हाम्रो पात्रो रेमिटको डिजिटल रेमिट्यान्स अब एनपीएसमार्फत

A+ A A-

हाम्रो पात्रो रेमिटले नेपाल क्लियरिङ हाउस (एनसीएचएल)सँग नेसनल पेमेन्ट स्वीच (एनपीएस) को प्राविधिक सदस्यको रूपमा जोडिई नेपालभित्र सेवाग्राहीलाई रेमिट्यान्स भुक्तानीहरू गर्न सम्झौता गरेको छ ।

सम्झौतापत्रमा हाम्रो पात्रो रेमिटका तर्फबाट संस्थाका प्रमुख कार्यकारी अधिकृत सुदिना गौतम र एनसीएचएलका तर्फबाट संस्थाका प्रमुख कार्यकारी अधिकृत निलेशमान सिंह प्रधानले हस्ताक्षर गरेका हुन् ।

सम्झौतापश्चात् हाम्रो पात्रो रेमिटको आन्तरिक भुक्तानी प्रणालीलाई एनसीएचएलको नेसनल पेमेन्ट इन्टरफेस (एनपीआई)सँग जोडी एनपीएसअन्तर्गतका विभिन्न भुक्तानी उपकरणहरू प्रयोग गरी रेमिटले स्वचालित रूपमा भुक्तानी कारोबारहरू गर्न सक्नेछन् ।

हाम्रो पात्रो रेमिटको सेटलमेन्ट बैंक नेपाल इन्भेस्टमेन्ट बैंक रहेको छ र यस व्यवस्थाअनुसार रेमिटले सम्पूर्ण भुक्तानी कारोबारहरू सोझै लाभग्राहीको बैंक खातामा जम्मा गरिनेछ । साथै, चाँडै नै अन्य विभिन्न उपकरणहरूमार्फत पनि उक्त सेवा उपलब्ध गराइने कम्पनीले जनाएको छ ।

हाम्रो पात्रो रेमिट नेपाल राष्ट्र बैंकबाट अनुमतिप्राप्त पूर्णतः डिजिटल रेमिट्यान्स कम्पनी हो । हाल यसका सेवा अमेरिकाबाट नेपालमा गरिने रेमिट्यान्स सञ्चालनमा छ भने चाँडै अन्य देशहरूमा पनि सेवा विस्तार गरिने कम्पनीको भनाइ छ ।

हाम्रो पात्रो नेपालको सबैभन्दा बढी डाउनलोड गरिएको एप हो र विदेशमा रहेका नेपालीहरूले व्यापक रूपमा प्रयोग गर्दै आएका छन् । हाम्रो पात्रोको विस्तारित सेवाको रूपमा हाम्रो पात्रो रेमिटको यस सेवाले लाभग्राहीहरूको खातामा छिटोभन्दा छिटो रकम जम्मा गर्नुका साथै नेपालभित्रको डिजिटल रेमिट्यान्सको कारोबारलाई थप सहज बनाउने अपेक्षा गरिएको छ ।

एनसीएचएलका विभिन्न भुक्तानी प्रणालीहरूको एकीकृत इन्टरफेसको रूपमा विकास गरिएको एनपीआई, नेसनल पेमेन्ट स्वीच (एनपीएस) को अंगको रुपमा रहेको छ । यसमार्फत रियल टाइम भुक्तानी तथा नन्–रियल टाइम भुक्तानी (एनसीएचएल–आईपीएस) का विभिन्न भुक्तानी प्रणालीहरूको प्रयोग गर्न सकिन्छ ।

यसमा हाल ५९ सदस्य बैंक तथा वित्तीय संस्थाहरू र ७३ भन्दा बढी गैरबैंकिङ संस्थाहरू इन्डाइरेक्ट÷प्राविधिक सदस्यका रुपमा आबद्ध छन् । हाल १३ वटा रेमिट्यान्स कम्पनीहरूले आफ्नो सम्बन्धित सेटलमेन्ट बैंकहरूमार्फत एनसीएचएलका भुक्तानी प्रणालीहरूको प्रयोग गरी रेमिट्यान्ससम्बन्धी कारोबारहरू गर्दै आइरहेका छन् ।

प्रकाशित मिति: सोमबार, असोज ३, २०७९ १७:०६