के भन्छन् कर्णालीका नवनिर्वाचित सांसद ?

A+ A A-

गत मंसिर ४ मा सम्पन्न प्रदेशसभा निर्वाचनमा जनताबाट अनुमोदित भएका ४० जना सांसदले पद तथा गोपनीयताको शपथ लिएका छन् । प्रदेशसभा भवनमा सांसदहरूलाई ज्येष्ठ सदस्यको नाताले नेकपा एमालेका विनोदकुमार शाहले पद तथा गोपनीयताको शपथ गराएका हुन् । शाहले ३९ जना सांसदलाई प्रदेशसभा सदस्य निर्वाचन ऐन, २०७४ को दफा ७५ बमोजिम शपथ खुवाएका हुन् ।

प्रदेशसभा भवनमा आयोजित शपथग्रहण समारोहपश्चात् नवनिर्वाचित सांसदहरूले कर्णालीलाई समृद्ध बनाउन एकजुट भएर काम गर्ने बताएका छन् ।

जनताबाट चुनिएका सांसदहरूले आगामी ५ वर्षमा निभाउने विधायकी भूमिका, प्रतिनिधित्व, कानुन निर्माण, सरकारको काम कारबाहीमा अनुगमन, जवाफदेहिता र वित्तीय तथा बजेट निर्माण, आमजनताको आवाज संसदमा मुखरित गराउन खेल्ने भूमिकाका बारेमा शिलापत्रले केही सांसदको प्रतिक्रिया लिने प्रयास गरेको छ ।

शिलापत्रसँग कुरा गर्दै नेकपा एमाले जुम्ला प्रदेशसभा (२) बाट विजयी भएका टेकराज पछाईले प्रदेश सरकारलाई जनताको प्रत्यक्ष जनजीवनसँग जोड्ने प्रयास गर्ने बताए । ‘समृद्ध कर्णाली प्रदेशका लागि आवश्यक नीति, कानुनहरू निर्माण गरी जनताको जीवनस्तर बदल्नका लागि विकास निर्माण र सही योजनाहरू निर्माण गरी सम्पन्न गर्नमा मेरो मुख्य भूमिका रहनेछ,’ उनले भने, ‘प्रदेश सरकारलाई जनताको जनजीवनसँग कसरी जोड्न सकिन्छ, सरकारलाई यो प्रदेशसभामार्फत जनताले अनुभूत गर्ने खालको सरकार निर्माण गरी आवश्यक नीति निर्माण गर्ने कामहरू सक्रियताको रूपमा गर्नेछु ।’

यस्तै, नेपाली कांग्रेस दैलेख क्षेत्र नम्बर २ (१) बाट विजयी भएका घनश्याम भण्डारीले संघीयतालाई दिगो बनाउन आवश्यक नीति निर्माण गर्ने बताए । ‘राजनीतिक रुपमा संघीयता सफल भयो, हामीले घरघरमा माननीय मन्त्री भटायौँ,’ भण्डारीले भेन, ‘प्रशासनिक र वित्तीय संघीयता सफल हुन सकेको छैन, प्रदेश निजामती ऐन, प्रदेश प्रहरी ऐन आउन सकेको छैन ।’

संघीयता जोगाउन र प्रदेशलाई बलियो बनाउने खालका नीति नियम आउन नसकेको भन्दै भण्डारीले भने, ‘प्रदेश खारेज हुनुपर्छ भन्ने चौतर्फी माग छ, कर्णाली प्रदेश भन्ने वित्तिकै मान्छेको धारणा या कर्मचारी भन्नुहोस् वा उच्च तहका सुरक्षा निकायका मान्छेहरू भन्नुहोस् अरु मान्छेलाई कर्णाली पठाउनु भनेको जेल पठाएको, जरिवाना गर्न पठाएको भन्ने जुन सोच छ, त्यसलाई अन्त्य गर्न मेरो पैरवी हुनेछ ।’

