

प्रहरीले भण्डारीलाई नेपाल झिकाउन प्रहरीको अन्तर्राष्ट्रिय संगठन इन्टरपोल गुहार्नुपर्‍यो । १५ माघमा २०६९ मा भण्डारीलाई इन्टरपोलले डिफ्युजन नोटिस जारी गरेपछि चार महिनापछि उनी नेपाल फर्किन बाध्य भए । भण्डारीलाई अपराध महाशाखाको टोलीले त्रिभुवन विमानस्थलबाट सिधै महाशाखाको कार्यालय हनुमानढोका लगेको थियो । भण्डारीले प्रहरीलाई उक्त मोबाइल सातदोबाटोकै नालीमा भेटेको बयान दिए ।

उनले प्रहरीसँगको बयानमा भनेका छन्, ‘सातदोबाटोमा मेरो बेल्ट पसल थियो । राति हिँड्दै जाँदा हातमा बोकेको बेल्ट नालीमा खस्यो । टर्च लाइट बालेर हेर्दा नालीमै बेल्टसँगै मोबाइल पनि भेटे । त्यही मोबाइल कोठामा लिएर राखेको हुँ । चन्द हत्याबारे मलाई केही थाहा छैन ।’

यो पनि शृंखला-२: सई कार्कीको आफ्नै घरभित्र हत्या भएको १६ वर्ष बित्यो, प्रहरीले अझै सकेन अनुसन्धान

प्रहरीले उनीमाथि सोधपुछ जारी नै राख्यो । महाशाखाको टोलीले उनलाई थुनामा राखेर अनुसन्धान गर्ने तयारी थालेको थियो । तर, माहाशाखामाथि भण्डारीलाई हाजिरी जमानीमा छोडेर अनुसन्धान गर्न विभिन्न शक्तिकेन्द्रमार्फत चर्को दबाब आयो ।

भण्डारीलाई भेट्न त्यो बेला माओवादी केन्द्र धादिङका नेता शालिकराम जम्मकट्टेल आफैँ हनुमानढोका पुगेको एक प्रहरी अधिकारी बताउँछन् । ईश्वर भण्डारीलाई भने धादिङकै प्रभात किरण सुवेदीले जमानीमा लिएको प्रहरीको अनुसन्धान फाइलमा देखिन्छ ।

त्यसयता भने चन्द हत्याको अनुसन्धानमा प्रहरीले कसैलाई पक्राउ गर्न सकेको छैन । अनुसन्धानमा खटिएका प्रहरी अधिकारीका अनुसार धादिङका ईश्वर भण्डारीमाथि नै अझै आशंका गर्ने ठाउँ छन् । ती अधिकारी भन्छन्, ‘हत्या गरिएका चन्दको मोबाइल ईश्वर भण्डारीले भेट्नु । चन्दको हत्या भएको दिन ईश्वरको मोबाइलको ‘बीटीएस’ धोवीघाट क्षेत्रमै सक्रिय हुनुले उनीमाथि शंकाको सुविधा दिन्छ ।’ चन्दको मोबाइलसमेत सातदोबाटो नै पुगेपछि ‘अफ’ भएको देखिएको ती अधिकारीले बताए ।

यस्तो छ चन्दको जग्गा विवाद

प्रहरीले चन्दको हत्याबारे उनको जग्गा विवादलाई समेत प्रमुख कारण मानेको छ । लाजिम्पाटस्थित उत्तरढोकाको तल्कालीन कन्ट्री भिल्ला होटलसहितको जग्गा नेपाल इन्भेस्टमेन्ट बैंकमा उनले धिताेमा राखेका थिए । उक्त जग्गा बैंकले लिलाम गर्ने अवस्था पुगेपछि उनले विभिन्न शक्तिकेन्द्र गुहार्न पुगेका थिए ।

त्योबाहेक चन्द परिवारको नुवाकोटको तत्कालीन थानसिंह गाविस-१ मा रहेको जग्गाको विवादसमेत चर्चामा थियो । चन्द परिवार र डा. सूर्यबहादुर कार्कीको नुवाकोटको ३ सय ५६ रोपनी जग्गा माओवादीले द्वन्द्वकालमा कब्जा गरेको थियो ।

उक्त जग्गा किनबेचमा दाङका टपेन्द्र योगी सक्रिय थिए । चन्द परिवारसँग नजिकका योगीमाथि र उक्त जग्गाबारे अनुसन्धान गरेको सीआईबीले त्रिवि शिक्षण अस्पतालमा कार्यरत डाक्टरदेखि एक मन्त्रालयका नायब सुब्बा र माओवादी केन्द्रकै एक शीर्ष नेतासम्म अनुसन्धान गर्ने अवस्थामा पुगेको सीआईबी स्रोतको भनाइ छ ।

उता ईश्वर भण्डारीलाई छुटाउन माओवादीका शालिकराम जम्कट्टेल पुग्नु र यता जग्गाकाे विवादबारे अनुसन्धान गर्दा माओवादी केन्द्रकै एक शीर्ष नेतासम्म सोझिनुले चन्द हत्या अनुसन्धान राेकिएकाे केही प्रहरी अधिकारी नै बताउँछन् ।

यो पनि शृंखला-१: अपराध अनुसन्धानमा प्रहरीको साख धूमिल पारेकाे निर्मला हत्या प्रकरण

प्रकाशित मिति: शुक्रबार, मंसिर १६, २०७९ १३:१५