भारतीय आपराधिक गिरोहको निसानामा थिए लाल मोहम्मद, पुराना हत्याको पुनरावृत्ति

भारतीय आपराधिक गिरोहको निसानामा थिए लाल मोहम्मद, पुराना हत्याको पुनरावृत्ति

A+ A A-

सर्लाहीका लाल मोहम्मदको अज्ञात समूहले गोली हानी हत्या गर्‍यो । सोमबार साँझ काठमाडौंको गोठाटारस्थित कृष्ण मन्दिरनजिक उनीमाथि अज्ञात समूहले चार राउण्ड गोली प्रहार गरेको थियो ।

तीनवटा गोली लागेका मोहम्मदको उपचारका क्रममा त्रिवि शिक्षण अस्पताल महाराजगञ्जमा राति नै मृत्यु भएको हो । गोठाटारमा ‘एभेन्जर इन्टरप्राइजेज वर्ल्ड बेस्ट गार्मेन्ट’ सञ्चालन गर्दै आएका मोहम्मदको हत्या उपत्यकामा यसअघि भएका केही शृंखलाबद्ध हत्याको घटनासँग मेल खाने प्रकृतिको भएको प्रहरीको दाबी छ ।

मोहम्मद नक्कली भारतीय नोटको कारोबारी भएकाले पनि उनीमाथि भारतीय आपराधिक समूहको संलग्नता हुन सक्ने प्रहरीको अनुमान छ । उसो त उनी यसअघि २०६४ मा अनामनगरस्थित धोवी खोलामा बाराका बलराम पटुवालाई गोली हानी हत्या गरेको घटनामा संलग्न अपराधी हुन् ।

सो हत्या प्रकरणमा उनी १० वर्ष जेल सजाय भुक्तान गरेर छुटेका थिए । भारतीय नक्कली नोटको कारोबारीमाथि भएको हत्याको घटनामा संलग्न हत्यारासम्म भने प्रहरी अझै पुग्न सकेको छैन । भारतीय नागरिक मिर्जा दिलसाद बेगको पनि काठमाडौंको सिफलमा १५ असार २०५५ मा गोली हानी हत्या भएको थियो ।

उनको हत्यामा भारतीय आपराधिक समूह छोटा राजन संलग्न रहेको प्रहरी अधिकारी बताउँछन् । त्यसपछि कमल सिंह नेपालीमाथि पनि गोली प्रहार भएको थियो । २४ भदौ २०६३ मा उनीमाथि अज्ञात समूहले सिनामंगल खरिबोटमा गोली प्रहार गरेको थियो ।

उनको उपचारका क्रममा दुई दिनपछि सिनामंगल अस्पतालमा मृत्यु भएको थियो । कमल हत्याको अनुसन्धानमा खटिएका प्रहरीले कमल रोजगारीको सिलसिलामा मलेसिया बस्दा भारतविरोधी गतिविधिमा सक्रिय रहेको भन्दै भारतीय आपराधिक समूहले गोली हानेको आशंका गरेको थियो ।

उनी मलेसिया बस्दा जोखिम देखेर नेपाल आएको खुलेको छ । तर, उनको हत्यारासमेत अझै पत्ता लागेको छैन । उनी पछि २४ माघ २०६६ माघ सञ्चार उद्यमी जमिम शाहको हत्या भएको थियो । नक्कली नोट कारोबारमा संलग्न रहेको आरोपमा भारतबाट आएका सुटरले जमल घण्टाघर नजिन उनलाई गोली प्रहार गरेका थिए ।

जमिम हत्यामा संलग्न सुटरसमेत अझै पक्राउ परेका छैनन् । भारतको आपराधिक समूहले नक्कली कारोबारी युनिस अन्सारीमाथि समेत कारागारभित्र गोली प्रहरी गरेको थियो । भारतीय नक्कली नोटको कारोबार अभियोगमा सुन्धारा कारागारभित्र हुँदा गोली प्रहार भएको थियो । कुख्यात अपराधी जसजित सिंह भनिने मनमित सिंह भाटियाले २६ फागुन २०६७ मा बाराका युनिस अन्सारीमाथि ६ राउण्ड गोली प्रहार गरेका थिए ।

निधार ताकेर हानेको ५ राउण्ड गोली नलागे पनि १ गोली भने अन्सारीको हातको कुहिनोमा लागेको थियो । त्यो घटनामा अन्सारी भाग्यले बाँचेका थिए । अन्सारीमाथि गोली प्रहार गर्दा फ्रान्सेली नागरिक 'विकिनी किलर’ को नामबाट चर्चित चार्ल्स शोभराजलाई भेट्ने बहाना बनाएर भाटिया कारागार पुगेका थिए ।

अन्सारीलाई गोली नलागेपछि भने भाटियाले प्रयोग गरेको जर्मन रिभल्वर सडकमै फालेर प्रहरीलाई गिरफ्तारी दिएका थिए । अन्सारी पनि भारतीय नक्कली नोटको कारोबारी रहेको भन्दै उनले हत्या प्रयास गरेका थिए । पहिलोपटक २०६६ सालमा पक्राउ परेर १८ भदौ २०७० मा छुटेका अन्सारी त्यसको ५ महिनापछि पुनः १० माघ २०७० मा ३५ लाख भारतीय रुपैयाँसहित पक्राउ परेका थिए ।

उक्त अभियोगमा जेल भुक्तान गरेका अन्सारी २ फागुन २०७४ मा छुटेका थिए । त्यसको २ वर्षपछि गत १० जेठ २०७६ मा फेरि ७ करोड भारतीय नोटसहित त्रिभुवन अन्तर्राष्ट्रिय विमानस्थलबाट पक्राउ परेका थिए । उनी पनि अहिले सुन्धारा कारागारभित्र छन् । उसो त उनी बाँच्नकै लागि जेल जान खोज्ने गरेको पनि प्रहरीको दाबी छ । जेल बाहिर बसे भारतले कुनै पनि बेला सिध्याउन सक्ने भय उनमा छ ।

अन्सारीलाई पाकिस्तानले प्रयोग गर्ने गरेको दाबी भारतीय गुप्तर निकाय ‘रअ’ को छ । अन्सारी बाराका तत्कालीन एमाले नेता तथा पूर्वमन्त्री सलिम मियाँ अन्सारीका छोरा हुन् । यसरी भारतीय जाली नोटको कारोबार गर्नेलाई एकपछि अर्काे गोली प्रहार गर्ने समूहका कसैलाई प्रहरीले पक्राउ गर्न सकेको छैन ।

यो पनि : नक्कली भारतीय नोटको कारोबारी थिए लाल मोहम्मद, युनिस अन्सारीसम्म कनेक्सन

प्रकाशित मिति: मंगलबार, असोज ४, २०७९ १४:०६