१२ वर्षपछि ब्युँतिएको 'फूलबुट्टे सारी'

A+ A A-

एउटा उखान छ- '१२ वर्षपछि खोला पनि फर्किन्छ !'

'फूलबुट्टे सारी' बोलको नेपाली गीतको पनि १२ वर्षपछि दिन फर्किएको छ । १२ वर्षसम्म गुमनाम याे गीत अहिले जताजतै गुञ्जिएकाे सुन्न सकिन्छ ।

टिकटकमा 'फूलबुट्टे सारी' बोलको गीतमा भिडियो नबनाउने प्रयोगकर्ता कमै होलान् । नबनाउनेले पनि यो गीत पक्कै सुनेका छन् । टिकटककै कारण फूलबुट्टे सारी चर्चामा छ ।

०००

गीतकार तथा संगीतकार राजनराज शिवाकोटीले १२ वर्षअगाडि नै यस गीत तयार गरेकाा थिए । गायक मार्मिक लामाकाे स्वरमा गीत रेकर्ड भएको थियो ।

त्यस समय भिडियोको जमाना थिएन । बजारमा आएको अडियोलाई स्रोताले खासै सुनेनन् । गीत गुमनाम बन्यो । गीतकार तथा संगीतकार शिवाकाेटी र गायक लामाले पनि त्यतिबेला गीतलाई लिएर ठूलो अपेक्षा राखेनन् । गीत आयो, गयो ।

गायक लामा विभिन्न स्टेज कार्यक्रममा पुग्दा यो गीत गाउने गर्थे । तर, पनि गीतले उचाइ दिन सकेको थिएन । स्रोताले यस गीतलाई स्वीकारेका थिएनन् ।

तीन वर्षअगाडि प्रतीक गुरुङले याे गीतको कभर गाएर भिडियो युट्युबमा पोस्ट गरे । र पनि गीतले खासै चर्चा पाउन सकेन ।

डेढ महिनाअगाडिको कुरा हाे । टिकटकमा 'फूलबुट्टे सारी' गीतमा धमाधम टिकटक भिडियो बन्न थाल्यो । राम्रो फलोअर्स कमाएका टिकटकरले पनि यस गीतमा भिडियो बनाएपछि गीतले एक्कासि चर्चित बन्याे ।

टिकटकमा गीतका केही अंश सुनेका व्यक्तिहरू पूरा गीत सुन्न युट्युबसम्म पुगे । त्यस बेला यस गीतको 'ओरिजिनल' गीत युट्यबुमा भेटिएन । दर्शकले प्रतीक गुरुङको कभर भिडियो हेरे, सुने । उक्त कभर भिडियो पनि तीन वर्षपछि युट्युबमा हिट भयो ।

तर, धेरैलाई पत्तै भएन, गीतको असली सर्जक को हुन् ? दर्शकलाई मात्र होइन, कभर गायक प्रतीक आफैँलाई पनि उक्त कुरा पत्तो थिएन ।

पछि राजनराजले नै प्रतीकलाई सम्पर्क गरे । अनि बल्ल प्रतीकले सर्जक पत्तो पाएका थिए । कक्षा ३ मा प्रतीकले याे गीत सुनेका थिए । त्यस बेला प्रतीकलाई यो गीत निकै मन परेको थियो । त्यसैले प्रतीकले यस गीतलाई कभर भर्जनमा तयार गरेका थिए ।

बल्ल आयो भिडियो बनाउने आँट !

गीतले बजार नलिएपछि गायक तथा संगीतकार दुवैलाई भिडियोमा लगानी गर्ने आँट आएको थिएन । १२ वर्षसम्म यस गीतले भिडियोको रूप पाउन सकेको थिएन ।

तर, टिकटक हुँदै युट्युबमा भएको कभर भिडियोमा देखिएको दर्शक/स्राेताको उत्साहजनक प्रतिक्रियाले संगीतकार राजनराजलाई भिडियो बनाउने आँट आयो । उनले गायकलाई सम्पर्क गरेर भिडियो बनाउने निधो गरे ।

राजनराज भन्छन्, '१२ वर्षपहिला रेकर्ड भएको गीत अहिलेको समयको जस्तो हुँदैन थियो । त्यसैले पुन: रेकर्ड गराएर भिडियो तयार गरेका हौँ ।'

गीतको अफिसियल भिडियोमा पनि निर्माण पक्षले दर्शक/स्राेताको उत्साहजनक साथ पायो । रिलिज भएको तीन सातामा यस गीतले ३३ लाखभन्दा बढी दर्शक पाएको छ ।

