काठमाडौं- ४ मा गगन र राजनमध्ये को बलियो ?

A+ A A-

काठमाडौं- ४ मा मुख्य प्रतिस्पर्धा कांग्रेसका गगन थापा र एमाले डा. राजन भट्टराईबीच नै हुनेछ । थापा ‘ह्याट्रिक’ जित निकाल्ने दाउमा छन् भने डा. भट्टराई थापालाई रोक्न चाहन्छन् । उनीहरूको चुनावी अभियान पनि निकै तीव्र रह्यो । दुवै उम्मेदवारले निर्वाचन क्षेत्रको तल्लो भेगदेखि डाँडाकाँडा चहारेर भोट मागे ।

यसपालि थापा र भट्टराईमध्ये को आउला ? धेरैलाई चासो छ ।

हामीले काठमाडौं- ४ का केही वडा घुमेर मतदातासँग कुरा गर्दा आधा-आधा मतदाताले गगन र राजनको नाम लिएका थिए । राजन भट्टराईको नाम लिनेहरूले उनलाई मौका दिने बताए भने गगन थापाको नाम लिनेहरूले प्रधानमन्त्रीका लागि सम्भावित उम्मेदवार भएकाले भोट दिने बताएका थिए ।

अघिल्लो चुनावमा थापाले तीन हजार बढी मत ल्याएर भट्टराईलाई पराजित गरेका थिए । २१ हजार ५ सय ५८ मतका साथ गगन विजयी हुँदा राजनले १८ हजार १ सय ४० मत पाएका थिए । त्यो बेला राजनलाई माओवादीको पनि साथ थियो । यसपालि माओवादीसहित एमालेबाट फुटेको नेकपा एसले गगनलाई समर्थन गरेका छन् ।

वाम-लोकतान्त्रिक गठबन्धनका साझा उम्मेदवार भएकाले गगनलाई यसपालि झनै सजिलो हुने तर्क धेरैले गरिरहेका छन् । तर यो तर्कले पूरापूर काम नगर्न सक्छ । किनकि, अर्को खालको एक अनुमानले काम गरेमा गगनलाई पनि गाह्रो पर्न सक्छ । उनले आफूलाई पार्टीको भावी नेतृत्व र प्रधानमन्त्री उम्मेदवारका रूपमा प्रचार गरिरहेका छन् । यस्तो प्रचारले मतदातालाई धेरथोर लोभ्याउन सक्ला । तर यसबाट झस्किएका कांग्रेसकै वर्तमान नेतृत्वबाट असहयोग हुनसक्ने अड्कलबाजी छ । यद्यपि, गठबन्धनमा गडबडी र पार्टीबाट अन्तर्घात नभए गगनलाई खासै अप्ठेराे छैन ।

एमालेका राजनले पहिल्यैदेखि चुनावी तयारी गरेका थिए । आफू पुग्न र भेट्न नसकेका मतदातासँग उनले फोनबाटै भोट मागेका थिए ।

सम्बन्धित समाचार

गगन थापा र राजन भट्टराईको चुनावी क्षेत्रमा जनगुनासो- धुलाे झेलाैँला नेताजी, बाढी राेकिदिनाेस् (भिडियाेसहित)

प्रतिनिधिसभा चुनावको नतिजा प्रक्षेपण गर्ने एउटा आधार गत स्थानीय तहमा वडाध्यक्षका उम्मेदवारहरूले पाएको मत पनि हो । काठमाडौं- ४ मा महानगरपालिकाको १, ७, ८ र ३० वडाहरू र बुढानिलकण्ठका- १, २, ८, ९, १०, ११, १२ र १३ वडाहरू पर्छन् । महानगरका वडामा कांग्रेस बलियो छ । तर बुढानिलकण्ठतिरका अधिकांश वडामा एमालेको वर्चस्व छ । गत वैशाखमा भएको स्थानीय चुनावमा काठमाडौंका ७, ८ र ३० वडामा मात्रै कांग्रेसका उम्मेदवार विजयी भएका थिए । यसबाहेक काठमाडौं निर्वाचन क्षेत्र नम्बर ४ मा पर्ने ९ वटा वडामा एमालेका उम्मेदवारले चुनाव जितेका थिए ।

