जब मन्त्री भएको एक महिनापछि अब्दुल खान मन्त्रालय पुगे...

तस्वीर : खानेपानी मन्त्रालयबाट

A+ A A-

खानेपानी मन्त्रालयमा असन्तुष्टि जनाएको जनमत पार्टीका अब्दुल खानले १ महिनापछि पदभार सम्हालेका छन् । सत्तारुढ दलहरूबीच मन्त्रालय भागवण्डा नमिल्दा बिनाविभागीय मन्त्रीको हैसियतमा उनले प्रधानमन्त्री प्रचण्डसँगै ११ पुसमा शपथ खाएका थिए ।

तर, मन्त्री खानले ११ माघमा (हिजो) खानेपानी मन्त्रालय पुगेर पदभार ग्रहण गरेका हुन् । सरकारलाई अप्ठ्यारो परेपछि प्रधानमन्त्री प्रचण्डको आग्रहमा पदभार ग्रहण गरेको उनले बताए । ‘प्रधानमन्त्रीले विशेष आग्रह गर्नुभयो । खानेपानीमा पनि राष्ट्रिय अन्तर्राष्ट्रिय विषय छ भनेपछि सम्हालेको हो,’ मन्त्री खानले भने ।

दोस्रोपटक ३ माघमा प्रधानमन्त्री प्रचण्डले मन्त्रिपरिषद् विस्तार गर्दा जनमताको भागमा खानेपानी मन्त्रालय परेको थियो । तर, जनमतले कृषि वा उद्योग मन्त्रालयमा दाबी गरेको थियो । उद्योग र कृषिमध्ये एक पाउने सहमति भएको जनमतको दाबी छ । सहमतिविपरीत खानेपानी मन्त्रालय दिएर धोका भएको भन्दै मन्त्री खान पदभार सम्हाल्न गएका थिएनन् ।

प्रधानमन्त्री प्रचण्ड जनमतलाई उद्योग मन्त्रालय दिन तयार भए पनि एमाले अध्यक्ष केपी ओलीले उद्योग मन्त्रालय नछोडेपछि अन्ततः जनमत आफ्नो निर्णयबाट ब्याक हुन बाध्य भएको हो । ‘उद्योग मन्त्रालय दिन प्रचण्ड सहमत हुनुहुन्थ्यो तर एमाले अध्यक्ष ओली मान्नुभएन । यसले सरकारलाई नै अप्ठ्यारो पर्ने देखियो । प्रचण्ड र ओलीलाई मिलेर जानुहोस्, हामी चित्त बुझाउँछौँ भनेर छोडेका हौँ,’ मन्त्री खानले शिलापत्रसँग भने ।

११ पुसमै उद्योग, वाणिज्य तथा आपूर्ति मन्त्रालयमा मन्त्री खानकै नेम प्लेट राखिएको थियो । तर, ११ माघमा पदभार सम्हाल्न एमालेका दामोदर भण्डारी पुगेका थिए । मन्त्री खान पदभार सम्हाल्न नगएपछि प्रधानमन्त्री प्रचण्डले खानेपानीको सट्टा वन मन्त्रालय लिन जनमतलाई भनेका थिए । तर, खानेपानीको विषय पनि महत्त्वपूर्ण रहेको निष्कर्ष निकाल्दै मन्त्री खानले मन्त्रालय पुगेर काम सुरु गरेका छन् ।

‘केयूकेयलको पानीको व्यवस्था गर्ने योजना छ । खानेपानी विभागसँग छलफल गरेर एक्सनमा जाने हो । पानीको समस्या समाधान गर्न सुझाव समिति गठन गरेर काम गर्छु,’ मन्त्री खानले भने । प्राइभेट क्षेत्रको पानीको गुणस्तर कायम गर्न पनि तत्काल काम गर्ने उनले बताए ।

‘कहाँ के समस्या छ तुरुन्त समाधान गर्ने हो,’ उनले भने । काम सुरु गरे पनि केही समयपछि मन्त्रालय हेरफेर हुन सक्ने संकेत मन्त्री खानले गरे । ‘प्रधानमन्त्रीले केही समय गर्नुहोस् भन्नुभएको छ । हेरफेर हुन पनि सक्छ,’ उनले भने ।

सम्बन्धित समाचार

प्रकाशित मिति: बिहीबार, माघ १२, २०७९ १३:२४