त्रिविमा उपकुलपतिको पत्रकार सम्मेलन चलिरहँदा नेविसंघ र अनेरास्ववियुबीच झडप

त्रिविमा उपकुलपतिको पत्रकार सम्मेलन चलिरहँदा नेविसंघ र अनेरास्ववियुबीच झडप

A+ A A-

त्रिभुवन विश्वविद्यालय परिसरमा नेविसंघ र अनेरास्ववियुका कार्यकर्ताबीच झडप भएको छ ।

त्रिविका उपकुलपति धर्मकान्त बाँस्कोटाले पत्रकार सम्मेलन गरिरहेका बेला स्मृति भवनबाहिर नेविसंघले विरोध प्रदर्शन गरेको थियो । विरोध प्रदर्शनका क्रममा विवाद हुँदा नेविसंघ र अनेरास्ववियुका कार्यकर्ताबीच झडप भएको हो ।

झपडमा एक जना प्रहरी निरीक्षक र दुई जना नेविसंघका कार्यकर्ता घाइते भएको एसएसपी भरत बोहोराले जानकारी दिए । नेविसंघका नेता योगेन्द्र रावलका अनुसार ढंगा हानाहान हुँदा विद्यार्थी नेता किशोर भण्डारी र भुवन जोशी घाइते भएका छन् । नेविसंघले उपकुलपतिले राजीनामा दिनुपर्ने, हुबहु प्रश्नपत्रबारे छानबिन समितिको प्रतिवेदन सार्वजनिक गरिनुपर्नेलगायत माग राख्दै विरोध प्रदर्शन गरेको थियो ।

त्रिविमा असारदेखि नै नेविसंघ आन्दोलनमा उत्रिँदै विभिन्न निकायमा तालाबन्दी गर्दै आएको छ । तर, अनेरास्ववियुले भने नेविसंघको विरोधमा प्रदर्शन गर्दै आएको छ । यसअघि त्रिविले विज्ञप्ति जारी गरी विश्वविद्यालयजस्तो प्राज्ञिक थलोमा दैनिकजसो पदाधिकारीलाई धम्क्याउने, तालाबन्दी गर्ने र तोडफोडजस्ता क्रियाकलाप हुने गरेको भन्दै सरकारसँग शान्ति सुरक्षाको माग गरेको थियो ।

उक्त विज्ञप्तिमा नेपाल विद्यार्थी सङ्घ कीर्तिपुरका विद्यार्थीको समूहले तालाबन्दी गर्ने, घेराउ गर्ने, पदाधिकारी तथा कर्मचारीलाई धम्क्याउने, त्रिविको दैनिक काम–कारबाही गर्दा वारम्बार कार्यालयमा जबर्जस्ती प्रवेश गरी अवरोध सिर्जना गर्ने गरेको आरोप छ । पदाधिकारीको कार्यकक्षमा प्रवेश गर्ने तथा तोडफोड गरिँदा असुरक्षित भएकाले शान्ति सुरक्षाको माग गरिएको विज्ञप्तिमा उल्लेख छ ।