तरकारीको विषादी परीक्षण गर्दै वालिङ नगरपालिका

फाइल तस्वीर

A+ A A-

संघीय सरकारले तरकारीको विषादी परीक्षण गर्न नसकिरहेको समयमा वालिङ नगरपालिकाले विषादी परीक्षण सुरु गरेको छ ।

नगरपालिकाले आफ्ना १४ वटै वडामा तरकारीमा विषादीको मात्रा परीक्षण गर्ने ल्याब जडान गरेको बताएको छ ।

‘हामीले १४ वटै वडामा तरकारी संकलन केन्द्र बनाएका छौं । यिनै केन्द्रमा विषादी परीक्षण गरिन्छ,’ नगर प्रमुख दिलिपप्रताप खाँडले शिलापत्रसँग भने ।

नगरपालिकाले संयुक्त राष्ट्रसंघीय कार्यक्रम यूएनडीपीको सहयोगमा तरकारीमा विषादी परीक्षण सुरु गरेको हो । खाँडका अनुसार १४ वटा वडामा स्थापना गरिएका ल्याबमा तरकारीसँगै माटोको पीएच पनि मापन गरिनेछ ।

पहिलो चरणमा सरकारले प्रयोगका लागि अनुमति दिएको विषादीको मात्रा नापिनेछ । सरकारले तोकेको मापदण्डभन्दा बढी विषादी प्रयोग गरेको भेटिएमा तरकारी बजारमा पठाउन रोकिने खाँडले बताए ।

विषादी प्रयोग नगरिएको तरकारीको मूल्य विषादी प्रयोग गरिएका तरकारीभन्दा बढी राखिने बताउँदै खाँडले भने, ‘निश्चित प्रतिशतसम्म विषादी राख्न पाइन्छ । तर, तोकेको मात्राभन्दा बढी विषादी राखिएका तरकारी रिजेक्ट हुनेछन् ।’

खाँडले तरकारीको विषादी परीक्षणका लागि यूएनडीपीले नै १४ जना प्राविधिक उपलब्ध गराएको बताए ।

ल्याब परीक्षणबाट स्वीकृत भएका तरकारी वालिङ बजार र पोखरा पठाइनेछ । ‘एक गाउँ एक उत्पादन’ लक्ष्य लिएको वालिङ नगरपालिकाले आफ्नो क्षेत्रमा उत्पादित सामग्री सहकारी संस्थामार्फत बिक्री वितरण गर्ने बताएको छ ।