नक्कली भारतीय नोटको कारोबारी थिए लाल मोहम्मद, युनिस अन्सारीसम्म कनेक्सन

A+ A A-

सर्लाहीका लाल मोहम्मदको अज्ञात समूहले गोली हानी हत्या गर्‍यो । सोमबार साँझ काठमाडौं गोठाटारस्थित कृष्ण मन्दिरनजिक उनीमाथि अज्ञात समूहले चार राउण्ड गोली प्रहार गरेको थियो ।

टाउको, छाती र पेटमा गोली लागेका मोहम्मदको त्रिवि शिक्षण अस्पताल महाराजगञ्जमा उपचारका क्रममा सोमबार राति नै मृत्यु भएको हो । गोठाटारमा एभेन्जर इन्टरप्राइजेज वर्ड वेस्ट गार्मेन्ट सञ्चालन गर्दै आएका मोहम्मदलाई बेलुका गार्मेन्टका सामग्री ल्याएर घर पुग्दै गर्दा उनीमाथि गोली प्रहार भएको थियो ।

आफ्नो निजी कारमा सवार उनलाई गाडीबाट ओर्लिनासाथ मोटरसाइकलमा आएका दुई युवामध्ये एक जनाले गोली प्रहार गरेका थिए । मोहम्मदको हत्यामा भारतीय मूलकै अपराधीको संलग्नता देखिएको प्रहरीको प्रारम्भिक अनुसन्धानले देखाएको छ । सोमबार गोली प्रहार हुनुअघि मोहम्मदमाथि भौतिक आक्रमण भएको खुलेको छ ।

उनीमाथि केही दिनअघि मात्रै ‘रड’ प्रहार भएको खुलेको काठमाडौं प्रहरी परिसरका प्रमुख एसएसपी भरत बोहराले बताए । ‘मोहम्मदमाथि केही दिनअघि पनि रड प्रहार भएको रहेछ । तर, उनले प्रहरीमा उजुरी दिएनन् । आफैँ उपचार गरेको देखिन्छ,’ एसएसपी बोहराले भने ।

उनीमाथि रड प्रहार गर्ने समूहले नै गोली हान्यो वा अर्को समूहले हान्यो, त्यो अनुसन्धानकै क्रममा रहेको बोहराको भनाइ छ । उसो त मृतक मोहम्मदको पृष्ठभूमिसमेत आपराधिक गतिविधिको हो । उनी यसअघि २०६४ मा अनामनगरस्थित धोवी खोलामा बाराका बलराम पटुवालाई गोली हानी हत्या गरेको आरोपमा पक्राउ परेका थिए ।

पछि उनको संलग्नता पुष्टि भएपछि जिल्ला अदालत काठमाडौंले मोहम्मदलाई १० वर्ष जेल सजाय सुनाएको थियो । उनी तीन वर्षअघि मात्रै जेलमुक्त भएका हुन् । प्रहरीको प्रारम्भिक अनुसन्धानबाट २०६४ सालकै घटनाको बदला लिन उनको हत्या गरेको प्रहरीको आंशका छ ।

२०६४ मा हत्या गरिएका बलराम पटुवासहित उनीहरू एउटै समूहमा रहेर भारतीय नक्कली नोटको कारोबार गर्ने गरेको प्रहरीको दाबी छ । बलरामले पछि भित्री कुरा सार्वजनिक गर्न लागेपछि उनको हत्या भएको प्रहरीको दाबी छ ।

बलरामको हत्यामा बाराकै पप्पु गुप्ता र मुन्नु खान भनिने इल्ताव हुसेन अन्सारीको समेत संलग्नता खुलेको थियो । हुसेन २०७७ मा १४ किलो नक्कली सुन कारोबारको घटनामा समेत मुछिएका थिए । उनीहरू युनिस अन्सारीकै समूहका सदस्य रहेको प्रहरीको दाबी छ । यो समूहले पाकिस्तानबाट नक्कली नोट ल्याएर नेपालहुँदै भारत पठाउने गर्थे ।

अन्सारी हाल सुन्धारा कारागारभित्र जेलजीवन भोगिरहेका छन् । उनी ११ जेठ २०७६ मा त्रिभुवन अन्तर्राष्ट्रिय विमानस्थलबाट ७ करोड ६७ लाख ९४ हजार भारतीय नक्कली नोटसहित पक्राउ परेका थिए । युनिस अन्सारी पूर्वमन्त्री सलिम मिया अन्सारीका छोरा हुन् । यसअघि समेत उनी पटक-पटक नक्कली नोट प्रकरणमा पक्राउ परेर छुटेका व्यक्ति हुन् । उनी लागुऔषध खैरो हिरोइनसहित पक्राउ परेका थिए । लागुऔषध कारोबार र नक्कली भारतीय रुपैयाँको कारोबार गर्नुअघि उनले नेसनल टेलिभिजन सञ्चालन गरेका थिए । नक्कली नोट प्रकरणमा पक्राउ परेपछि टेलिभिजन बन्द भएको थियो ।

प्रहरीका अनुसार अन्सारी यसअघि २५ लाख र ३५ लाख भारतीय नक्कली नोटसहित पक्राउ परेका थिए । सोही अभियोगमा उनी चार वर्ष कैद सजाय काटेर निस्किएका थिए । प्रहरीका अनुसार अन्सारी पहिलोपटक २०६५ पुसमा काठमाडौंको त्रिपुरेश्वरको ब्लुबर्ड होटलबाट २५ लाख भारतीय नोटसहित पक्राउ परेका थिए ।

उनी जेलमै हुँदा उनकै योजनामा फेरि २०६७ असोजमा ४० लाख भारतीय नक्कली नोटसहित उनका एजेन्ट पक्राउ परेका थिए । उनीमाथि २०६७ सालमा केन्द्रीय कारागारभित्रै गोली प्रहार भएको थियो । मोहम्मदमाथि गोली प्रहार गर्ने समूहले पेस्तोल छोडेर भागेका छन् । उनको खोजीका लागि प्रहरी परिचालन गरिएको एसएसपी बोहराले बताए ।

प्रकाशित मिति: मंगलबार, असोज ४, २०७९ १२:१८