वित्तीय र प्रशासनिक संघीयता कायम गर्न सरकार जसको बने पनि सरकारसँग समन्वय गरेर आवश्यक नीति निर्माण गरी समृद्ध कर्णाली बनाउनतर्फ लाग्ने भण्डारीको भनाइ छ ।

नेपाली कांग्रेस हुम्लाबाट समानुपातिक सांसदमा चुनिएकी विजया बुढाले कर्णालीको समृद्धिका लागि सबै सांसदहरूको एउटै आवाज हुनुपर्ने धारण राखिन् । ‘म हुम्लाजस्तो विकट जिल्लाबाट प्रतिनिधित्व गर्छु, जहाँ राष्ट्रिय सडक सञ्जाल जोडिएको छैन्,’ उनले भनिन् ‘हुम्लामा सडक पुर्‍याउन मेरो पहिलो प्राथमिकता हुन्छ ।’ उनले कर्णालीका महिला, दलित र विपन्न नागरिकको जीवनस्तर उकास्नका लागि उचित नीति तथा कानुन निर्माणमा ध्यान दिने बताइन् ।

पहिलोपटक नेकपा एमाले दैलेखबाट समानुपातिक सांसदको रूपमा संसद् छिरेकी गमता बिकले कर्णालीका दुरदराजका नागरिकको आवश्यकता र अपेक्षा अनुसार प्रदेशसभामा आफ्नो भूमिका निर्वाह गर्ने बताइन् । ‘कर्णालीका अधिकांश घरपरिवारको पहुँचमा अझैँ विद्युत् पुग्न सकेको छैन्, कर्णालीका सबै नागरिकको पहुँचमा विद्युत् पुर्‍याउनुपर्नेछ, त्यसबाहेक सबै नागरिकको पहुँचमा शिक्षा, स्वास्थ्य, खानेपानी पुर्‍याउनुपर्नेछ’, उनले भनिन् । पहिला पटक सांसदको भूमिकामा आएको बताउँदै बिकले सबैको सल्लाहमा जनताको पक्षमा काम गर्ने प्रतिक्रिया दिइन् ।

नेकपा माओवादी केन्द्र हुम्लाबाट समानुपातिक सांसद बनेकी जुम्कित लामाले आदिवासी तथा महिलाको हित हुने खालका काम गर्ने बताइन् । ‘मैले संसद्‌मा जनताले गरेको अपेक्षा, विशेष गरी म आदिवासी जनजाति कोटाबाट आएकी छु, त्यसो हुँदा मैले समर्ग जनजातीको हितको निम्ति आवाज उठाउँछु ।’ लामाले भनिन्, ‘महिला र समग्र जनताको हित हुने तरिकाले नीति निर्माणमा संविधानभित्र रहेर काम गर्छु र अधुरा नीतिलाई पनि संशोधन गर्नमा मेरो जोड हुनेछ ।’

यस्तै, हुम्ला प्रदेशसभा (१) बाट निर्वाचित माओवादी केन्द्रका सांसद रन सिंह परियारले जनतासँग गरेको बाचाअनुसार काम गर्ने बताए । ‘हामीले चुनावका बेला जनतासँग घोषणापत्रमार्फत, घरदैलोमा पुगेर थुप्रै आश्वासन दिएका छौँ, सोहीअनुसार कर्णालीका सबै प्रदेश सभाका सदस्यहरू मिलेर काम गर्छौ,’ उनले भने ।

४० सदस्यीय कर्णाली प्रदेश सभामा नेपाली कांग्रेसका १४, नेकपा माओवादी केन्द्रका १३, नेकपा एमालेका १०, नेकपा एकीकृत समाजवादी र राप्रपाका एक/एक र एक जना स्वतन्त्र गरी ४० जना सांसद रहेका छन् । कर्णाली प्रदेशसभामा २४ जना प्रत्यक्षतर्फ र १६ जना समानुपातिक प्रणालीबाट निर्वाचित भएर आउने व्यवस्था रहेको छ ।

प्रकाशित मिति: सोमबार, पुस ११, २०७९ १८:४९