‘नो, नट अगेन’ होइन, अब मेरो टेस्ट हुनुपर्छ : रामचन्द्र पौडेल

A+ A A-

कांग्रेस वरिष्ठ नेता रामचन्द्र पौडेलको तनहुँ दमौलीस्थित चार दशक पुरानो घरमा अहिले बिहान–बेलुका कार्यकर्ताको भिड हुन्छ । उनी आफूले भ्याएसम्म सबैको कुरा सुनिरहेका भेटिन्छन् । चुनावपछि प्रधानमन्त्री बन्नुहोला भनेर उनलाई भेट्नेहरू छुट्टिन्छन् ।

तनहुँ १ बाट उम्मेदवार रहेका ७९ वर्षीय पौडेल ४ मंसिरको चुनावपछि गठबन्धनको सहयोगमा प्रधानमन्त्री बन्न चाहन्छन् । त्यो दौडमा पुग्नलाई उनले पहिला चुनाव जित्नुपर्छ ।

स्थानीय तहको मतपरिणाम हेर्दा मुख्य प्रतिस्पर्धी एमालेभन्दा गठबन्धन २१ हजार मतले अगाडि छ । यो अंकगणितले पौडेललाई सजिलो देखिए पनि कांग्रेसबाट कारबाहीमा रहेका पूर्वसहमहामन्त्री गोविन्दराज जोशीको उम्मेदवारी परेको छ, जुन केही चुनौती हो । उनले कांग्रेसको मत काट्ने भएकाले गठबन्धनका नेता/कार्यकर्तामा केही डर भने देखिन्छ ।

दमौलीमा चर्चाः गोविन्दको बढीमा १० हजार मत, अन्तिममा समर्थनको डर

एउटा चुनावी सभामा भानु नगरपालिका– १२, अर्चले पुगेका पौडेललाई स्थानीयले १२ किलोको माला लगाइदिएर १२ वटै माग राख्दै विजयको शुभकामना दिए । पौडेलले पनि अहिले १२ हजारभन्दा बढी मतले जित्ने दाबी गर्न थालेका छन् ।

उनी अरू नेताले एकपटक अवसर पाइसकेकाले अब आफूले कार्यकारी नेतृत्व पाउनुपर्ने दाबी गर्छन् । चुनाव प्रचारको अन्तिमतिर रहेका उनै नेता पौडेलसँग दमौलीस्थित उनको निवासमा पुगेर समसामयिक विषयमा शिलापत्रकर्मी अनुप पौडेलले कुराकानी गरेका छन्ः

तपाईंलाई तनहुँका जनताले १२ किलोको माला लगाइदिएर आफ्ना माग राख्दै जित्नुहोला भनेर शुभेच्छा दिएका छन् । जित्नुहुन्छ ?

परिस्थितिको अनुभव र अध्ययन गरेर, यहाँको वास्तविकता बुझेर उहाँहरूले त्यसो गर्नुभएको हो । १२ हजारभन्दा तलको मतान्तर नहोला ।

तपाईं लड्ने क्षेत्रमा एमालेका उम्मेदवारबाहेक कांग्रेसकै पूर्वपदाधिकारी उम्मेदवार पनि हुनुहुन्छ । जोशीजीको उम्मेदवारीलाई कत्तिको चुनौती मान्नुभएको छ ?

उहाँ गएको स्थानीय चुनावदेखि एमालेसँग टाँसिन पुग्नुभयो । २०७४ सालको निर्वाचनमा पनि उहाँ एमालेकै उम्मेदवार बोकेर हिँड्नुभएको हो । त्यस कारण उहाँले जति भ्रम छर्नुपर्ने थियो, छर्नुभएकै छ । उहाँले छरेका भ्रम निवारण भइरहेका छन् ।

कहाँ कांग्रेस छन् त्यहाँ गएर म पनि कांग्रेस हुँ भन्ने भ्रम पार्न उठेका उम्मेदवारबारे केही भन्दिनँ । कतिले अघिल्लोपटक गल्ती गरिसके । कतिपटक गर्लान् र ?

तपाईं पटकपटक प्रयास गर्दा पनि कहिल्यै पार्टी र सरकारको नेतृत्व गर्ने तहमा पुग्न सक्नुभएन । अहिले प्रधानमन्त्री हुन्छु भन्ने अभिव्यक्ति सुनिइरहेको छ । यो चुनावपछि प्रधानमन्त्री बन्ने सम्भावना छ ?

