को बन्ला कर्णालीको सभामुख ?

A+ A A-

कर्णाली प्रदेशसभाको दोस्रो बैठकले सभामुख र उपसभामुख चयनको मिति तय गरेसँगै भावी सभामुखका बारेमा चर्चा हुन थालेको छ । सभामुख चयनका लागि जेष्ठ सदस्य एमालेका विनोदकुमार शाहले आगामी माघ १ गते दिउँसो १ बजेका लागि मिति तोकेका हुन् ।

निर्वाचन प्रयोजनका लागि पुस ३० गते मतदाता नामावली प्रकाशन, उम्मेदवारको प्रस्ताव दर्ता, उम्मेदवारको नामावली प्रकाशन, उम्मेदवारको प्रस्तावउपर दावी विरोधकाे तालिका तय गरिएको छ । यस्तै, माघ १ गते उम्मेदवारको प्रस्ताव फिर्ता, उम्मेदवारको अन्तिम नामावली प्रकाशन र सोही दिन ११ बजेदेखि सभाको बैठक प्रारम्भ, मत विभाजन र निर्वाचन परिणाम घोषणा गर्ने कार्यतालिका रहेको प्रदेश सचिवालयले जनाएको छ ।

प्रदेश भागवण्डामा सत्ता साझेदार दलबीच भएको सहमतीअनुसार कर्णाली नेकपा माओवादी केन्द्रको भागमा परेसँगै एमालेले सभामुख पाउने पक्का भएको छ । सरकारको नेतृत्वका लागि आफ्ना छुट्टै दाबी पेस गर्दै आएका दल माओवादी र एमालेबीच टकरावको स्थिति सिर्जना भए पनि सभामुख र उपसभामुखका बारेमा भने दुवै दलभित्र अहिलेसम्म कुनै छलफल भएको छैन ।

सभामुखमा प्रदेशसभामा जेष्ठ सदस्यको हैसियतले बैठक सञ्चालन गर्दै आएका एमालेका विनोदकुमार शाह नै बन्ने पनि देखिन्छ । तर, शाहले आफू सभामुख नबन्ने बताउँदै आएका छन् । एमालेका जम्मा १० सांसद मध्ये संसदीय दलका नेता यमलाल कँडेल, प्रदेश अध्यक्ष विनोदकुमार शाह र प्रदेश उपसचिव टेकराज पछाई पछाडि हट्ने देखिएको छ । यसो हुँदा यमलालनिकट समानुपातिक सांसद सुर्खेतकी नन्दा गुरुङ सभामुख बन्ने सम्भावना बढेर जानेछ ।

नन्दाको विकल्पमा मुगुका प्रत्यक्षतर्फबाट विजयी भएर आएका जितबहादुर मल्ल रहेकाे एमाले स्रोतको दावी छ ।कँडेलले पार्टीमा आफू अनुकुल लाइन निर्माण गर्न नन्दालाई नै अगाडि सार्ने सम्भावना छ । तर, पार्टी केन्द्रले विनोदकुमार शाहलाई नै सभामुख बनाउने गरी प्रदेश कमिटीलाई रुलिङ गर्न आधिकारिक जानकारी गराइसकेकाे एमालेका एक नेताले बताए ।

यता उपसभामुख पाएको नेकपा माओवादी केन्द्रमा कालीकोटकी यसोदा न्यौपाने र डोल्पाकी उर्मिला विश्वकर्माको नाम चर्चामा छ । माओवादी केन्द्रका एक प्रदेशसभा सांसदका अनुसार पार्टीभित्र आधिकारिक छलफल नभए पनि न्यौपाने र विश्वकर्मा मध्ये एक जना उपसभामुख हुने पक्का छ ।

न्यौपाने र विश्वकर्मा समानुपातिक सांसद हुन् । १४ सांसदसहित पहिलो पार्टी बनेको नेपाली कांग्रेस प्रतिपक्षमा धकेलिएको छ । कर्णाली प्रदेशसभामा एक स्वतन्त्रसहित पाँच दलको प्रतिनिधित्व छ । ४० सदस्यीय प्रदेशसभामा नेपाली कांग्रेस १४, नेकपा माओवादी केन्द्र १३, नेकपा एमाले १०, नेकपा समाजवादी र राष्ट्रिय प्रजातन्त्र पाटीका एक–एक र स्वतन्त्रबाट एक सांसद छन् ।

प्रकाशित मिति: मंगलबार, पुस २६, २०७९ ११:१८