प्रत्यक्ष र समानुपातिकतर्फ ८ करोड मतपत्र छाप्दै आयोग, समानुपातिकको कति छापियो ?

प्रत्यक्ष र समानुपातिकतर्फ ८ करोड मतपत्र छाप्दै आयोग, समानुपातिकको कति छापियो ?

A+ A A-

निर्वाचन आयोगले आगामी ४ मंसिरमा हुने प्रदेश र प्रतिनिधिसभा निर्वाचनका लागि प्रत्यक्ष र समानुपातिकतर्फ गरी ८ करोड मत्रपत्र छाप्ने भएको छ । ‘प्रत्यक्षतर्फ ४ करोड र समानुपातिकतर्फ पनि ४ करोड नै मत्रपत्र छाप्ने योजना छ,’ आयोगका प्रवक्ता शालिग्राम शर्मा पौडेलले भने । समानुपातिकतर्फको मतपत्र छपाइको काम भने सुरु भइसकेको छ । गत २० असोजबाट जनक शिक्षा सामाग्री केन्द्रमा समानुपातिकतर्फको मतपत्र छाप्न सुरु गरिएको हो ।

२१ लाख नमुना मतपत्र छपाइ सकियो

आइतबारसम्म सामानुपातिकर्फको नमुना मतपत्र छापेको आयोगले सोमबारदेखि समानुपातिकतर्फको मुल मतपत्र छाप्न सुरु गरेको हो । प्रवक्ता पौडेलका अनुसार २१ लाख नमुना मतपत्र छपाइ भएको छ । ‘समानुपातिकको नमुना मतपत्र छपाइको काम सकियो । आजदेखि मुलपत्र छपाइको काम सुरु भएको छ,’ उनले भने । पहिलो दिन ७ लाख मुल मतपत्र छपाइ भएको छ । ‘प्रदेश १ र गण्डकी प्रदेशको छपाइ सुरु भएको छ । दैनिक १२ लाख मतपत्र छपाइ हुन्छ,’ उनले भने, ‘जनक शिक्षा सामग्री केन्द्रमा २४ घण्टा नै छपाइको काम भइरहेको छ ।’

उनले समानुपातिकतर्फको एक महिना र प्रत्यक्षतर्फको मत्रपत्र छपाइको काम सक्न डेढ महिना लाग्ने बताए । हाल स्थानीय चुनावमा मौज्दात रहेको कागजबाट मत्रपत्र छपाइ भइरहेको छ । ‘स्थानीय चुनावको २५० मेट्रिक टन कागज बाँकी थियो, त्यसैको प्रयोग भइरहेको छ। नयाँ ८५० मेट्रिक टन कागज आउँछ । स्टकमा रहेको कागज सकिँदासम्म नयाँ कागज पनि आइपुग्छ,’ उनले भने । ८५० मेट्रिक टन कागज करिब १३ करोडमा खरिद गरिएको उनले बताए ।

समानुपातिकतर्फ कुन प्रदेशमा कति मतपत्र ?

समानुपतिकतर्फ प्रदेश १ का लागि ३८ लाख १३ हजार, मधेस प्रदेशका लागि ३७ लाख ९३ हजार, बागमतीका लागि ३८ लाख ९३ हजार, गण्डकीका लागि २० लाख ४२ हजार, लुम्बिनीका लागि ३६ लाख ४९ हजार, कर्णालीका लागि ११ लाख ३६ हजार र सुदूरपश्चिम प्रदेशका लागि १८ लाख ५८ हजार मत्रपत्र छपाइ हुने आयोगले जनाएको छ । प्रतिनिधसभाको समानुपातिकतर्फ करिब २ करोड २५ लाख मत्रपत्र छपाइ हुने समानुपातिक निर्वाचन प्रणालीका प्रवक्ता गुरुप्रसाद वाग्लेले बताए । प्रत्यक्षतर्फको मत्रपत्र भने मनोनयनपत्र दर्ता भएपछि छपाइ हुने आयोगले जनाएको छ ।

५० हजार नयाँ पतपेटिका खरिद गर्ने

निर्वाचन आयोगले ५० हजार मतपेटिका खरिद गर्ने भएको छ । जिल्ला जिल्लामा रहेका पुरानो मतपेटिका अपुग हुने भएकाले १५ करोडमा ५० हजार नयाँ मतपेटिक खरिद गर्न लागिएको प्रवक्ता पौडेलले बताए । ‘जिल्ल जिल्लामा कति मतपेपिटका छन् ? कति आवश्यक पर्छ सबै अध्ययन गरेर खरिद गर्न लागिएको हो । पुराना मतपेटिका टुटफुट पनि भएका छन् । अपुग हुने जिल्लामा नयाँ मतपेटिका पठाउँछौँ,’ उनले भने ।