परिस्थिति त्यस्तै भयो, अनुकूल नपरेका कारणले म पछि परेकै हो । अहिलेको राष्ट्रको आवश्यकता र परिस्थिति हेर्दा, देशलाई सुशासनको खाँचो छ । त्यो पूरा गर्न र मुलुकको विकासका लागि जुन अनिवार्यता छ, त्यो कार्यकारी नेतृत्व मेरो हातमा आए देशको उद्धार हुन्छ भनेरै मैले यो कुरा भनेको हो ।

प्रधानमन्त्रीका आकांक्षी धेरै हुनुहुन्छ । यही कारणले गठबन्धनमा खटपट हुने त होइन ?

गठबन्धनमा खटपट किन हुने ? आकांक्षा सबैको हुन्छ । सबैको सर्वस्वीकार्य व्यक्ति मै हो नि । मान्न मिल्ने व्यक्ति म नै हो ।

यो दाबीका आधार के छन् ?

सबैभन्दा म सिनियर नेता हुँ । गठबन्धनको सूत्रधार पनि मै हुँ । आमजनताको धारणा पनि रामचन्द्रलाई न्याय हुनुपर्छ भन्ने छ । यिनै हुन् मेरा आधार ।

यो अन्तिम चुनाव त होला नि है ?

चुनाव सधैँ लडिराख्न गाह्रै हुन्छ । तृष्णाको पनि सीमा हुन्छ । त्यस कारण यो विषयमा अन्यथा भन्दिनँ ।

प्रतिस्पर्धीलाई कहिल्यै कमजोर सोच्नुहुँदैन भनिन्छ । गोविन्दराज जोशी, एमालेका एकबहादुर रानासहित अन्य दलका उम्मेदवारलाई कसरी लिनुभएको छ ?

एमालेको यहाँ २० हजारजति भोट छ । त्यसलाई मैले ‘अन्डरस्टिमेट’ गरेकै छैन । आफ्नो भोटलाई कति सम्हाल्न सक्नुहुन्छ, उहाँहरूकै क्षमतामा भर पर्छ । एमालेको भोट पनि मलाई आउने विश्वास छ ।

कहाँ कांग्रेस छन् त्यहाँ गएर म पनि कांग्रेस हुँ भन्ने भ्रम पार्न उठेका उम्मेदवारबारे केही भन्दिनँ । कतिले अघिल्लोपटक गल्ती गरिसके । कतिपटक गर्लान् र ? गएको चुनावमा कांग्रेसभित्र अन्तर्घात गरेर, कांग्रेसकै भोटलाई अन्तर्घात गरेर, दिग्भ्रमित पार्दा गएको चुनावमा त्यस्तो परिणाम आएको हो । त्यो भ्रम सधैँ रहन्छ भन्ने मलाई लाग्दैन ।

ठीक हो, म रामचन्द्रलाई हराउनै आएको हो : गाेविन्दराज जाेशी (अन्तर्वार्ता)

मन्त्री, सभामुख हुनुभयो । यत्तिका वर्ष तनहुँको नेता हुँदा नगरेका र अब जितेर पाँच वर्षमा गर्छु भन्ने ‘ड्रिम प्रोजेक्ट’ के छन् ?

कति समय राजनीतिक खिचातानीमै बित्यो । त्यसले गर्दा जसरी काम गर्न इच्छा भए पनि हुन पाएको थिएन । यसपटक देशलाई विकासको बाटोमा, आर्थिक क्रान्तिको क्षेत्रमा पाइला चाल्ने, प्राथमिकता छुट्याएर काम गर्ने दृष्टिले अवसर आएको छ । यो अवसरलाई नेपालले गुमाउनु हुँदैन । अब चुनावपछि हामी एक फड्को अगाडि बढिहाल्छौँ ।

तनहुँका लागि मात्र होइन, देशकै लागि एउटा नमुना कार्य अघि बढाउँछु । तनहुँका लागि गर्नुपर्ने धेरै छन् । आदिकवि भानुभक्तको जन्म ठाउँलाई भानु साहित्य उत्थानको रूपमा एउटा विचित्रको ठाउँको रूपमा विकास गर्न खोजेको छु । यहाँका जलविद्युत् आयोजनालाई अघि बढाउने काम गरिरहेको छु ।

गण्डकी प्रदेशकै ठूलो अस्पताल यहाँ बनाउने योजना अगाडि बढाएको छु । जीपी कोइराला श्वासप्रश्वास अस्पताललाई स्वास्थ्य विज्ञान प्रतिष्ठान बनाउने काम मैले गर्दैछु । तनहुँमा पर्यटनको क्षेत्रमा एउटा नमुना प्रस्तुत गर्न चाहन्छु ।

गठबन्धनको भविष्यमा धेरैको शंका छ । कहिलेसम्म रहन्छ ?

