को हुन् लाल मोहमम्द हत्याका मुख्य योजनाकार नितेन ? रसुवा कारागारमा रहेका अपराधी उदय सेट्ठीसँग देखियाे कनेक्सन

को हुन् लाल मोहमम्द हत्याका मुख्य योजनाकार नितेन ? रसुवा कारागारमा रहेका अपराधी उदय सेट्ठीसँग देखियाे कनेक्सन

A+ A A-

सर्लाही हरिवनका लाल मोहम्मदको हत्याका प्रमुख योजनाकार नितेन मदान खान खुँखार अपराधी भारतका अर्जुन भन्ने उदय सेट्ठीका प्रमुख सहयोगी भएको खुलेको छ । सोमबार साँझ काठमाडौंको गोठाटारस्थित कृष्ण मन्दिरनजिक मोहम्मदमाथि नितेन मदान खानको योजनामा गोली प्रहार भएको थियो ।

भारत हरिणाका मदान पछिल्लो समय नेपाल बस्दै आएका थिए । उनी वसन्तपुरमा कोठा भाडालिएर आमा र दाजुभाउजुसँग बस्दै आएको प्रहरीको अनुसन्धानले देखाएको छ ।

मोहम्मदको हत्याबाहेक एक वर्षअघि काठमाडौंको विशालबजारका व्यापारी गुलाब खानको ७० लाख रुपैयाँ लुटेको अभियोग उनीमाथि छ । सो अभियोगमा प्रहरी नितेन मदानको खोजीमा सक्रिय थियो ।

तर, प्रहरीको खोजीको सूचीमा रहेको थाहा पाएका मदान लुकिछिपी बस्दै आएका थिए । ७० लाख रुपैयाँ लुटपाटको घटना घटाउनुअघि उनलाई जुवा खेल्लाखेल्दै गंगबुबाट काठमाडौं प्रहरीको टोलीले पक्राउसमेत गरेको थियो । सो मुद्दामा उनी प्रहरी वृत्त महाराजगञ्जमा थुनिएका थिए ।

सम्बन्धित समाचार

जितेन खानले बनाएका थिए लाल मोहम्मदको हत्या योजना, हत्यारा वीरगञ्ज नाकाबाट भारत छिरेको प्रहरीको दाबी

जुवा मुद्दामा छुटेलगत्तै उनी ७० लाख रुपैयाँ लुटपाटको घटनामा जोडिएको एक प्रहरी अधिकारीले बताए । लुटपाटपछिको अधिकांश समय भने मदान भारतको दिल्ली बस्दै आएको खुलेको छ । प्रहरीका अनुसार हुण्डीदेखि क्यासिनाेमा भारतीयलाई जुवा खेलाउने भूमिकामा समेत उनको संलग्ता देखिएको छ ।

मोहम्मदको हत्या योजनासहित उनी केही दिन अघिमात्रै काठमाडौं भित्रिएको रेकर्ड अनुसन्धानमा खटिएका प्रहरीले पत्ता लगाएका छन् । उनी नेपालहुँदा अधिकांश समय रसुवा बस्ने गरेको समेत प्रहरीको अनुसन्धानले देखाएको छ ।

अनुसन्धानमा खटिएका प्रहरी अधिकारीका अनुसार जिल्ला कारागार रसुवामा रहेका अपहरण र लुटपाटका खुँखार अपराधी उदय सेट्ठी भेट्न उनी रसुवा पुग्ने गरेका हुन् ।

पछिल्लो समय सेट्ठीले मदानले प्रयोग गर्ने भारतीय नम्बरमा रसुवाको कारागारबाट सयौं पटक फोन गरेको कल रेकर्ड प्रहरीले निकालेको छ । मदानले मोहम्मदको हत्या गर्न भने बिहारबाट २ जना भारतीय सुटर ल्याएर हत्या गराएको प्रहरीले दाबी गरेको छ ।

उनीहरूका लागि मदानले नै विकास पटेल र एमडी मदानको नामबाट २ वटा नेपाली एनसेल कम्पनीको मोबाइल नम्बर निकालेको खुलेको छ । यद्यपि दुवै जनाको वास्ताविक पहिचान भने खुलेको छैन ।

अनुसन्धानमा खटिएका प्रहरी अधिकारीका अनुसार उनीहरू तीन जना नै नेपाल–भारत सीमा पर्साको विरगञ्ज नाकाबाट मंगलबार भारत भागिसकेको खुलेको छ । उनीहरू मंगलबार दिउँसो ११ बजे वीरगञ्ज नाकाबाट भारत भागेको खुलेको अनुसन्धानमा खटिएका एक प्रहरी अधिकारीले शिलापत्रसँग दाबी गरे ।

