पाँचथरमा एमालेले विजय जुलुस निकालेपछि भेटियो नगनेको मत, सर्वदलीय बैठक बस्दै

पाँचथरमा एमालेले विजय जुलुस निकालेपछि भेटियो नगनेको मत, सर्वदलीय बैठक बस्दै

A+ A A-

पाँचथरबाट प्रतिनिधिसभामा नेकपा एमालेका उम्मेदवार बसन्त नेम्वाङ निर्वाचित भएको भन्दै नेकपा (एमाले) का नेता कार्यकर्ताहरूले विजय जुलुस निकालिसकेका छन् । तर, नेम्वाङ निर्वाचित भइसकेका भने छैनन् ।

पछिल्लो परिणामअनुसार नेम्वाङले ३२ हजार ११० मत पाएका छन् । उनका प्रतिस्पर्धी नेपाली कांग्रेसका सहमहामन्त्री भीष्मराज आङ्देम्बेले ३२०६३ मत पाएका छन् । यो परिणाममा नेम्वाङले ४७ मतको अग्रता कायम गरेका छन् ।

यही अग्रतालाई आधार मान्दै एमालेका नेता-कार्यकर्ताले विजय जुलुस निकालेका थिए । तर, प्रत्यक्षतर्फको नगनेको मत भेटिएपछि भने सर्वदलीय बैठक बस्न लागेको छ ।

पाँचथरका मुख्य निर्वाचन अधिकृत टिकेन्द्र दाहालका अनुसार त्यहाँ नेम्वाङ निर्वाचित भएको आधिकारिक घोषणा भएको छैन । अर्कातर्फ समुनपातिकतर्फको मतपेटिकामा प्रत्यक्षतर्फको मत भेटिएको छ । जसका कारण पुनः मतगणनाका लागि सर्वदलीय बैठक बस्दैछ ।

दाहालले भनेका छन्- प्रत्यक्षतर्फका केही मतपत्र समानुपातिक तर्फको मतपेटिकामा भेटिएको छ । ती मतपत्र गणनापछि मात्रै मत परिणाम घोषणा हुन्छ गणनाबारे सर्वदलीय बैठक अहिले बस्दै छ । गणना हुन भने बाँकी छ ।

समानुपातिक तर्फको मतपेटिकामा फेला परेको प्रत्यक्षतर्फको मतपत्र गणना नभएको र अन्तिम परिणाम घोषणा भइनसकेको अवस्थामा आज दिउँसो एमालेले विजय जुलुस निकालेको थियो ।

सार्वजनिक भएको मतपरिणामअनुसार नेम्वाङ र आङ्देम्बेको मतान्तर ४७ छ । करिब ३०० मतपत्र समानुपातिक तर्फको मतपेटिकामा हुनसक्ने आङ्देम्बेको शङ्का छ ।

अहिले समानुपातिक तर्फको मतगणना गर्नेबारे सर्वदलीय बैठक बसेको छ । बैठकले मत गणना गर्ने सहमति गरेको छ ।

प्रकाशित मिति: शुक्रबार, मंसिर ९, २०७९ २०:२९