गठबन्धन अहिलेको आवश्यकता हो, किनभने यहाँ प्रतिगमनका हर्कत र चलखेल जारी छन् । तिनीहरूको गतिविधिलाई ठिक ठाउँमा पुर्‍याएर नटुंग्याएसम्म रहन्छ ।

देशभर स्वतन्त्र उम्मेदवारको लहर पनि छ । यसलाई कसरी लिनुभएको छ ?

अहिलेसम्मका काम गर्ने तौरतरिका मिलेका छैनन् । त्यसै भएकाले पनि म आफैँले कार्यकारी सत्तामा हस्तक्षेप गर्न चाहन्छु भन्नुपरेको छ । काम गर्दाको तरिका नमिल्दा असन्तुष्टिको झिल्का जहाँतहीँ देखिएको छ । तर, त्यो क्षणिक कुरा मात्रै हो । किनभने दिगो राजनीति गरेका, ५० वर्ष चलेका पार्टी नै टिकाउ हुने हुन् ।

मेरोबारे त्यो नो नट अगेन भन्ने लागू हुँदैन । एकफेर टेस्टेड भइसकेकालाई ‘नो, नट अगेन’ भन्न सक्नुहोला । म त फ्रेस हो, अगेन होइन । मुलुकका लागि परीक्षण नभएको मान्छे हो । त्यस कारण अब मेरो टेस्ट हुनुपर्छ । मेरो यही दाबी छ ।

व्यक्तिगत उम्मेदवारीले कहीँकहीँ मान्छेलाई प्रभाव पार्ला, नत्र केही गर्दैन । मुख्य कुरा के हो भने नेताहरूले जनतालाई हेप्नुहुँदैन । आफ्ना मान्छेलाई जबर्जस्ती ल्याउँछन् र जनतालाई जुन आचरण गर्नुपर्ने हो, त्यो गर्दैनन्, त्यस्तो बेला असन्तुष्टिका स्वर सुनिनु स्वाभाविक पनि हो । तर, त्यस्ता कुरा स्थायी होइनन् । सच्याएर अगाडि बढ्न आवश्यक छ ।

तपाईंसहित शीर्ष नेतालाई लिएर ‘नो, नट अगेन’ भन्ने अभियान चलिरहेको छ । यसबारे यहाँको टिप्पणी के छ ?

मेरोबारे त्यो नो नट अगेन भन्ने लागू हुँदैन । एकफेर टेस्टेड भइसकेकालाई ‘नो, नट अगेन’ भन्न सक्नुहोला । म त फ्रेस हो, अगेन होइन । मुलुकका लागि परीक्षण नभएको मान्छे हो । त्यस कारण अब मेरो टेस्ट हुनुपर्छ । मेरो यही दाबी छ ।

सत्तामा त पुग्नुभएको हो नि !

कार्यकारी अधिकार मेरो हातमा कहिल्यै आएन । म त सरलीकृत भएर अहिलेसम्म काम गरेको हो ।

यत्तिका वर्ष परिवर्तन भनेर जेलनेल भोग्नुभयो, आन्दोलन गर्नुभयो । आजको दिनमा आउँदा बाटो सही रोजेछु भन्ने लाग्छ कि कतै गलत भइयो भन्ने हुन्छ ?

मलाई कहिल्यै गलत भयो भन्ने लाग्दैन । म ‘निमुखालाई न्याय, विपन्नलाई आय’ भन्ने नारा साकार पार्न विद्यार्थीकालदेखि नै लागेको हुँ ।

नेपाली कांग्रेसको सिद्धान्त प्रजातान्त्रिक समाजवादलाई वास्तविक रूपमा कार्यान्वयन गर्नुपर्छ भन्ने मेरो २०१४/२०१५ सालदेखिकै सोच हो । त्यसैमा अझै पूर्णता भएन, साकार हुन सकेन, मैले सक्छु भन्ने लागेर नै म फेरि चुनाव लड्न आएको हुँ ।

प्रकाशित मिति: मंगलबार, कात्तिक २९, २०७९ ०६:५८