‘हत्यामा संलल्न तीन जना भारतीय नागरिककै भूमिका देखिन्छ । उनीहरू गोली प्रहारलगत्तै थानकोट हुँदै धादिङ र मंगलबार ११ बजे वीरगञ्ज नाका पार गरेको देखिएको छ,’ ती अधिकारीले भने ।

सम्बन्धित समाचार

नक्कली भारतीय नोटको कारोबारी थिए लाल मोहम्मद, युनिस अन्सारीसम्म कनेक्सन

मदानले उनीहरूलाई सुपारी दिएर नेपाल ल्याएको अनुमान प्रहरीले गरेको छ । प्रहरीले रसुवा कारागारमा रहेका उदय सेट्ठीसँग मदानको कनेक्सन देखिएपछि सेट्ठीमाथि समेत अनुसन्धान थालेको छ ।

सेट्ठी तिनै अपराधी हुन्– जसले अपहरण तथा शरीर बन्धक मुद्दाका कुख्यात नाइके रुपन्देही अमुवाका अमर टण्डन समूहसँग मिलेर करिब २० भन्दा बढी अपहरणको घटना घटाएको तथ्यांक प्रहरीसँग छ ।

महानगरीय अपराध महाशाखाको तथ्यांकअनुसार टण्डन र उदय सेट्ठी समूहले २०६० सालदेखि २०६५ सम्म पाँच वर्षको अन्तरालमा करिब २० वटा अपहरणको घटना घटाएका थिए ।

याेजनाकार नितेन सँग गाेली प्रहार गर्ने सुटर (टाेपी लगाउने)

त्यो बेला टण्डन समूहको त्रासले कतिपयले त अपहरणपछि रकम बुझाएर पनि प्रहरीमा उजुरी नै गर्न नआएको पहरीको बुझाइ छ । प्रहरीको रेकर्डअनुसार भ्याली कोल्ड स्टोरका संचालक बाबुराजा रावलदेखि पशुपति पेन्ट्सका सञ्चालक महेश मुरारका, निरज कक्षपति, व्यवसायीहरू पवन अग्रवाल, दिलिप अग्रवालसहित २० भन्दा बढी व्यवसायी टण्डन र सेट्ठी समूहको निशानामा परेका थिए ।

अपहरण गरेर फिरौती रकम असुल्दासम्म उनीहरूले अपहरणमा परेका व्यक्ति राख्नका लागि काठमाडौंदेखि रुपन्देहीसम्म घर नै भाडामा लिएको खुलेको थियो ।

फिरौती रकम उनीहरूले हुण्डीमार्फत् भारत, दुबईमा रिसिभ गर्ने गरेको एक प्रहरी अधिकारीको भनाइ छ । टण्डन र सेट्ठी समूहले त्यो बेला करिब ५ करोडभन्दा बढी रकम अपहरणबाट उठाएको प्रहरीको दाबी छ ।

२ पुस २०६४ मा महेश मुरारकाको अपहरण मुद्दामा टण्डन भारतबाट पक्राउ परे । टण्डन पक्राउ परेपछि पनि उनका सहयोगी उदय सेठ्ठी, बिष्णु जीसी, प्रह्लाद महतहरूले अपहरणको धन्दालाई निरन्तरता दिइरहे ।

सम्बन्धित समाचार

भारतीय आपराधिक गिरोहको निसानामा थिए लाल मोहम्मद, पुराना हत्याको पुनरावृत्ति

सेट्ठी २०५९ साल तिर नेपाल आउनुअघि अन्तर्राष्ट्रिय आपराधिक समूह भारतका छोटा राजन समूहसँग समेत नजिक थिए । २०६६ मा तत्कालीन प्रहरीको महानगरीय अपराध महाशाखा हाल (उपत्यका अनुसन्धान कार्यालय) को टोलीले उदय सेट्ठी, सर्लाहीका प्रह्लाद महत, बिष्णु जीसी, टासी गुरुङ र विकास कार्की पक्राउ परेका थिए । त्यसयता भने यो समूह पूर्णरूपमा ध्वस्त भएको प्रहरीले दाबी गरेको छ । हाल सेट्ठीबाहेक सबैजना जेलमुक्त भइसकेका छन् ।

के थियो सेट्ठी र लाल मोहम्मदको सम्बन्ध ?

