सई कार्कीको आफ्नै घरभित्र हत्या भएको १६ वर्ष बित्यो, प्रहरीले अझै सकेन अनुसन्धान

सई कार्कीको आफ्नै घरभित्र हत्या भएको १६ वर्ष बित्यो, प्रहरीले अझै सकेन अनुसन्धान

A+ A A-

नेपाल प्रहरीले केही ठूल्ठूला अपराधको सफल अनुसन्धान गरेको छ । ‘विकिनी किलर’ भनेर चिनिने चार्ल्स शोभराज पक्राउदेखि चर्चित रानीबारी हत्याकाण्डका हत्यारा पक्रिनु नेपाल प्रहरीको ठूलो सफलता थियो ।

तर, पछिल्लो सयम सुल्झाउन नसकेको घटना हो, कञ्चनपुरकी बालिका निर्मला पन्त बलात्कार र हत्या प्रकरण । यो घटनामा संलग्न अपराधी पक्राउ गर्न नसक्दा प्रहरी संगठन नै बदनाम हुनपुग्यो । यसरी प्रहरीले लामो समय लगाउँदा पनि प्रहरीले सुल्झाउन नसकेका अपराधका घटनाबारे शिलापत्रले श्रृंखलाबद्ध रूपमा लेख्ने प्रयास गरेको छ ।

पहिलो श्रृंखलामा निर्मला पन्तबारेको समाचार प्रकाशित गरेका थियौं । दोस्रो श्रृंखलामा हामीले प्रहरी अधिकारीकै हत्या भएको १६ वर्ष हुँदा पनि नसुल्झेको घटना खोतल्ने जमर्को गरेका छौँ ।

२० मंसिर २०६३ मा काठमाडौंको गोठाटारस्थित आफ्नै घरमा बसिरहेका थिए– प्रहरी नायब निरीक्षक (सई) कुबेरविक्रम कार्की । बेलुकीपख अपरिचित दुई व्यक्ति कार्कीको घरभित्र छिरे । उनीहरूले कार्कीलाई पछि घरबाहिर घिसारेर ल्याएर खुकुरी प्रहार गरे । खुकुरी प्रहारबाट गम्भीर घाइते भएका कार्कीलाई उनका परिवारले तत्कालै मेडिकल कलेज सिनामंगल पुर्‍याए ।

तर, उनको उपचारका क्रममा मृत्यु भयो । हालसम्म आफ्नै कर्मचारी कार्कीमाथि खुकुरी प्रहार गरेर कसले किन हत्या गर्‍यो भन्ने पत्ता लगाउन प्रहरीले सकेको छैन । कार्कीको हत्या भएको १६ वर्ष वित्दा पनि प्रहरीको ‘रेडिमेट’ जवाफ आउँछ- 'अनुसन्धान जारी छ । केही अपराधका घटना सुल्झिन समय लाग्छ । प्रहरीले अनुसन्धान गर्नै छाड्यो भन्ने हुँदैन ।' कार्कीको हत्या अनुसन्धान त्यहीबेलादेखि प्रहरीको केन्द्रीय अनुसन्धान ब्युरो (सीआईबी) र प्रहरीको उपत्यका अपराध अनुसन्धान कार्यालयले गरेको थियो । तर, दुवै कार्यालयले अहिलेसम्म घटना सुल्झाउन सकेका छैनन् । कार्की पूर्वगृहमन्त्री खुमबहादुर खड्काका सुरक्षागार्ड समेत थिए ।

श्रृंखला- १ : अपराध अनुसन्धानमा प्रहरीको साख धूमिल पारेकाे निर्मला हत्या प्रकरण

सीआईबी स्रोतका अनुसार कार्की हत्याको घटनाबारे विभिन्न पाटोबाट करिब-करिब अनुसन्धान सकिएको छ । घटनामा संलग्नहरूको पहिचानसमेत खुलेको छ । तर, प्राविधिक रूपमा पुष्टि गर्न नसक्दा घटना सुल्झिन बाँकी रहेको हो । सीआईबीका एक प्रहरी अधिकारीका अनुसार पछिल्लो समयसमेत कार्की हत्याको अनुसन्धान फाइल सीआईबीले फेरि अगाडि बढाएको छ ।

सीआईबी स्रोतले भन्यो, ‘अनुसन्धानमा परिवारकै सदस्यबाट समेत खासै सहयोग पाएका छैनौँ । अनुसन्धानका लागि कार्यालय बोलाउँदासमेत प्रहरीले दुःख दियो भनेर वकिल बोकेर आउँछन् । त्यसैले हामीलाई पनि अनुसन्धान गर्न केही समस्या छ ।’

पूर्वप्रहरी नायब महानिरीक्षक (डीआईजी) हेमन्त मल्ल प्रहरीले लामो समय अनुसन्धान गर्दा पनि अपराधीसम्म पुग्न नसक्नुको कारण घटनास्थलबाट भेटिएका प्रमाण संकलनमा त्रुटि रहेको बताउँछन् । ‘अनुसन्धान प्रक्रिया सुरुमा घटनास्थलमा भेटिएका प्रमाण संकलनबाटै हुनेगर्छ । प्रमाण संकलनमै कमजोरी भयो भने घटनाको अनुसन्धान प्रक्रिया नै कठिन हुन्छ,’ मल्लले भने । अपराध अनुसन्धानको पहिलो कडी नै क्राइम सिन बचाउनु रहेको अनुसन्धानमा खटिएका प्रहरी अधिकारीको दाबी छ ।

(सई कार्कीको हत्या अनुसन्धानमा प्रहरीले प्राप्त गरेको तथ्यबारे अर्को श्रृंखलामा प्रकाशित गर्नेछौँ ।)

प्रकाशित मिति: बिहीबार, असोज ६, २०७९ १४:०७