पोखरामा पुस्तक समीक्षा प्रतियोगिता, विजेतालाई २० हजार रुपैयाँ

A+ A A-

सिएफएन (क्रिएसन फर नेशन)नेपाल र टुकी नेपालको आयोजनामा पोखरामा ३१ भदौदेखि पुस्तक समीक्षा प्रतियोगिता तथा पुस्तक प्रदर्शनी हुने भएको छ । बुकमार्ट पोखराको प्रायोजनमा कास्की जिल्ला स्तरीय र खुला समीक्षा प्रतियोगिता हुन लागेको आइतबार पत्रकार सम्मेलनमार्फत जानकारी गराइएको छ ।

प्रतियोगिता र पुस्तक प्रदर्शनी २८ असोजसम्म चल्ने छ । पुस्तक समीक्षा प्रतियोगितामा कक्षा ५ देखि स्नातकोत्तर तहसम्मका विद्यार्थी र शैक्षिक संस्थामा आबद्ध नभएका तर पुस्तक पढ्ने, पुस्तक समीक्षा गर्न इच्छुकले खुला सहभागिता जनाउन सक्नेछन् ।

‘पठन संस्कृति र किताबप्रतिको मोह पनि घट्दै गएको देखिन्छ । यसैलाई मध्यनजर गर्दै पठन संस्कृतको विकासका लागि हामीले यो कार्यक्रम आयोजना गरेका हौँ,’ आयोजक सिएफएन नेपालका अध्यक्ष अस्मित भुसालले भने ।

प्रतियोगितामा भाग लिन चाहनेले ३१ भदौदेखि २८ असोजसम्म बुकमार्ट पोखरा गैह्रापाटन पुगेर नाम दर्ता गर्न सक्नेछन् । खुलातर्फ सहभागी हुनेले बुकमार्टमा सम्पर्क गर्न सक्ने आयोजकले जनाएको छ । विद्यालयको तर्फबाट प्रतिस्पर्धा गर्न चाहने विद्यार्थीले भने विद्यालयबाट सिफारिस पेस गर्नुपर्ने छ ।

लेखक/स्रष्टा, पुस्तकको शीर्षक, प्रकाशक, प्रकाशन वर्ष, कागजको स्तर मूल्य, पृष्ठ आदिबारे परिचयात्मक जानकारी दिएर पुस्तकमा प्रस्तुत विषयको सारंश र मूल विचार (साहित्यिक कृति भए विचार र भावनाको सन्तुलनसहित अन्य भावगत र कलागत सौन्दर्यमूल्यको प्रस्फुटन) राख्नुपर्ने मापदण्ड छ । समीक्षामा पुस्तकका सबल एवं दुर्बल पक्षको इमान्दारिताका साथ प्रस्तुतिकरण, उपयोगिता, नयाँपन, मौलिक पक्ष र टिप्पणीसँगै भाषा र निष्कर्षसमेत लेख्नु पर्नेछ ।

कक्षा १२ माथिका विद्यार्थीले भने सन्दर्भ सूचीसमेत राख्नु पर्नेछ । कक्षा ८ सम्मका विद्यार्थीले ५ सय, ८–१२ कक्षाका विद्यार्थीले ८ सय, स्नातक तहका लागि एक हजार र स्नातकोत्तर तह एवं खुला प्रतियोगिका लागि १५ सय शब्द संख्याको समीक्षा लेख्नुपर्ने आयोजक सिएफएनका अध्यक्ष भुसालले बताए । २८ असोजसम्म समीक्षा बुझाउन आयोजकले समयसीमा तोकेको छ ।

प्रतियोगिताको पहिलो चरणमा कक्षा ५–१२ कक्षासम्म प्रत्येक कक्षाबाट उत्कृष्ट ३ र स्नातक, स्नातकोत्तर र खुला प्रतिस्पर्धाबाट उत्कृष्ट ५ छनोट गरिने छ । पहिलो चरणमा छनोट हुने समीक्षकलाई अन्तिम निर्णयका लागि समीक्षा वाचन गर्न लगाइने र सबै कक्षा तथा खुलाबाट सर्वोत्कृष्ट १/१ जना समीक्षक चयन गरिने छ । अन्तिम चरणमा सर्वोत्कृष्ट हुने समीक्षकलाई नगद र पुस्तकसहित जनही २० हजार रुपैयाँ बराबरको पुरस्कारले दिइने छ । उत्कृष्ट ३ मा पर्ने सबै प्रतियोगीलाई २ हजारसम्मका पुस्तक पनि दिइने छ ।

बुकमार्ट प्रालिले गर्ने पुस्तक प्रदर्शनी विशेष छुट मेला ३१ भदौदेखि ४ कात्तिकसम्म चल्नेछ । जुनसुकै पुस्तक खरिद गर्दा २५ प्रतिशत छुटको व्यवस्था गरिएको बुकमार्टले जनाएको छ ।

प्रकाशित मिति: सोमबार, भदौ २७, २०७९ ०६:२६