रवि लामिछानेले डेब्यु चुनाव जित्ने सम्भावना कति ? (भिडियो)

A+ A A-

टेलिभिजन प्रस्तोता रवि लामिछाने ‘राजनीतिको फोहोर सफा गर्ने’ भन्दै पहिलोपटक संसदीय चुनावको मैदानमा छन् । राष्ट्रिय स्वतन्त्र पार्टीका संयोजकसमेत रहेका उनको सङ्घीय संसदमा बागमती प्रदेशको चितवन–२ बाट आउने तयारी छ । यतिबेला उनी चुनावी अभियानमा छन् । उनको चुनाव चिह्न घन्टी हो ।

काठमाडौंमा चुनाव लड्ने चर्चा चलाएर चितवन पुगेका लामिछाने मतदाताकहाँ गएर एजेन्डा सुनाउँदै मत मागिरहेका छन् । आफू नै जनताको सच्चा प्रतिनिधि बन्ने भन्दै कसम खाइरहेका छन् । भ्रष्टाचार नियन्त्रण, सुशासन कायमदेखि विकास निर्माण, सार्वजनिक निकायबाट जनमुखी सेवा प्रवाह, शिक्षा र स्वास्थ्यसम्बन्धी सेवा निःशुल्क हुनुपर्ने, रोजगारी सिर्जनादेखि सु–संस्कृत राजनीतिको एजेन्डा उनले उठान गर्दै आएका छन् ।

हालै स्थापित दलका तर्फबाट चुनाव लड्न लागेका लामिछानेलाई जितका लागि सहज भने पक्कै हुने छैन । यद्यपि, उनले स्वतन्त्र र युवाको मत तान्ने प्रयास गरिरहेका छन् । दलहरूका असन्तुष्ट मत पनि तान्न रविको ध्यान केन्द्रित छ ।

त्यसो त, लामिछानेका चुनावी प्रतिस्पर्धी कमजोर नेताहरू भने छैनन् । संसद्को विषयगत समिति कानुन, न्याय तथा मानव अधिकार समितिका पूर्वसभापतिसमेत रहेका एमाले नेता कृष्णभक्त पोखरेलदेखि प्रधानमन्त्री तथा मन्त्रिपरिषद् कार्यालयका राज्यमन्त्री उमेश श्रेष्ठसम्म प्रतिस्पर्धी छन् ।

पोखरेल चितवन–२ बाट दुई पटक चुनाव जितेका नेता हुन् । २०७४ मा पोखरेलले वाम गठबन्धनको उम्मेदवार बन्दा ४४ हजार ६७० मतसहित चुनाव जितेका थिए । उनको गृह जिल्ला पनि चितवन नै हो । राज्यमन्त्री श्रेष्ठको व्यावसायिक सम्बन्ध चितवनसँग छ । लामिछाने भने पाहुना प्रतिस्पर्धी हुन् । त्यसमाथि, श्रेष्ठलाई माओवादीसहित सत्ता गठबन्धन दलहरूको समर्थन छ । प्रधानमन्त्री शेरबहादुर देउवानिकट पनि मानिन्छन्, श्रेष्ठ ।

पोखरेल चितवन २ मा ह्याट्रिक गर्ने दाउमा छन् भने श्रेष्ठ गठबन्धनको बलमा प्रत्यक्ष निर्वाचनबाट पहिलो पटक संसद् छिर्ने रणनीति बनाउँदैछन् । यी कारणले पनि पोखरेल र श्रेष्ठ चितवन–२ मा बलिया उम्मेदवार मानिन्छन् । उनीहरूलाई पराजित गरेर संसद् यात्रा तय गर्न रविलाई सजिलो छैन । दमदार भाषणकला भएका उनी सत्ता गठबन्धनका श्रेष्ठ र एमालेका पोखरेलको दुवैको मत कम्तिमा २०–२० हजार काटेर चुनाव जित्ने दाबी गरिरहेका छन् ।

ह्याट्रिक जितकाे खाेजीमा रहेका कृष्णभक्त र डेब्यू गर्न आतुर उमेशलाई राेक्लान् रविले ?

चितवनको क्षेत्र नम्बर २ मा कालिका नगरपालिका, इच्छाकामना गाउँपालिका र भरतपुर महानगरपालिकाको १, २, ३, ४, ५, ७, १०, ११, १२ र २९ नम्बर वडा पर्दछन् । यो क्षेत्रको मतदाता १ लाख २४ हजार २१४ छन् ।

गत ३० वैशाखमा भएको स्थानीय तह चुनावमा वडाध्यक्षहरूलाई प्राप्त मतलाई आधार मान्दा नेकपा एमाले सर्वाधिक बलियो दल देखिन्छ । एमालेका वडाध्यक्षहरूले यस क्षेत्रमा ३५ हजार ५४३ मत पाए । तालमेल गरेर चुनाव लडेका कांग्रेस, नेकपा (माओवादी केन्द्र) र नेकपा (एकीकृत समाजवादी)का वडाध्यक्षहरूले ३५ हजार ३९४ मत पाए ।

एमाले र गठबन्धनका वडाध्यक्षहरूले पाएको मतान्तर १४९ छ । त्यही भएर पोखरेल र श्रेष्ठले रविलाई प्रतिस्पर्धी नै ठानेका छैनन् । राष्ट्रिय प्रजातन्त्र पार्टीका मनोज अधिकारी पनि चुनावमा प्रतिस्पर्धी छन् । उनले पनि युवा र स्वतन्त्रको मत तान्न सक्ने आकलन हुँदै आएको छ । उनी युवा उद्यमी हुन् ।

यो स्थितिमा मतदाताले पुराना दलका उम्मेदवारलाई नछानी नयाँ र लोकप्रिय उम्मेदवार भएको आधारमा रविलाई नछान्लान् भन्न सकिँदैन । अर्थात् रवि चितवन–२ का मतदाताका लागि बलिया विकल्प हुन सक्छन् । स्थानीय चुनावका बेलै पनि मतदाताले ठाउँठाउँमा विकल्प खोजेका थिए । त्यो पृष्ठभूमिमा प्रतिनिधिसभा चुनावमा पनि विकल्प नखोज्लान् भन्न सकिँदैन । यदि, त्यस्तो अवस्था आए गैरराजनीतिक पृष्ठभूमिबाट पहिलो पटकमै संसद् छिर्ने नेता रवि बन्नेछन् । होइन भने उनको संसद् प्रवेश रहरमै सीमित हुन सक्छ ।