अफिसियल भिडियो हिट भएपछि निर्माण पक्षले यस गीतको 'फिमेल भर्जन' पनि तयार गर्ने सोच राखे । राजनराज शिवाकाेटीसँग पछिल्लो समय सहकार्य गर्दै आएकी मिलन नेवारले 'फिमेल भर्जन'मा आवाज भरिन् ।

उक्त गीतको भिडियोमा निर्माणपक्षले राम्रै लगानी गर्‍यो । आखिर फिमेल भर्जनको गीत र भिडियोले पनि युट्युबमा दर्शक/स्राेताको उत्साहजनक साथ पाइरहेको छ ।

रिलिज भएको तीन दिन नबित्दै 'फिमेल भर्जन'ले युट्युबमा १२ लाख भ्यूज पार गरेको छ । ७० हजार दर्शकले लाइक गरेको यस भिडियोमा ६ हजारभन्दा बढी प्रतिक्रिया मिलेको छ ।

०००

'हरेक कुराको समय आउँछ, फूलबुट्टे सारीको पनि समय आयो', गीतको सफलतालाई लिएर संगीतकार शिवाकाेटी दंग छन् ।

'किन १२ वर्षपछि हिट भयो होला गीत ?', राजनराजलाई प्रश्न थियो ।

गीतमा समावेश शब्द तथा संगीतका कारण अहिले गीत हिट भएको राजनराजको जवाफ छ । उनी भन्छन्, 'गीतको शब्द तथा संगीतलाई नै दर्शक/स्राेताले रुचाउनुभएको छ । जोकोहीले गाए पनि यस गीत हिट हुने अवस्था आइदियो । त्यसैले पनि यस गीतको शब्द/संगीतमा एक किसिमको जादु नै रहेछ भन्ने लागेको छ ।'

गीत हिट हुनुको अर्को महत्त्वपूर्ण कुरा हो- समय । जुन कुरालाई राजनराजले महसुस गरेका छन् । '१२ वर्षअगाडि चलेन, तीन वर्षअगाडि आएको कभर पनि चलेन । अहिले एक्कासि आफैँ चलेको छ', राजनराज भन्छन्, 'यस गीतको समय अहिले नै थियो र त चल्यो । गीत-संगीत चल्ने वा नचल्ने भन्ने कुरामा समयको ठूलो अर्थ हुने रहेछ ।'

१२ वर्षपछाडि गर्नुपर्ने सिर्जना त्यो समय नै गरेर सार्वजनिक गरेकाले त्यो समय गीतले बजार लिन नसकेको उनको बुझाइ छ । 'मलाई अचम्म लाग्छ, अहिलेको समयमा चाहिने गीत मैले १२ वर्षअगाडि नै कसरी तयार गरे होला ?', राजनराज प्रश्न गर्छन् ।

अनि फुर्‍याे 'फुलबुट्टे सारी'

राजनराज प्राय: गीत लेख्न गाउँ पुग्छन् । गाउँले परिवेशमा नै रहेर उनले गीतका शब्द कोर्छन् ।

फूलबुट्टे सारी पनि उनले गृह जिल्ला दोलखा पुगेर नै तयार गरेका हुन् । उनी भन्छन्, 'घरनजिकै मौवाको रुख छ । त्यहीँ बसेर नै यस गीत तयार गरेको हुँ ।'

गाउँले परिवेशमा हुर्किएका राजनराजले गाउँले बैँसालु युवायुवतीको इच्छा वा चाहनालाई बुझेर नै याे गीत तयार गरेका हुन् ।

उनी भन्छन्, 'गाउँघरमा युवायुवतीहरू चिटिक्क परेर कौसीमा बसेको देखिन्थ्यो । उनीहरू सन्दुकबाट निकालेको ऐना हेर्दै गाजल लगाउँथे । त्यो देखेपछि युवामा कस्तो बैँसालु चाहाना हुन्छ भन्ने कुरालाई महसुस गरेर याे गीत तयार गरेको हुँ ।'

कौसीमा ऐना हेर्दै बसेकी युवतीले युवालाई देख्दा आउने मनोभावलाई महसुस गरेर राजनराजले 'फिमेल भर्जन' तयार गरेका हुन् ।

राजनराजलाई 'कान्छी कोश...'पछिको शब्द मिलाउन निकै हम्मेहम्मे परेको थियो । उनले करिब डेढ महिना लगाएर उक्त शब्द पूरा गरेका हुन् ।

'कान्छीको केशपछि के शब्द राख्ने भन्ने कुराले मेरो डेढ महिना समय लिएको छ', राजनराज भन्छन्, 'पछि बाटोमा हिँड्दै गर्दा फिजारिएछ भन्ने शब्द फुर्‍यो । त्यसैलाई नोट गरेँ र पुन: कम्पोज गरेँ । अनि बल्ल गीत तयार भएको थियो ।'