उद्योग मन्त्रालयमा अब्दुल खान बाहिरको बाहिरै, भित्र पसे दामोदर भण्डारी

A+ A A-

गत पुस ११ गते नयाँ सरकार गठन हुने क्रममा प्रधानमन्त्रीसहित तीन उपप्रधानमन्त्री र चार मन्त्रीले शपथ लिए ।

विनाविभागीयमन्त्रीको शपथ लिए पनि त्यो भन्दा पहिले नै उनीहरूको कार्यविभाजनमा समेत सहमति जुटेको बताइएको थियो । जसमा पहिलोपटक निर्वाचनमा भाग लिएको जनमत पार्टीका उपाध्यक्ष अब्दुल खानलाई उद्योग वाणिज्य तथा आपूर्ति मन्त्रालयको जिम्मेवारी दिने भनिएको जनमतको दाबी छ ।

खनले शपथ लिएकै दिन उद्योग मन्त्रालयमा खानको 'नेम प्लेट' पनि राखिएको थियो । उक्त नेम प्लेटमा मन्त्री खान 'बाहिर' उल्लेख थियो । मा. अब्दुल खान, मन्त्री, उद्योग वाणिज्य तथा आपूर्ति, बाहिर लेखिएको नेम प्लेट मन्त्रालयमा राखिएको थियो ।

उनलाई धेरै कर्मचारीले चिनेका थिएनन् । 'नयाँ पार्टीका नयाँ मन्त्री कस्तो छ कार्यशैली केही थाहा छैन,' ११ पुसमा मन्त्रालयमा कर्मचारीहरू भलाकुसारी गरिरहेका थिए ।

सचिवबाट नै निर्देशन थियो- नयाँ मन्त्रीको स्वागत कार्यक्रम रहेकोले कार्यालय समय सकिए पनि घर नजानु होला । यही निर्देशनको आधारमा साढे ५ बजेसम्म सहसचिव तथा उपसचिवहरू मन्त्रालयमा बसेका थिए । तर, त्यसदिन उनले मन्त्रीको शपथ लिए पनि उद्योग मन्त्रालयको जिम्मेवारी पाएनन् । उनीसँगै मन्त्री भएका दामोदर भण्डारी र ज्वालाकुमारी शाहले पनि जिम्मेवारी पाएका थिएनन् ।

३ सातापछि मन्त्रिपरिषद् विस्तार भयो । तर, उद्योग मन्त्रालय भने एमालेको कोटामा पर्‍यो । मंगलबार भने मन्त्रालयको सोही स्थानमा दामोदर भण्डारीको नेम प्लेट झुण्ड्याइयो ।

उद्योग मन्त्रालय जनमत पार्टीले रोजेको मन्त्रालय थियो । तर, सल्लाह नै नगरी अर्को पार्टीलाई यो जिम्मेवारी दिएको र माग्दै नमागेको खानेपानी मन्त्रालय दिएपछि उनी कार्यभार सम्हाल्न नै गएका छैनन् । राष्ट्रिय जनमत पार्टीले सरकारलाई दिएको समर्थनलाई निरन्तरता दिने वा नदिने भन्ने विषयमा उपयुक्त निर्णय लिने जनाएको छ ।

मन्त्री अब्दुल खानले प्रधानमन्त्रीबाट आफूहरूमाथि धोका भएको प्रतिक्रिया दिएका छन् । 'हामीलाई धोका भयो । थाहै नदिइ मन्त्रालय फेरियो । उद्योग र कृषीमध्ये एक पाउने सहमति भएको थियो । अहिले खानेपानी मन्त्रालय दिइयो,' खानले भने, 'यस्तो धोका भएपछि कसरी कार्यभार सम्हाल्नु भनेर नगएको हुँ ।'

सरकारबाट बाहिरिने हो त भन्ने प्रश्नमा उनले भने, 'मन्त्रालय चलाउन भनेरै सरकारमा आएको हो । सरकारबाट बाहिरिने भन्ने छैन । तर, नैतिकता र सम्झौताअनुसार व्यवहार हुनुपर्छ । प्रधानमन्त्रीसँग छलफल भएको छ । सकारात्मक कुरा भयो । भोलिसम्म केही प्रगति होला ।'

प्रकाशित मिति: मंगलबार, माघ ३, २०७९ १९:३७