'फूलबुट्टे सारी' गाएर नेपालमा चर्चा कमाएकी बियोन्सेले युगाण्डामा नेपालीलाई नचाइन्

'फूलबुट्टे सारी' गाएर नेपालमा चर्चा कमाएकी बियोन्सेले युगाण्डामा नेपालीलाई नचाइन्

A+ A A-

गैरआवासीय नेपाली संघ युगाण्डाले केही दिनअघि 'दसैँ विशेष सांस्कृतिक कार्यक्रम' आयाेजना गर्‍याे, जहाँ नेपाली कलाकारसँगै युगाण्डान माेडल दि क्याप्टेन बियोन्से फामेसीले समेत प्रस्तुति देखाइन् । घुम्न आएर लकडाउनमा थुनिएका बेला बियाेन्सेले 'फूलबुट्टे सारी' गीत आफ्नै शैलीमा गाएर नेपालमा चर्चा कमाएकी थिइन् । नेपालसँग आफ्नो स्वर्णिम स्मृतिहरू जोडिएको भन्दै उनले नेपाली गीत गाएकी थिइन् । उनको प्रस्तुतिमा दर्शकहरू नाचेका थिए ।

सांस्कृतिक कार्यक्रम आयाेजक गैरआवासीय नेपाली संघ युगाण्डाका अध्यक्ष विनाेद थापाका अनुसार नेपाली कलाकारसँगै बियाेन्सेकाे प्रस्तुतिले इभेन्टकाे माहाेल तताएकाे थियाे । कार्यक्रममा प्रस्तुतिका लागि नेपालबाट गायिका रचना रिमाल, गायक प्रितम आचार्य, कार्यक्रम सञ्चालिक रिमा विश्वकर्मालगायत युगाण्डा पुगेका थिए ।

त्यहाँस्थित नेपाली अवैतनिक वाणिज्य दूतावाससँगकाे सहकार्यमा संघले आयोजना गरेकाे कार्यक्रमकाे उद्देश्य नेपालकाे कला, संस्कृति र शैलीलाई अन्तर्राष्ट्रिय जगतमा विस्तार गर्नु रहेकाे अध्यक्ष थापाले बताए । उनका अनुसार, अफ्रिकी क्षेत्रमा पाकिस्तान एसाेसिएसन र इन्डियन एसाेसिएसनका केही पदाधिकारी एउटै हलमा बसेर नेपाली कार्यक्रममा रमाएका थिए । विदेशी पाहुनामाझ टीका-जमरा ग्रहण, बालनृत्य तथा विभिन्न सामूहिक नृत्य देखाइएकाे थियाे । कार्यक्रमकाे प्रमुख अतिथिका रूपमा युगाण्डाका लागि नेपाली अवैतनिक वाणिज्य दूत डा. सुधिर रुपारेलिया पनि दिए ।

गैरआवासीय नेपाली संघ युगाण्डाले नेपालीहरूकाे प्रमुख चाडपर्वमा नेपालका विभिन्न पहिचान र संस्कृति झल्काउने उद्देश्यले कार्यक्रम गर्ने गरेको अध्यक्ष थापाले बताए । आगामी दिनमा पनि नेपाली मौलिक पहिचान र शैलीलाई विस्तार गर्ने अभियानलाई निरन्तरता दिने उनको भनाइ छ ।

प्रकाशित मिति: बिहीबार, असोज २७, २०७९ ०८:४६