नगरपालिकामा लगानी सम्मेलन : प्रस्तावमा स्मार्ट हाट बजारदेखि रेल वेसम्मका परियोजना

नगरपालिकामा लगानी सम्मेलन : प्रस्तावमा स्मार्ट हाट बजारदेखि रेल वेसम्मका परियोजना

A+ A A-

कृषि, उद्योग व्यापार, पर्यटन पूर्वधारलगायतका क्षेत्रलाई प्राथमिकतामा राख्दै रुपन्देहीको तिलोत्तमा नगरपालिकाले आगामी असोजमा तिलोत्तमा लगानी सम्मेलन आयोजना गर्ने भएको छ । नगरपालिकाले शुक्रबार पत्रकार सम्मेलन गरी ९ असाेजमा लगानी सम्मेलन गर्ने जानकारी गराएकाे हाे । सम्मेलनमा डेढ दर्जनभन्दा बढी परियोजना प्रस्ताव गर्ने जानकारी पनि नगरपालिकाले गराएकाे छ ।

प्रस्तावका लागि तयार गरिएका परियोजनामा तिलोत्तमा कृषि उपज संकलन तथा प्रशोधन केन्द्र, ढाक्रेबास पर्यटकीय स्थल, तिलोत्तमा मासु प्रशोधन केन्द्र, सिटी कलेज, प्रादेशिक बसपार्क, तिलोत्तमा औद्योगिक क्षेत्र, चीन र भारतलाई समेत व्यापारमा जोड्ने गरी बिजनेस हव, रेल वे, रिङरोडलगायत छन् ।

यस्तै, नगरका तीन स्थानमा स्मार्ट हाटबजार, स्मार्ट पार्किङ स्थल, बाल उद्यान, रोहिणी एकीकृत बहुउद्देश्यीय पर्यटकीय स्थल, तिलोत्तमा मिनी नेपाल, महिला तथा बाल अस्पताल र एकीकृत दूध संकलन तथा प्रशोधन केन्द्र रहेका छन् ।

तिलोत्तमा नगरपालिकाका नगरप्रमुख बासुदेव घिमिरेले आर्थिक विकासमा निजी क्षेत्रको उपस्थितिलाई अझ व्यापक बनाउने उद्देश्यले लगानी सम्मेलन आयोजना गर्न लागिएको बताए । लगानी सम्मेलनबाट २ अर्ब लगानी भित्र्याउने नगरपालिकाको लक्ष्य छ ।

सम्मेलनमा आयोजकसहित संघीय तथा प्रदेश सरकारका मन्त्री, सांसद, प्रमुख राजनीतिक दलका नेता, सरकारका उच्चपदस्थ प्रतिनिधि, नेपालस्थित विदेशी कूटनीतिक नियोगका प्रतिनिधि, विकास साझेदार संस्थाका प्रतिनिधि, नेपाली निजी क्षेत्र, गैरआवासीय नेपाली र स्वदेशी तथा विदेशी लगानीकर्तासमेत गरी ५ सय जनाको सहभागिता रहने नगरपालिकाकाे अपेक्षा छ ।

सम्मेलनका लागि करिब ३० लाख खर्च हुने अनुमान गरिएको छ । यसमध्ये नगरपालिकाको तर्फबाट २० लाख रुपैंयाँ विनियोजन गरिएको छ भने बाँकी रकम निजी क्षेत्रबाट जुटाउने लक्ष्य रहेको नगरपालिकाले जनाएको छ ।

सम्मेलनका लागि निजी क्षेत्रसँग सम्बद्ध संघ–संस्थासँग सहकार्य गरिएको नगर उप–प्रमुख जागेश्वरी चौधरीले बताइन् ।

प्रकाशित मिति: शनिबार, साउन २५, २०७६ १८:१७