असोज पहिलो साताबाट निर्वाचन आचारसंहिता लागू गर्ने तयारी, उल्लंघन गरे ठाउँको ठाउँ १ लाख जरिवाना

असोज पहिलो साताबाट निर्वाचन आचारसंहिता लागू गर्ने तयारी, उल्लंघन गरे ठाउँको ठाउँ १ लाख जरिवाना

A+ A A-

निर्वाचन आयोगले आगामी ४ मंसिरमा हुने निर्वाचनका लागि असोज पहिलो साताबाट आचारसंहिता लागू गर्ने तयारी गरेको छ । दलहरूले असोज २ र ३ गते समानुपातितर्फको बन्द सूची पेस गरेपछि आचारसंहिता लागू गर्ने तयारीमा आयोग रहेको हो । ‘आचारसंहिता बनिसकेको छ । असोज पहिलो साताबाट लागू गर्ने सोच छ,’ आयोगका प्रवक्ता शालिग्राम शर्मा पौडेलले भने, ‘धेरै पर जाँदैन, छिट्टै लागू हुन्छ ।’

सम्बन्धित समाचार

निर्वाचन आयोगले जारी गर्‍यो निर्वाचन आचारसंहिता (पूर्ण पाठ)

उल्लंघन गरे ठाउँको ठाउँ कारबाही

यसपटक आचारसंहिता कडाइका साथ लागू गर्ने योजना आयोगको छ । पहिलेको चुनावमा सम्झाउने बुझाउनेमा सीमित रहेको आचारसंहिता यसपटक उल्लंघन भए ठाउँको ठाउँ कारबाही गर्ने बताउँछन् आयोगका निर्वाचन आयुक्त रामप्रसाद भण्डारी ।

‘यसपटक सोधपुछ र माफी मात्र हुँदैन । आचारसंहिता उल्लंघन भए ठाउँको ठाउँ १ लाख जरिवाना गराउने हो । त्यसपछि अरु कारबाही प्रक्रिया अगाडि बढ्छ,’ उनले भने, ‘उम्मेदवारको मनोनयनपत्र रद्द पनि हुन्छ ।’

यसअघिका निर्वाचनमा आयोगले उम्मेदवार र दलहरूले आचारसंहिता उल्लंघन गर्दासमेत प्रस्टीकरण सोध्नेमा सीमित राखेको थियो । उल्लंघन गर्नेलाई कारबाही नगरेको भन्दै आयोगको आलोचना भएपछि यसपटक ‘एक्सन’ मै उत्रिने योजना रहेको उनले बताए ।

आचारसंहिता उल्लंघन भएको सही सूचना आयोगमा नआइपुग्ने गरेको बताउँछन् उनी । ‘शक्तिमा भएका मानिसले जति बेला पनि आचारसंहिता उल्लंघन गर्न सक्छन् । यसलाई नियन्त्रण गर्ने काम आयोगको हो । सही सूचना आयो भने तुरुन्तै कारबाही हुन्छ,’ उनले भने ।

प्रधानमन्त्रीलाई पनि छैन छुट

आचारसंहिता लागू भएपछि प्रधानमन्त्री शेरबहादुर देउवाले पनि आफ्नो निर्वाचन क्षेत्रबाहेक अरू ठाउँमा गएर भाषण गर्न नपाउने बताउँछन् आयुक्त भण्डारी । ‘प्रधानमन्त्रीलाई पनि छुट छैन । आचारसंहिता लागू भएपछि आफ्नो क्षेत्रबाहेक अरु ठाउँमा गएर उहाँले भाषण गर्न पाउनुहुन्न,’ उनले भने ।