काठमाडौं प्रहरीले पक्राउ गरेका तामाङलाई ललितपुर प्रहरीले छाड्यो

A+ A A-

बैंकिङ कसुर मुद्दाका आरोपितलाई प्रहरीकै सेटिङमा अनुसन्धानै नगरी छोडेको तथ्य खुलेको छ । ललितपुर प्रहरीले बैंकिङ कसुर मुद्दामा उच्च अदालत पाटनले पक्राउ पुर्जी जारी गरेका आरोपितलाई कुनै अनुसन्धानै नगरी छोडेको हो ।

ललितपुर प्रहरी परिसर स्रोतका अनुसार काठमाडौं–६ नागर्जुनका ३३ वर्षीय ईन्द्र तामाङलाई कुनै अनुसन्धान नै नगरी छोडेको हो । अचम्मको कुरा त तामाङलाई जिल्ला प्रहरी कार्यालय ललितपुरको टोलीले नभई काठमाडौं प्रहरी परिसरको विशेष टोलीले पक्राउ गरेको थियो ।

तामाङलाई काठमाडौं प्रहरीको टोलीले पक्राउ गरेर अनुसन्धानका लागि ललितपुर प्रहरीको जिम्मा दिएको थियो । तामाङविरुद्ध रामकोटकै विकी गुरुङले १५ कात्तिकमा बैंकिङ कसुरमा जिल्ला प्रहरी कार्यालय ललितपुरमा जाहेरी दिएका थिए ।

तामाङले गुरुङलाई सिभिल बैंक जावलाखेल शाखामा रहेको खाताको चेकबाट १६ लाख रुपैयाँ साट्ने गरेर चेक दिएका थिए । तर, उक्त चेक बाउन्स भएपछि गुरुङले तामाङविरुद्ध उपत्यका अपराध अनुसन्धान कार्यालय ललितपुरमा जाहेरी दिएका थिए ।

गुरुङसँग तामाङले क्रसर उद्योग व्यवस्थानको लागि १६ लाख रुपैयाँ मागेका पीडितको भनाइ छ । सोही जाहेरीका आधारमा काठमाडौं प्रहरीले तामाङलाई पक्राउ गरेर ललितपुर प्रहरीलाई बुझाएको हो । तर, ललितपुर प्रहरी प्रमुख एसएसपी यज्ञविनोद पोखरेलले तामाङ पक्राउ परेको बारे पीडीत गुरुङलाई कुनै जानकारी नै नदिई छोडेको प्रहरी स्रोतको दाबी छ ।

बैंकिङ कसुर मुद्दा प्रहरीले मिलापत्र गराउन सक्ने कानुनी व्यवस्था छ । तर पनि पीडित र पीडक दुवै पक्षलाई सहमति गराएर छोड्न सकिन्छ । तर, एसएसपी पोखरेलले भने तामाङसँगको सेटिङमा पीडितलाई कुनै जानकारी नदिई छोडेको खुलेको छ ।

एसएसपी पोखरेलसँग घटनाबारे जानकारी लिन खोज्दा फोनमा कुरा गर्न नसकिने प्रतिक्रिया दिए ।

प्रकाशित मिति: मंगलबार, पुस ५, २०७९ १६:३८