मकवानपुरका यी उम्मेदवार जसले आफैंलाई भोट हाल्न पाउँदैनन्

A+ A A-

संविधान जारी भएपछिको दोस्रो आमनिर्वाचन भोलि आइबार हुँदैछ । प्रतिनिधिसभा र प्रदेशसभा सदस्यहरू चुन्न देशभर मतदान हुँदैछ । मकवानपुरका दुईवटा प्रतिनिधिसभा र ४ वटा प्रदेशसभा निर्वाचन क्षेत्रमा राजनीतिक दल र स्वतन्त्र गरी ६० जनाभन्दा बढी उम्मेदवार मैदानमा छन् ।

मकवानपुरमा चार जना उम्मेदवारहरूले भने आफैंलाई भोट हाल्न पाउँदैनन् । आफ्नो मतदाता नामावली भएको निर्वाचन क्षेत्रभन्दा बाहिर उम्मेदवारी दिएपछि उनीहरूले आफैंलाई भोट हाल्न नपाउने भएका हुन् । यसरी आफूले आफैंलाई नै भोट हाल्न नपाउनेमा मकवानपुरको प्रतिनिधिसभा क्षेत्र नम्बर २ मा गठबन्धनबाट उम्मेदवार रहेका नेकपा (एकीकृत समाजवादी)का विरोध खतिवडा रहेका छन् । हेटौँडा उपमहानगरपालिका–४ का मतदाता खतिवडा भने २ नम्बर क्षेत्रबाट उठेका छन् ।

उनले विगतका निर्वाचनमा पनि २ नम्बर क्षेत्रबाटै प्रतिस्पर्धा गरेकाले आफैंलाई भोट हाल्न पाएका थिएनन् । खतिवडा २०७४ को निर्वाचनमा पनि मकवानपुर–२ बाट उठेर निर्वाचित भएका थिए । उनले भुटनदेवी माविको मतदान केन्द्रमा भोट हालेर आफू लडेको निर्वाचन क्षेत्रमा खटिने गर्दै आएका थिए ।

खतिवडासँग प्रतिस्पर्धामा रहेका राप्रपाका उम्मेदवार राजन मैनालीले पनि आफैंलाई भोट हाल्न पाउँदैनन् । यसैगरी प्रतिनिधिसभा २ नम्बर क्षेत्रअन्तर्गत् प्रदेशसभा (१) र (२)मा गठबन्धनबाट उम्मेदवार रहेका क्रमशः माओवादी केन्द्रकी केन्द्रीय सदस्य कुमारी मोक्तान र नेपाली कांग्रेस बागमती प्रदेश सभापति इन्द्रबहादुर बानियाँले पनि आफैंलाई भोट हाल्न पाउने छैनन् । मोक्तानको मतदान केन्द्र हेटौँडा–१३, स्थित कालिका निमावि हो । जुन, क्षेत्र नम्बर १ मा पर्दछ । बानियाँको मतदान केन्द्र क्षेत्र नम्बर १ हेटौंडा उपमहानगरपालिका–१८, स्थित कमला निमावि हो ।

एमालेबाट निर्वाचन क्षेत्र १ (२) मा उम्मेदवार रहेका पार्टी जिल्ला अध्यक्षमेत रहेका एकालाल श्रेष्ठले आफैंलाई भोट हाल्न पाउँदैनन् । उनको स्थायी बसोबास निर्वाचन क्षेत्रभित्र अर्थात हेटौँडा–४ भित्र रहे पनि उनको मतदाता नामावलीमा नाम हेटौँडा–१ नम्बर वडा अर्थात् प्रदेशसभा २ को (१) बाट रहेको छ ।