सई कार्की हत्या प्रकरण: श्रीमती रञ्जुकै भूमिका शंकास्पद, किन दिइन् फरक-फरक बयान ? (बयानसहित)

सई कार्की हत्या प्रकरण: श्रीमती रञ्जुकै भूमिका शंकास्पद, किन दिइन् फरक-फरक बयान ? (बयानसहित)

A+ A A-

‘हामी एउटै बेडमा सुतेका थियौँ । घटना राति साढे एक बजेतिरको हो । कोठाको चुकुल नै फोडेर केही व्यक्ति मेरो कोठामा पुगेछन् । र, मसँगै सुतेका मेरो श्रीमान्‌लाई घिसारेर लगेछन् । मैले पछि बचाऊ-बचाऊ भनेको आवाज मात्रै सुनेँ र उठेर हेर्दा घरको प्यासेज रक्ताम्य देखे । मेरो घरभित्र कसरी पसे, कति जना थिए केही थाहा छैन । पछि श्रीमान्‌ले पानी-पानी भन्दै हुनुहुन्थाे तर त्यस्ताे बेला पानी दिन हुन्न भन्ने सुनेकाले मैलै पानी पनि दिइनँ । कसले के कारणले मेरो श्रीमान्‌को हत्या गर्‍यो । मलाई थाहा छैन ।’

प्रहरी नायब निरीक्षक (सई) कुवेरविक्रम कार्कीकी श्रीमती रञ्जु भट्टराई कार्कीले प्रहरीकाे उपत्यका अपराध अनुसन्धान कार्यालय बानेश्वरलाई दिएको बयान हो यो ।

२० मंसिर २०६३ मा काठमाडौंको गोठाटारस्थित आफ्नै निवासमा सुतिरहेका बेला सई कार्कीलाई कोठाबाट घिसारेर अज्ञात व्यक्तिले टाउको र ढाडमा अन्धाधुन्ध खुकुरी प्रहार गरेका थिए । पछि परिवारका सदस्यले कार्कीलाई उपचारका लागि मेडिकल कलेज सिनामंगल पुर्‍याएका थिए । तर, उनको उपचारकै क्रममा मृत्यु भयो ।

प्रहरीमा बहाल रहँदा खुकुरी प्रहारबाट निर्मम तरिकाले हत्या गरिएका कार्कीको हत्यारासम्म प्रहरी १६ वर्ष बितिसक्दा पुग्न सकेको छैन । कार्कीको हत्या अनुसन्धानबारे प्रहरीको ‘रेडिमेड’ जवाफ छ- अनुसन्धान जारी छ । अपराध अनुसन्धान कार्यालयले पछिल्लो समय असार ०७५ मा हालका आईजीपी धीरजप्रताप सिंह कार्यालय प्रमुख हुँदा हत्या फाइल पल्टाएर फेरि सुरुदेखि नै अनुसन्धान प्रक्रिया अगाडि बढाएको थियो । तर, प्रगति भने हुन सकेन ।

उसो त कार्की पूर्वगृहमन्त्री खुमबहादुर खड्काका सुरक्षागार्डसमेत थिए । उनी नियमित पेस्तोल बोकेरै हिँड्थ्ये । उनका एक सहकर्मी भन्छन्, ‘प्रहरीमा बहाल रहेकै बेला हत्या भयो । उसको हत्यारा अझै पत्ता लाग्न सकेको छैन ।अर्को शंकाको कुरा, सई कार्कीसँग सधैँ पेस्तोल हुन्थ्यो, आफूमाथि आक्रमण हुँदा उनले किन गोली चलाएनन् ? घटना रहस्यमय नै छ ।’

अनुसन्धानमा संलग्न एक प्रहरी अधिकारीका अनुसार सधैँ आफू सुत्ने बेडको अगाडि पेस्तोल राख्ने सई कार्कीको पेस्तोल त्यो दिन भने उनकी श्रीमतीले दराजमा राखिदिएको खुलेको थियो । उसो त सई कार्कीको हत्याबारे श्रीमती रञ्जुले सबै थाहा भएको र १३ दिनको काम सकिएपछि सबै कुरा प्रहरीलाई खुलाउने बताएकी थिइन् ।

त्यो अवधिमा समेत सई कार्कीकी श्रीमती रञ्जुले घटनाबारे फरक-फरक व्यक्तिसँग फरक-फरक बयान दिएको खुलेको छ । १३ दिनपछि भने रञ्जुले श्रीमान्‌को हत्याबारे आफूलाई कुनै जानकारी नभएको बयान दिएकी थिइन् । सीआईबी स्रोतले भने सई कार्कीको हत्या घटना प्राविधिक रूपमा पुष्टि गर्न नसक्दा घटना सुल्झिन नसकेको बताए ।