नितेन मदान खानको योजनामा मारिएका लाल मोहम्मद नक्कली भारतीय नोटको कारोबारी हुन् । यसअघि २०६४ मा अनामनगरस्थित धोवी खोलामा बाराका बलराम पटुवालाई गोली हानी हत्या गरेको घटनामा उनको संलग्नता पुष्टि भएको थियो ।

सो हत्या प्रकरणमा उनी १० वर्ष जेल सजाय भुक्तान गरेर छुटेका थिए । मोहम्मद डिल्लीबजार कारागारबस्दा उनको भेट त्यहाँ उदय सेट्ठीसँग भयो । जेलजीवन बिताउँदा सेट्ठी र मोहम्मदले विभिन्न आपराधिक योजना बनाएको हुनसक्ने अनुमान प्रहरीले गरेको छ ।

तर, मोहम्मद २ वर्षअघि जेलमुक्त भएपछि सेट्ठीको सम्पर्कमा नरही गोठाटारमा ‘एभेन्जर इन्टरप्राइजेज वर्ल्ड बेस्ट गार्मेन्ट’ सञ्चालन गरेर बसेका थिए ।

जेलमा हुँदा बनेका योजना महोम्मदबाट पूरा नभएपछि सेट्ठीले नितेन मदान खान प्रयोग गरेर हत्या गरेको आशंकासमेत प्रहरीको छ ।

त्यसका लागि सेट्ठीले भारतीय गुप्तचर विभाग ‘रअ’ सम्म पनि नक्कली भारतीय नोटको कारोबारको सूचना पुर्‍याएको अनुमान प्रहरीले गरेको छ ।

प्रकाशित मिति: बुधबार, असोज ५, २०७९ १५:४७

कृष्णसिंह लाेथ्याल

प्रतिक्रिया दिनुहोस्

भर्खरै

सन्दीपको पक्षमा काठमाडौंमा प्रदर्शन

काेशीमा नयाँ सरकार गठनका लागि आह्वान गर्ने तयारी, दाबी पेस गर्न एमाले–माओवादी तम्तयार

शीर्ष नेताहरूका कारण संवैधानिक परिषद्सम्बन्धी विधेयक पारित हुन ढिलाइ

सरकार ढाल्ने षड्यन्त्र एक झट्कामै टुटाइदियाैँ : विष्णु पाैडेल

ग्लोबल आईएमई बैंकको वित्तीय साक्षरता कार्यक्रममा २० हजारभन्दा बढीको सहभागिता

लोकप्रिय

केपी ओलीलाई शेखर काेइरालाकाे प्रस्ताव- पहिले तपाईं प्रधानमन्त्री हुनुस्, त्यसपछि मलाई बनाउनुस्

सत्ता गठबन्धनमा माधव नेपालको कचकचलाई एमालेले सुदूरपश्चिमबाट फर्काएकाे जवाफ

बालकोट वार्ता: प्रचण्डलाई बाहिर राखेर कांग्रेस-एमालेको सरकार बनाउने शेखरको प्रस्ताव, ओलीले गरे अस्वीकार

जसपा विभाजनसँगै वैकल्पिक गठबन्धनको च्याप्टर क्लोज, अब के गर्छ कांग्रेस ?

जसपा विभाजनले प्रचण्डलाई राहत, माधव नेपालकाे सपना चकनाचुर

विचार

सूचना प्रविधिको विकासले आउनै लागेको अर्को दुनियाँ

वात्सल्यकी खानी आमा (भिडियो)

१०औँ राष्ट्रिय खेलकुदले कर्णालीमा गर्नेछ खेलकुदमन्त्री र सदस्यसचिवको परीक्षण

ब्लग

म गे हुँ भनेर थाहा पाउँदा आमालाई सुर्ता भयो, 'अब यसलाई समाजले कति दुःख देला नि'

'बोक्सीको घर' हेरेपछि निदाउनै सकिनँ

कसरी हटाउने सार्वजनिक सवारीको बेथिति ?

शिक्षा

संस्कृत विश्वविद्यालयमा सञ्चारमन्त्री शर्मालाई शिक्षाविद्को कोटा, एमाले र माओवादीबीच भागवण्डा

स्कुल छाड्‌ने मुख्य कारण- जीवन एकातिर, शिक्षा अर्कोतिर

सरकारी स्कुलप्रतिको नकारात्मक धारणा बदलेर यसरी उत्कृष्ट बन्यो ज्ञानोदय मावि