भाउजूले बोल्यो कि कांग्रेसलाई पोल्यो ! (भिडियाेसहित)

A+ A A-

जात्रैजात्रा फिल्ममा विपिन कार्कीको एउटा डायलग छ क्या, ‘के बोल्या भाइ, के बोल्या, के जथाभावी बोल्या ?’

यो डाइलगलाई कांग्रेसजनले थोरै सच्याएर प्रयोग गर्नुपर्ने बेला आएको छ, ‘ए भाउजू के बोल्या ?’

नत्र कुरो बिग्रँदैबिग्रँदै जाने भो क्या !

सत्तारुढ पार्टीकी नेतृ, अझ फर्स्ट लेडी आरजु राणा पति शेरबहादुर देउवालाई भोट माग्न डडेल्धुरामा छिन् । हिजो एक चुनावी सभामा उनले माइक समातिन् । आफ्ना नेताले माइक समातेपछि कार्यकर्ता उत्साहित हुनुपर्ने हो नि ! तर हामीकहाँ कांग्रेसीका दुःख अर्कै छन् । आरजु भाउजूले माइक समातेपछि कांग्रेसजन डराउनुपर्ने स्थिति छ, उनले बोल्यो कि पार्टीलाई पोल्यो ! कम्ता रकमी कुरा गर्ने भा पाे ! कांग्रेसीका थप दुःख, 'हाइकमाण्ड' हुन्- ताली त बजाउनैपर्छ ।

आरजुले हिजो गन्यापधारा पुगेर एक विवादभरी भाषण गरिन् । आफ्ना पतिका प्रतिस्पर्धीहरू गरिब र पहुँचहीन छन्, तिनलाई जिताएर के काम भन्ने आशयसाथ उनले भनिन्, ‘हेलिकोप्टरमा चढेर आउन सक्ने मान्छेलाई जिताउनुस् ।’

उनले सगाैरव गरेकाे भाषणको एक अंश पढ्नुस् त :

यो गाउँठाउँलाई बनाउने, यो व्यवस्थालाई अगाडि सार्ने, संविधानको रक्षा गर्ने, हाम्रो देशमा शान्ति हुने, समृद्धि हुने र योभन्दा अगाडि जसरी आज हामी हेलिकोप्टरमा आयौँ । आजभन्दा १०/१५ वर्षअगाडिदेखि हेलिकोप्टरमा उडेर यहाँ आउन सक्ने, क्षमता बनाउन सक्ने मान्छेलाई छान्नुहोस् । नेपाली कांग्रेसको रुख छापमा भोट हाल्नुहोस् । तपाईंहरूकै गाउँको शेरबहादुर देउवाजीलाई, प्रदेशमा गोविन्द बोहोराजीलाई जिताउनुस् ।

अब हेर्नुहाेस्ः

भाउजूले शक्ति र पहुँचको धाक लडाएको यो पहिलोपल्टचाहिँ होइन । स्थानीय चुनावताका डडेल्धुरा पुगेर उनले जनता धम्क्याएकी थिइन्, ‘कांग्रेसले नजितेको स्थानमा हामी बजेट पठाउँदैनौँ ।’ उनी यतिमै रोकिइनन्, कैलालीको धनगढी उपमहानगरपालिकामा एक मञ्चमा उभिएर उनले स्थानीय युवालाई कामका लागि मलेसिया पठाइदिने कसम खाइन् । जनताका छोराछोरीलाई मलेसिया पठाइदिन्छु भन्ने अनि नेताचाहिँ हेलिकोप्टर चार्टर गर्नसक्ने हैसियतको हुनुपर्ने ?

देउवाले प्रतिनिधिसभा सदस्य उम्मेदवारी दर्ता गराएकाे दिन आरजुले डडेल्धुराबासीलाई प्रधानमन्त्रीको सरकारी निवास बालुवाटारमा सजिलै छिर्न दिने भनेकी थिइन्, ‘खुलजा सिमसिम’ भन्नेबित्तिकै बालुवाटारको ढोका खुल्छ ।’

त्यसबेला उनको भाषण सुनेर कांग्रेसका प्रखर भनिएका युवा नेता पनि अवाक् भएका हुँदा हुन् । पार्टी जवाफदेही हुन्थ्याे भने हिजाे उनले गरेकाे भाषण पनि कम पिर पार्ने खालकाे थिएन ।

याे पनि..

'चुनावका बेला म्यानपावर र एजेन्टलाई मान्छे बेच्न छुट दिएर चन्दा उठाइन्छ'

साझा सवालमा आफूलाई कठिन प्रश्न गर्दा देउवाले हप्काएका युवा सागर ढकालले स्वतन्त्र उम्मेदवारी दिएर देउवालाई नै चुनाैती दिइरहेका छन् । यसबाहेक कांग्रेस बिपीका कर्णबहादुर मल्लका साथै स्वतन्त्र उम्मेदवारविक्रम शाही, लाल कठायत र कर्णसिंह रावल पनि देउवाकै क्षेत्रमा प्रतिनिधिसभा सदस्य उम्मेदवार छन् । उनीहरूलाई भोट नदिनुस् भन्न आरजुले अपनाएको भोट माग्ने तरिकालाई 'रामराम' शिवाय अरु के नै भन्न सकिएला र !

खासमा उनी मनोविज्ञानकी पीएचडी हुन् । जनता, अझ गाउँतिरका जनताबाट कसरी भोट तान्न सकिन्छ भन्ने कुरामा उनले आफ्नो विज्ञता प्रयोग गर्न खोजेको हुनुपर्छ ।

त्यसैले उनका अक्सर भाषणमा सत्ता र दौलतको अहम् झल्किन्छ । उनका पति यो देशमा पाँचपल्ट प्रधानमन्त्री भइसकेका व्यक्ति हुन् । अहिले पनि प्रधानमन्त्री छन् । सधैँ सत्ता र शक्तिको वरिपरि भएकाले हेलिकोप्टरमा निर्वाचन क्षेत्र जानु उनका लागि ठूलो कुरा होइन । तर उनलाई चुनौती दिँदै मैदानमा निस्केकाहरूले कहाँबाट ल्याऊन् हेलिकोप्टर ? कसका लागि ल्याऊन् हेलिकोप्टर ?

उनको भाषणलाई यसरी पनि अर्थ्याउन सकिन्छ, नेता हुन मूलतः (हेलिकोप्टर चढ्नसक्ने) हैसियत चाहिन्छ, जनताका आधारभूत आवश्यकता पूरा गर्ने योजना, समाज विकासको दृष्टिकोण यसका अगाडि गौण हुन् ।

अर्को कुरा, प्रतिस्पर्धीसँग डराएर पनि भाउजूलाई रकमी भाषणको जुक्ति फुरेको हुनसक्छ । ०४८ सालदेखि लगातार चुनाव जितेका उनका पतिले जनतालाई पनि हेलिकोप्टर चढ्न सक्ने हैसियतमा पुर्‍याएको भए अहिले यति तल गिरेर किन बोल्नुपर्ने नौवत किन आउँथ्यो होला नि ।

प्रकाशित मिति: शनिबार, कात्तिक १९, २०७९ १३:४४