सरकारमा ६५ प्रतिशत नयाँ अनुहार, नयाँ ऊर्जाको परीक्षण

A+ A A-

प्रधानमन्त्री पुष्पकमल दाहाल 'प्रचण्ड'ले मंगलबार मन्त्रिपरिषद् विस्तार गरे । विस्तारित मन्त्रिपरिषद्‌मा दुईतिहाइभन्दा धेरै नयाँ अनुहारले मन्त्री हुने अवसर पाए । विस्तारित मन्त्रिपरिषद्‌मा ६५ प्रतिशत पहिलोपटक मन्त्री भएकाहरू छन् । २० मन्त्री र ३ राज्यमन्त्री गरी २३ जना मन्त्री हुँदा १५ जना नयाँ अनुहार हुन् ।

तेस्रोपटक प्रधानमन्त्री बनेका प्रचण्डलाई नयाँ मन्त्रीको ऊर्जा त थपिएको छ, सँगै प्रधानमन्त्रीसहित मन्त्रीहरूको परीक्षण पनि सुरु भएको छ । ‘शक्तिमा हुँदा परीक्षण हुने हो । नयाँको परीक्षण सुरु भएको छ । पात्र फेरिएर मात्र हुँदैन । अहिलेको पात्रसँग नीति पनि फरक हुनुपर्छ,’ राजनीतिक विश्लेषक खगेन्द्र प्रसाईं भन्छन् ।

त्यसो त एमाले, माओवादी, राप्रपाबाहेक भर्खरै उदाएको राष्ट्रिय स्वतन्त्र पार्टी र जनमत पार्टी पनि सरकारमा सहभागी भएका छन् । उनीहरूलाई धेरै आशाका साथ हेरिएको छ । तर, विश्लेषक प्रसाईं पात्र नयाँ र पुरानाभन्दा पनि एजेन्डा नयाँ हुनुपर्ने तर्क गर्छन् । ‘मन्त्री नयाँ बन्नु ठूलो कुरा होइन । नयाँ एजेन्डा के छ, त्यो महत्त्वपूर्ण हो । सरकारमा गएर के कुरा लागू गर्ने भन्ने हो । संविधान कार्यान्वयन गर्ने सोचेका छन् कि छैनन्, त्यो हेर्नुपर्छ,’ उनी भन्छन् ।

एमालेमा चार जना नयाँ अनुहार

एमालेले यसपटक नयाँलाई अवसर दिएको छ । एमालेका आठ मन्त्रीमध्ये चार नयाँ अनुहार छन् । उपप्रधान तथा अर्थमन्त्री विष्णु पौडेल, कृषि तथा पशुपक्षीमन्त्री ज्वालाकुमारी साह, महिला, बालबालिका तथा ज्येष्ठ नागरिकमन्त्री भगवती चौधरी र उद्योगमन्त्री दामोदर भण्डारीबाहेक भूमि व्यवस्थामन्त्री राजेन्द्र राई, परराष्ट्रमन्त्री डा. विमला पौडेल राई, स्वास्थ्यमन्त्री पदम गिरी र रक्षामन्त्री हरिप्रसाद उप्रेती पहिलोपटक मन्त्री बनेका हुन् ।

मओवादीका तीन जना नयाँँ

माओवादी केन्द्रले पनि यसपटक पार्टीका प्रभावशाली नेतालाई रोकेर नयाँलाई मौका दिएको छ । माओवादी केन्द्रका ६ मन्त्री र १ राज्यमन्त्रीमा आधा नयाँ अनुहार छन् । प्रधानमन्त्री प्रचण्ड, उपप्रधान तथा भौतिक पूर्वाधारमन्त्री नारायणकाजी श्रेष्ठ र सूचना तथा सञ्चार प्रविधिमन्त्री रेखा शर्मा मात्र दोहोरिएर सिंहदरबार छिरेका हुन् । माओवादीका सामान्य प्रशासनमन्त्री अमनलाल मोदी, संस्कृति, पर्यटन तथा नागरिक उड्डयनमन्त्री सुदन किराँती र राज्यमन्त्री सुशीला सिर्पाली पहिलोपटक मन्त्री बनेका हुन् ।

