प्रदेश १ ‘साक्षर प्रदेश’ घोषणा, कुन जिल्लामा कति साक्षर ?

A+ A A-

अन्तर्राष्ट्रिय साक्षरता दिवसको अवसर पारेर बिहीबार प्रदेश १ लाई साक्षर प्रदेश घोषणा गरिएको छ । प्रदेशभित्रका सबै जिल्लाहरूलाई यसअघि नै साक्षर घोषणा गरिए पनि समग्र प्रदेशलाई भने बिहीबार प्रदेश १ का सभामुख प्रदीप कुमार भण्डारीले साक्षर प्रदेश घोषणा गरेका हुन् ।

सामाजिक विकास मन्त्रालयले प्रदेश १ मा १५ देखि ६० वर्ष उमेर समूहका ९६.७४ प्रतिशतभन्दा बढी नागरिक साक्षर भएको दाबी गरेको छ । तथ्यांकअनुसार प्रदेश १ को जिल्लागत अवस्थामा सुगम जिल्लामै तुलनात्मक साक्षरता दर कम देखिएको छ ।

पहाडी जिल्ला ओखलढुंगामा प्रदेशकै सबैभन्दा धेरै ९९.५ प्रतिसत साक्षर रहेको छ । भने प्रदेशको कम साक्षरता दर भएको जिल्ला उदयपुरमा ९५.३२ प्रतिशत साक्षरता छ ।

प्रदेशभरका अन्य जिल्लाहरू क्रमशः पाँचथरमा ९७ प्रतिशत, झापामा ९८.३३ प्रतिशत, धनकुटामा ९७.५ प्रतिशत, इलाममा ९७.६२ प्रतिशत, खोटाङमा ९६.५६ प्रतिशत, सुनसरीमा ९५.५ प्रतिशत, मोरङमा ९६.५ प्रतिशत साक्षरता रहेको छ ।

झापा, मोरङ, सुनसरी प्रदेशका सुगम जिल्लामा पर्छन् । अन्य पहाडी जिल्लाको तुलनामा यी जिल्लामा साक्षरता कम देखिएको छ । यस्तै, तेह्रथुममा ९५.९८ प्रतिशत, भोजपुरमा ९६.८ प्रतिशत, संखुवासभामा ९५.६३ प्रतिशत, ताप्लेजुङमा ९६.४५ प्रतिशत र सोलुखुम्बुमा ९६.७३ प्रतिशत प्रतिशत साक्षर रहेका छन् ।

प्रदेश १ मा ४५ लाख ३४ हजार ९४३ जनसंख्या रहेकोमा ९६.७४ प्रतिशत साक्षर रहको सामाजिक विकासमन्त्री राजन राईले बताए । प्रदेश सरकारको आर्थिक वर्ष २०७९/८० को नीति कार्यक्रममा समेत प्रदेशलाई साक्षर घोषणा गर्ने उल्लेख गरीएको थियो ।

यो घोषणासँगै प्रदेश १ तेस्रो साक्षर प्रदेश बनेको छ । यसअघि बागमती र गण्डकी प्रदेश साक्षर घोषणा भइसकेका छन् । आगामी आर्थिक वर्षमा प्रदेशलाई पूर्ण साक्षर प्रदेश घोषणा गर्ने मन्त्री राईले बताए ।

नेपालमा २०७१ सालदेखि साक्षर जिल्ला घोषणा गर्न थालिएको थियो । १५ देखि ६० वर्ष उमेर समूहका ९५ प्रतिशतभन्दा बढी नागरिक साक्षर भए सो क्षेत्रलाई साक्षर घोषणा गर्न सकिने युनेस्कोको नीति छ ।

प्रकाशित मिति: बिहीबार, भदौ २३, २०७९ १६:५८