काठमाडौं- ४ मा ६९६५२ मतदाता भए पनि स्थानीय तहको चुनावमा चानचुन ३७ हजार मत खसेको थियो । सात महिनाअघि भएको स्थानीय चुनावमा काठमाडौं- ४ का पालिकाहरूमा एमालेले १६५०७ मत पाएको थियो । यसैगरी, कांग्रेसले १५७६३, नेकपा एसले २४१४, राप्रपाले २२९३, माओवादीले ८४४ र जसपाले ३१७ मत पाएका थिए ।

वाम लोकतान्त्रिक गठबन्धनमा कांग्रेससहित माओवादी र नेकपा एस छन् । यसरी हेर्दा गठबन्धनसँग १९ हजार २१ मत छ । एमालेसँग जसपासहितको गरी १६ हजार ८ सय २४ भोट देखिन्छ । राप्रपाको आफ्नै उम्मेदवार भएकाले यो क्षेत्रमा एमालेलाई राप्रपाको सहयोग नमिल्ने देखिन्छ । यो हिसाबले गगनलाई बलियो देखाउँछ ।

आ-आफ्नै तर्क

आगामी चुनावमा दुवै उम्मेदवार एकअर्कासित डराएको चाहिँ प्रस्ट बुझ्न सकिन्छ । त्यसैले चुनावी प्रचार उनीहरूले तीव्रतासाथ अघि बढाए ।

पार्टी महामन्त्री भएसँगै राजनीतिक प्रभाव बढाएका गगन चुनावको तयारीमा जुट्दा राजन मतदाता रिझाउन थालिसकेका थिए । यही क्षेत्रबाट जितेर एकपल्ट मन्त्री भएका गगनले पार्टीभित्रैबाट हुनसक्ने असहयोगको बेवास्ता गर्दै मतदातामाझ आफूलाई ‘भावी प्रधानमन्त्री’का रूपमा चिनाइरहेका छन् । उनका लागि भोट मागिदिनेहरूले उनलाई जिताए काठमाडौं- ४ ले प्रधानमन्त्री पाउने तर्क गरिरहेका छन् ।

तर निर्वाचन क्षेत्रमा राजनलाई मौका दिनुपर्छ भन्ने आवाज पनि पातलोचाहिँ छैन । उनका समर्थक पनि एमाले सत्तामा रहँदा राजन भट्टराईले सांसद नभएर पनि आफ्नो क्षेत्रका लागि थुप्रै काम गरेको दाबी गरिरहेका छन् । साथै गगन थापालाई दुईपल्ट हेरिएकाले अब एकपल्ट राजनलाई हेर्नुपर्ने बताइरहेका छन् ।

राजनको आफ्नै ‘कार्ड’

गगनले ‘भावी प्रधानमन्त्री’को कार्ड फालेजस्तै राजनको आफ्नै ‘कार्ड’ छ । चुनावपछाडि कांग्रेसकै सरकार बन्छ भन्ने कुनै ग्यारेन्टी नभएको कुरा उनी मतदातालाई सम्झाउँदै छन् ।

समीकरण बदलिएर एमाले सत्तामा आउन सक्ने तर्क राजनलाई भोट मागिरहेकाहरूको छ । एमाले अध्यक्ष ओली प्रधानमन्त्री हुँदा राजन उनका पराराष्ट्र मामिला सल्लाहकार थिए । हाल उनी एमाले विदेश विभाग प्रमुख छन् । चुनावपछि एमालेको सरकार बन्ने अवस्था आएमा राजन पक्का मन्त्री हुने लोभ पनि काठमाडौं- ४ का एमालेजनले मतदातालाई देखाइरहेका छन् । अघिल्ला दुई चुनावमा गगनलाई मौका दिइएकाले यसपल्ट आफूलाई भोट दिन राजनले अपिल गरिरहेका छन् । कतिपयको अनुमानमा उनलाई सहानुभूति भोट पनि आउन सक्छ । गगनलाई आफ्नै पार्टीबाट असहयोग भएमा र अघिल्लो चुनावको तुलनामा केही भोट बढाएमा राजनको सम्भावना पनि गगनको भन्दा कम छैन ।

गगनचाहिँ डाटामा विश्वास गर्ने नेतामा पर्छन् । उनले आफूले पाउने मतको गणित निकालिसकेका छन्, जसले गगनकै जित देखाएको छ । राजनचाहिँ यसपालि गगनको गणित मिल्न नदिने दाउमा छन् । उम्मेदवारले जेजस्तो दाबी गरे पनि जितहारको अन्तिम टुङ्गोचाहिँ मतगणनापछि नै थाहा हुने छ ।

सम्बन्धित समाचार