एमाले र माओवादीबाट को-को छन् मन्त्रीका आकांक्षी ?

A+ A A-

सत्ता गठबन्धनका प्रमुख घटक नेकपा एमाले र माओवादी केन्द्रमा मन्त्रीका आकांक्षी धेरै देखिएका छन् । गठबन्धनको दोस्रो ठूलो दल माओवादी केन्द्रका अध्यक्ष पुष्पकमल दाहाल प्रचण्ड प्रधानमन्त्री बनेका छन् । माओवादीले प्रधानमन्त्री पाएपछि उसले एमालेभन्दा एक मन्त्रालय कम पाउनेछ ।

एमालेले आठ र माओवादीले सात मन्त्रालय पाउने मोटामोटी सहमति भएको माओवादी केन्द्रका एक स्थायी कमिटी सदस्यले बताए । त्यसो हुँदा माओवादी केन्द्रको भागमा प्रधानमन्त्रीसहित सात मन्त्रालय पर्नेछन् । माओवादी केन्द्रबाट उपप्रधानसहित भौतिक, पूर्वाधार तथा यातायातमन्त्री नारायणकाजी श्रेष्ठ भइसकेका छन् ।

माओवादीबाट को-को छन् मन्त्रीको लाइनमा ?

अब माओवादी केन्द्रबाट पाँच जना मन्त्री हुनेछन् । मन्त्रीका लागि आकांक्षा राखेका सांसदहरू धेरैजसो अहिलेसम्म मन्त्री नभएका युवापुस्ताका छन् ।

माओवादीबाट वर्षमान पुन सरकारमा जान इच्छुक थिए । तर, उनी अहिले आएर सरकारमा नजाने बताइरहेका छन् । उनको चाहना पहिलो चरणमै सरकारमा गएर गृहमन्त्री हुने थियो । तर, गठबन्धनमा भागवण्डा गर्दा गृहमन्त्री राष्ट्रिय स्वतन्त्र पार्टीको भागमा परेको छ । सो पार्टीका सभापति रवि लामिछाने अहिले गृहमन्त्री छन् ।

माओवादीका सिनियर नेताहरू पोर्टफोलियोका कारण पनि सरकारमा जान नचाहेको स्रोतले बताए । त्यही भएर माओवादीका दोस्रो पुस्ताका नेताहरू पार्टी बनाउने भन्दै आएका छन् । पार्टी बनाउने भनेका नेताहरूले सरकारमा नजाने घोषणा गरेका छन् ।

माओवादीका तेस्रो तहका सांसदहरू भने सरकारमा जान चाहन्छन् । मन्त्रीका लागि उनीहरूले लविङ पनि गरिरहेका छन् । माओवादीमा प्रचण्डबाहेकका अन्य गुट छन् । अहिले आकांक्षीहरू गुटका नेताहरूसँग मन्त्रीका लागि लविङमा रहेको एक माओवादी नेता बताउँछन् ।

केहीले आफूहरूले अवसर नपाएकाले पाउनुपर्ने दाबी गरेका छन् । माओवादी सांसद सुदन किराँती अहिलेसम्म अवसर नपाएकाले पाउनुपर्ने र जनतासँग जोडिएको मन्त्रालय पाउनुपर्ने बताउँछन् । रेखा शर्मा दाङमा एमाले महासचिवलाई पराजित गरेकी नेतृ हुन् । उनी पहिला मन्त्री भए पनि हेभिवेट नेतालाई पराजित गरेको र महिला सहभागिता पनि हुने भएकाले मन्त्री बन्ने लगभग पक्का छ ।

दाङबाटै समानुपातिकमा परेकी नारायणी शर्मा पनि मन्त्रीकी आकांक्षी छन् । यदि रेखा वेटिङ सभामुखका लागि बसेमा नारायणी मन्त्री हुने सम्भावना रहेको नेताहरू बताउँछन् । ‘सांसद भएपछि मन्त्रीको चाहना राख्नु स्वाभाविक हो । तर, पार्टीले कसलाई पठाउने कसलाई के भूमिका दिने भन्ने हुन्छ,' सांसद नारायण शर्माले भनिन्, 'पार्टीले गरेको निर्णय मानेर जाने कुरा प्रमुख हो ।’

यस्तै, शक्ति बस्नेत, पूर्ण घर्ती, सुदन किराँती, अमनलाल, सूर्यमान दोङ, हितबहादुर तामाङ, राजन दाहाल, माधव सापकोटा, छिरिङ लामा (कार्चेन), महेन्द्रबहादुर शाहीलगायत पनि मन्त्रीका आकांक्षी हुन् ।

शाही कर्णालीका पूर्वमुख्यमन्त्री हुन् । बस्नेत पटकपटक मन्त्री भइसकेका माओवादीका दोस्रो तहका नेता हुन् । घर्ती लुम्बिनी प्रदेशका पूर्वसभामुख हुन् । किराँती र मोदी अघिल्लोपटक पनि चुनाव जितेर आएका तर मन्त्री हुने अवसर नपाएका नेतामा पर्छन् । सापकोटा र दाहालले पहिलोपटक संसद्‌को यात्रा गरेका हुन् ।

एमालेमा पनि उस्तै आकांक्षी

सत्ता गठबन्धनको प्रमुख दल एमालेभित्र पनि मन्त्रीका आकांक्षी धेरै छन् । भागवण्डा गर्दा एमालेले ८ वटा मन्त्रालय पाउने सम्भावना छ । एमालेले पहिलो चरणमा चार जनालाई मन्त्री बनाइसकेको छ । उपप्रधान तथा अर्थमन्त्री विष्णु पौडेल बनेका छन् भने अन्य तीन जना बिनाविभागीय मन्त्री छन् ।

एमालेमा मन्त्री बन्न धेरैले लविङ गरिरहेका छन् । आठ मन्त्रालय पाउँदा एमालेले अब चार जनालाई सरकारमा पठाउन सक्छ । एमालेले चार जना मन्त्री बनाउँदा लुम्बिनी, प्रदेश १, सुदूरपश्चिम र मधेस प्रदेशबाट प्रतिनिधित्व गराइसकेको छ ।

अब बागमती, गण्डकी र कर्णाली प्रदेशबाट मन्त्री हुनेछन् । तर, कर्णालीबाट एमालेले प्रत्यक्षबाट एक सिट पनि जितेको छैन । एमालेबाट ठाकुर गैरे, पदम गिरी, विद्या भट्टराई, महेश बर्तौंला, प्रेमलाल महर्जन, सुनिता बराल, सूर्य थापा, जुली महतोलगायत मन्त्रीका आकांक्षी छन् ।

पृथ्वीसुब्बा गुरुङले सभामुख हुने आकांक्षा राखेका छन् । यदि गुरुङ सभामुख भएमा छविलाल विश्वकर्मा पनि मन्त्री बन्ने सम्भावना छ । विश्वकर्मा पनि सभामुखका आकांक्षी छन् । दशबुँदेबाट योगेश भट्टराई र गोकर्ण विष्टमध्ये एक जना मन्त्री बन्न सक्ने एमालेका एक नेताले बताए । सत्ता गठबन्धनभित्र भागवण्डा हुँदा एमालेले राष्ट्रपति, सभामुखसहित आठ मन्त्रालय पाउने मोटामोटी सहमति छ ।

प्रकाशित मिति: बिहीबार, पुस २१, २०७९ १५:२९