पत्र पाएँ, आजै सर्वोच्चमा हाजिर हुने कोसिस गर्छु: चोलेन्द्र शमशेर

A+ A A-

प्रतिनिधिसभामा लागेको महाभियोग नटुंगिएपछि निलम्बित अवस्थामा रहेका प्रधानन्यायाधीश चोलेन्द्र शमशेर जबरा महाभियोग निष्क्रियलगत्तै आजै सर्वोच्चमा हाजिर हुने तयारीमा छन् ।

संघीय संसदका महासचिव डा. भरतराज गौतमले बुधबार राष्ट्रपति कार्यालय, प्रधानमन्त्री कार्यालय, संवैधानिक परिषद्, सर्वोच्च अदालत, न्यायपरिषद् र जबरालाई पत्र पठाएपछि जबरा सर्वोच्च फर्किने बाटो खुलेको हो । गौतमले प्रतिनिधिसभामा महाभियोग दर्ता भएकाले जबराले कार्य सम्पादन गर्न नपाउने भनी १ फागुन २०७८ मा लेखेको पत्र निष्प्रभावी भएको जानकारीसहित पत्र दिएका हुन् ।

‘महाभियोग लगाएर टुंग्याइएन । संसद्को कार्यकाल सकिएपछि पनि नियतवश सर्वोच्च फर्किन दिइएन’ प्रधानन्यायाधीश जबराले शिलापत्रसँग भने, ‘आज बल्ल संसद्ले पत्र पठाएको छ । आजै सर्वोच्चमा हाजिर हुने कोसिसमा छु ।’ जबरालाई सत्ता गठबन्धनका पाँच दलले महाभियोग लगाएका थिए । महाभियोग पारित गर्ने संख्या नपुगेपछि प्रक्रियामै नलगेर जबरालाई निलम्बित अवस्थामै राखिएको थियो ।

प्रतिनिधिसभाको कार्यकाल सकिएपछि महाभियोग स्वतः निष्क्रिय हुने दाबीसहित जबरा सर्वोच्च फर्किन खोजेका थिए । तर, उनलाई निवासबाट बाहिर निस्कन नदिएरै राखिएको थियो । जबरा अवकाश प्राप्त हुन थोरै समय मात्र बाँकी छँदा सर्वोच्च फर्किन लागेका छन् । आफूलाई कामकारबाही गर्न रोक नलगाउन माग गर्दै जबराले मंगलबार मात्रै संसद सचिवालयमा निवेदन दिएका थिए । त्यसको प्रतिउत्तरमा संघीय संसदका महासचिव डा. गौतमले निलम्बन फुकुवा गरिदिएका हुन् । जबराविरुद्ध सत्तारुढ गठबन्धनका ९५ सांसदले १ फागुन ०७८ मा महाभियाेग दर्ता गराएका थिए ।

प्रकाशित मिति: बुधबार, मंसिर २१, २०७९ १३:१४