खोलाको अवैध उत्खनन् रोक्न कांग्रेसको माग

A+ A A-

मोरङका विभिन्न खोला र नदीहरुमा भइरहेको अवैध दोहन रोक्न नेपाली कांग्रेस मोरङले माग गरेको छ । कांग्रेसले अवैध उत्खनन्को विषयमा अध्ययन गर्न एक समितिपनि गठन गरेको छ ।

मोरङ कांग्रेसको आइतबार बसेको बैठकले सचिव नागेश कोइरालाको संयोजकत्वमा ५ सदस्यीय समिति गठन गरेको हो । समितिको सदस्यमा राजकुमार लिम्बू, ईश्वरी चौधरी, मन्दिरा गुरागाईंलगायत छन् ।

समितिलाई उत्खनन् भइरहेका खोला र नदीको निरीक्षण गरी प्रतिवेदन तयार पार्ने जिम्मेवारी दिइएको छ । समितिले स्थानीयवासी, सरोकारवाला, प्रशासन, नागरिक समाज, विज्ञलगायतसँग छलफल गरेर प्रतिवेदन तयार पार्ने सभापति डिगबहादुर लिम्बूले जानकारी गराए । समितिको प्रतिवेदनका आधार थप निर्णय गरेर सोही अनुसार निर्णय गरिने अध्यक्ष लिम्बुले बताए । उनले भने ‘समितिले बुझाएको प्रतिवेदनअनुसार दोहन रोक्न राज्यलाई दबाब दिनेछौं ।’

‘विकास निर्माण काम पनि रोकिनु भएन र अवैध दोहन पनि हुनु भएन,’ समिति संयोजक कोइरालाले भने, ‘अवैध र मापदण्डविपरीत भइरहेको नदीजन्य वस्तुको उत्खनन् बन्द गरिनुपर्छ ।’ पछिल्लो समय मोरङका खोला र नदीबाट अवैध र मापदण्डविपरीत उत्खनन् बढेको भन्दै चौतर्फी आलोचना भइरहेको छ ।

यस्तै कांग्रेसले गाउँ, बुथ, वडासहित १७ वटै स्थानीय तहमा समसामयिक विषयमा अन्तरक्रिया गर्ने भएको छ । पार्टी सुदृढीकरण अभियानअन्तर्गत गाउँस्तरसम्म पुगेर जनताका राय लिने पनि तय गरेको छ ।