जबरालाई रोक्न सर्वोच्चको गेटमा आज पनि धर्ना दिँदैछ बार

A+ A A-

संसद सचिवालयका महासचिव डा. भरतराज गौतमले महाभियोग निष्क्रिय भएको पत्र दिएपछि प्रधानन्यायाधीश चोलेन्द्र शमशेर जबरा सर्वोच्च फर्किने तयारीमा छन् ।

बुधबार संसद सचिवालयले महाभियोग निष्क्रिय भएको पत्र पठाएपछि प्रधानन्यायाधीश जबरा सर्वोच्चमा हाजिर हुने तयारीमा लागेका थिए । तर, सर्वोच्च फर्कन थालेको सूचना पाएपछि बार एसोसिएन, सर्वोच्च बार आन्दोलित बनेपछि जबरा सर्वोच्च आएनन् । तर, आज प्रधानन्यायाधीश जबरा अदालतमा हाजिर हुनसक्ने भन्दै नेपाल बार एसोसिएसनले सर्वोच्च अदालतमा धर्ना दिने भएको छ । बिहीबार सार्वजनिक बिदा परेकाले आज फेरि बार विरोध प्रदर्शनमा उत्रिन लागेको हो ।

बार एसोसिएसनका अध्यक्ष गोपालकृष्ण घिमिरेले शुक्रबार पनि आफूहरूले प्रधानन्यायाधीश जबरालाई सर्वोच्च छिर्न नदिइने बताए । संसद् सचिवालयका महासचिव गौतमले संविधान र कानुनविपरीत महाभियोग निष्क्रिय भएको पत्र पठाएकाले जबरालाई अदालत प्रवेशमा रोक लगाउने उनले बताए । बिहान पौने १० बजेबाटै सर्वोच्चको गेटमा धर्ना दिने अध्यक्ष घिमिरेले बताए । बारले बुधबार पनि सर्वोच्च अदालतको गेटमा धर्ना दिएको थियो ।

जबरालाई सर्वोच्च छिर्न नदिने रणनीति अनुसार नै बारेले २४ मंसिरमा पोखरामा गर्ने तय गरेको ४८ औं केन्द्रीय कार्यकारिणी बैठक स्थगित गरेको छ । सँगसँगै अन्तर्राष्ट्रिय मानवअधिकार दिवस (डिसेम्बर १०) का दिन पोखरामा गर्ने भनिएको मानवअधिकारसम्बन्धी राष्ट्रिय गोष्ठी आकस्मिक बैठकबाट काठमाडौंमा सार्ने निर्णय बारले गरिसकेको छ ।
प्रधानन्यायाधीश जबराविरुद्ध १ फागुन २०७८ मा संसदमा महाभियोग प्रस्ताव दर्ता भएको थियो ।

प्रकाशित मिति: शुक्रबार, मंसिर २३, २०७९ ०८:४६