सीआईबीका एक प्रहरी अधिकारीका अनुसार पछिल्लो समयसमेत कार्की हत्याको अनुसन्धान फाइल सीआईबी र अपराध अनुसन्धान कार्यालय दुवैले हेरिरहेको छ । एक प्रहरी अधिकारीले भने, ‘अनुसन्धानमा परिवारकै सदस्यबाट समेत सहयोग नपाउँदा घटना जटिल बनेको हो । कार्कीकी श्रीमतीलाई घटनाबारे सोधपुछका लागि प्रहरी कार्यालय बोलाउँदा प्रहरीले दुःख दियो भनेर वकिल र मानवअधिकारीकर्मी लिएर आउनुहुन्छ, अनि कसरी सहयोग भयो त ?’

प्रहरी स्रोतका अनुसार पछिल्लो समय भने सई कार्कीकी श्रीमती रञ्जुले श्रीमान्‌को हत्याको पछाडि दिवंगत पूर्णगृहमन्त्री खड्काकै भूमिका शंकास्पद रहेको बयान प्रहरीलाई दिएकी छन् । मृतक कार्कीकी श्रीमती र एक छोरी छन् । तर, प्रहरीले रञ्जुमाथि नै अनुसन्धान तेर्स्याएको छ ।

कसरी घरभित्र छिरेका थिए हत्यारा ?

प्रहरीका अनुसार सई कार्कीको हत्यारा घरभित्र प्रवेश गर्दा उनको घरको मूल ढोका बन्द थियो । ढोका र झ्याल बन्द भएकाले हत्यारा मूल ढोकाबाट प्रवेश गर्ने कुनै सम्भावना नै थिएन । घर एकतल्ले मात्रै थियो ।

त्यसैले हत्या पूर्वयोजनाअनुसार भएको प्रहरीको दाबी छ । प्रहरीको अनुसन्धानबाट हत्यामा दुई जनाभन्दा बढीको संलग्नता देखिन्छ । उनीहरू कार्कीको घरकाे छतबाट घरभित्र पसेको खुलेको थियो । त्यो दिन छतको ढोका खुल्लै रहेको प्रहरीको अनुसन्धानले देखाएको छ ।

अनुसन्धानमा संलग्न एक प्रहरीका अनुसार कार्कीकी श्रीमती रञ्जुले फरक-फरक बयान दिँदा घटना थप रहस्यमय बनेको छ । एक प्रहरी अधिकारी भन्छन्, ‘श्रीमान्‌को हत्यारा पत्ता लगाउनुपर्‍यो भनेर श्रीमतीले हामीलाई साथ दिनुपर्ने हो । तर, यो घटनामा हामीले त्यो सहयोग पाएनौँ । त्यसैले अनुसन्धान लम्बिरहेको छ ।’

घटनाको आधा घण्टाअघि घरनजिक गाँजा खाएको बास्ना आएको भन्दै रञ्जु घरको छतमा पुगेको तर कोही नदेखेपछि आफू फर्किएको बयानसमेत प्रहरीलाई दिएकी छिन् । जसले उनकाे भूमिका झन् शंकाकाे घेरामा परेको छ । सीआईबीका प्रवक्ता एसपी कमल थापामा अनुसार कार्की हत्याबारे हाल सीआईबीले सघन रूपमा हेरिरहेको छ ।

‘हामीले सई कार्कीको हत्या घटनाबारे अहिले गम्भीर रूपमा विश्लेषण गरेर हेर्दैछौँ । सीआईबीले घटनालाई मुख्य प्राथमिकतामा राखेर अनुसन्धान अगाडि बढाएको छ,’ एसपी थापाले भने । पूर्वप्रहरी नायब महानिरीक्षक (डीआईजी) हेमन्त मल्ल प्रहरीले लामो समय अनुसन्धान गर्दा पनि अपराधीसम्म पुग्न नसक्नुको कारण घटनास्थलबाट भेटिएका प्रमाण संकलनमा त्रुटि हुँदा अनुसन्धान जटिल बन्ने गरेको बताउँछन् ।

शृंखला- २ : सई कार्कीको आफ्नै घरभित्र हत्या भएको १६ वर्ष बित्यो, प्रहरीले अझै सकेन अनुसन्धान

शृंखला- १ : अपराध अनुसन्धानमा प्रहरीको साख धूमिल पारेकाे निर्मला हत्या प्रकरण

प्रकाशित मिति: बिहीबार, असोज १३, २०७९ १३:०९