रास्वपाका सबै नयाँ

राष्ट्रिय स्वतन्त्र पार्टी (रास्वपा) ६ महिनाअघि मात्र गठन भएको पार्टी हो । ६ महिनाकै अवधिमा रास्वपालाई जनताले अनुमोदन गरेर संसद्‌मा पठाए । र, रास्वपा सरकारमा सहभागी बन्यो । रास्वपाका चार मन्त्री नै नयाँ हुन् । उपप्रधान तथा गृहमन्त्री रवि लामिछाने, श्रम रोजगार तथा सामाजिक सुरक्षामन्त्री डोलप्रसाद अर्याल, शिक्षा विज्ञान तथा प्रविधिमन्त्री शिशिर खनाल र स्वास्थ्य राज्यमन्त्री डा. तोसिमा कार्की पहिलोपटक सांसद र मन्त्री बनेका हुन् । आफ्नो वाचापत्रअनुसार काम गर्ने रास्वपाका मन्त्रीहरूले प्रतिबद्धता जनाएका छन् । रास्वपासँग जनताले ठूलो आशा राखेका छन् । अब जनचाहनाअनुसार काम गर्न सक्छन् सक्दैनन्, उनीहरूको परीक्षाको ढोका खुलेको छ ।

राप्रपाका ३ नयाँ मन्त्री

अघिल्लो संसद्‌मा राप्रपाको एक्लो सांसद थिए, अध्यक्ष राजेन्द्र लिङ्देन । संसद्‌को अन्तिम बैठकमा उनले भनेका थिए, ‘यसपटक थप साथी लिएर संसद्‌मा आउँछु ।’ १ बाट उनले १४ जना सांसद बोकेर यसपटक संसद् मात्र छिरेनन्, पहिलोपटक उनी उपप्रधानमन्त्री तथा ऊर्जामन्त्री बनेर मंगलबार सिंहदरबार छिरे । हिन्दु राष्ट्र र राजसंस्थाको एजेन्डा बोकेर गणतन्त्रवादी प्रचण्ड नेतृत्वको सरकारमा पहिलोपटक मन्त्री बनेका लिङ्देनका लागि यो ठूलो चुनौती हो । उनले यसलाई आफू अग्नि परीक्षामा होमिएको टिप्पणी गरेका छन् ।

‘आफ्ना समर्थक तथा शुभेच्छुकहरूको ठूलो पङ्तिको असहमतिका बीच पनि यो अग्नि परीक्षामा होमिने निर्णयमा पुगेँ । जो ढिलो या चाँडो मेरा लागि अनिवार्य थियो । असम्भवजस्तो लागे पनि म खरो उत्रनेछु,’ उनले भनेका छन् । उनको पार्टीबाट मन्त्री बनेका चारमध्ये उनीसहित तीन नयाँ अनुहार हुन् । कानुन न्याय तथा संसदीय मामिलामन्त्री ध्रुवबहादुर प्रधान र ऊर्जा राज्यमन्त्री दीपकबहादुर सिंह पनि पहिलोपटक सिंहदरबार छिरेका छन् । शहरी विकासमन्त्री विक्रम पाण्डे भने यसअघि नै मन्त्री भइसकेका हुन् ।

जनमतको १ जना नयाँ

जनमत पार्टी पनि पहिलोपटक जनताबाट अनुमोदन भएर सरकारमा सहभागी भएको हो । जनमतबाट खानेपानीमन्त्री बनेका अब्दुल खान पनि नयाँ अनुहार हुन् । तर, आफूले सोचेअनुसारको मन्त्रालय नपाएपछि जनमत असन्तुष्ट बनेको छ । अध्यक्ष सीके राउतले गठबन्धनबाट सहमति तोडिएको टिप्पणी गरेका छन् ।

‘आफूले मागेको मन्त्रालय नपाएकाले गठबन्धन धरापमा पर्न सक्छ,’ उनले भने । मन्त्रिपरिषद् विस्तार भएकै दिन गठबन्धनभित्र जनमत र जसपाले असन्तुष्टि जनायो । जनमतका मन्त्री अब्दुल खान खानेपानीमन्त्री भए पनि आज पदभारका लागि मन्त्रालय नै गएनन् । जनमतले मागेकाे मन्त्रालय नपाएपछि रुष्ट बनेकाे छ ।

सरकारलाई समर्थन गरेका दलहरूले पहिलो दिनमै असन्तुष्टि जनाएपछि गठबन्धनको भविष्य के हुन्छ भन्ने अन्योल बढेको छ । तर, विश्लेषक प्रसाईं हनिमुन समयसम्म हेर्नुपर्ने बताउँछन् । ‘नयाँ मन्त्रीहरूले कस्तो काम गर्छन्, दुई/तीन महिनामा हेर्न सकिन्छ । अहिले नै पूर्वाग्राही हुनुपर्दैन तर धेरै आशा पनि छैन,’ उनी भन्छन् ।

प्रकाशित मिति: मंगलबार, माघ ३, २०७९ २०:०७